โฮเชยา 1 - ซูรัจ ปือมือเลา นะ ตูฮัด1 ปือมือเลา นะ ตูฮัด บือซัยํ เดะ อาตัซ_ นู มาแรฮ รอจ กะ โฮเชยา นานะ นะ เบเออรี_ เดะ ฮาดัจ นะ อุดซียา_ โยทาม_ อาฮาซะ_ ฌางัน เฮเซคียา_ ราฌา ซือมูฮา นะ นังฆรี ยูดา_ ฌางัน เดะ ฮาดัจ นะ เยโรโบอัม_ นานะ นะ โยอาด_ ราฌา นังฆรี อิซราเอน. ซือมียา ซือรูมัฮ นะ โฮเชยา 2 กาลา ตูฮัด บือซัยํ เดะ อาตัซ_ ญา มือเลา ฌางัน โฮเชยา_ ฌาดี ปือมือเลา ลามูลา เตอ_ ตูฮัด มือเลา ฌางัน โฮเชยา จะ_ “ปี เลอ ซาโมจ นีบีนี บือกาเซฮ มาแรฮ ฌาดี บีนี_ บือเลฮ นานะ ฌางัน ญา_ ฌาดี นานะ นู นะ บือกาเซฮ_ ซาเบะ นังฆรี อีนี อาดา ลาฆู บือกาเซฮ บาญะ_ บือกะ นู กูญา ตีงัน ตูฮัด บือซัยํ เดะ อาตัซ ดัฮ.” 3 กะฆีเตอ_ โฮเชยา ญา ปี ซาโมจ นีบีนี นู ปือนามา โกเมอ_ นานะ นีบีนี นะ ดิบลาอิม_ มาแรฮ ฌาดี บีนี. นีบีนี อีตู โปด_ บือโปรจ ฌางัน ญา_ บือเลฮ นานะ กีลากี ซืออูรัก. 4 ตูฮัด บือซัยํ เดะ อาตัซ มือเลา ฌางัน โฮเชยา จะ_ “กือนา บลาโลก ปือนามา นานะ อีตู จะ_ ยิซะเรเอน_ ซาเบะ จะ_ เตด ลามา กู นะ กรัจ ฮูโกบ บือแนฮ บักซา นะ เยฮู_ กรานา ลาฆู ดารัฮ นู มือนีแลฮ ตรือเบะ เดะ ยิซะเรเอน_ กู นะ บูวัจ บรี กะ นังฆรี นะ บือแนฮ บักซา อิซราเอน ลือแงะ ฮาบิฮ ดัฮ. 5 เดะ อารี อีตู_ กู นะ ลือกับ ปานัฮ นะ ลูมอฮ อิซราเอน_ เดะ จือลัฮ บูเกะ ยิซะเรเอน.” 6 ลือปัซ เดะ อีตู_ นีบีนี อีตู โปด_ บือโปรจ ปูลัก_ บือเลฮ นานะ นีบีนี ซืออูรัก. ตูฮัด มือเลา ฌางัน ญา จะ_ “กือนา ตืองะ ปือนามา นานะ นีบีนี อีตู จะ_ โลรูฮามัฮ_ ซาเบะ กู ฮอย เตด ตือจีฮัด ลาฆี_ กะ บือแนฮ บักซา อิซราเอน. กู นะ เตด อาเกะ ซาลัฮ นะ กูญา เลอ. 7 ตาปี กู นะ จีฮัด กะ บือแนฮ บักซา นะ ยูดา_ กู นะ ตูโลก กูญา บรี ลือปัซ_ ฌางัน ปือนามา นะ ตูฮัด บือซัยํ เดะ อาตัซ_ ตูฮัด นะ กูญา. กู นะ ฮอย เตด ตูโลก กูญา ฌางัน ฮูลู ปานัฮ_ เฆอ จะ_ ฌางัน ปือดัก_ เฆอ จะ_ ฌางัน ลาฆู บือปรัก_ เฆอ จะ_ ฌางัน ลาฆู โกะ กูดา_ เฆอ จะ_ ฌางัน ลาฆู โกะ ตาฮัน กูดา.” 8 กาลา นีบีนี อีตู_ ญา บรี กะ โลรูฮามัฮ บูวัก ดาดา ดัฮ_ นีบีนี อีตู บือโปรจ_ บือเลฮ นานะ กีลากี ซืออูรัก. 9 กะฆีเตอ ตูฮัด บือซัยํ เดะ อาตัซ มือเลา จะ_ “กือนา บลาโลก ปือนามา นานะ อีตู จะ_ โลอัมมี ซาเบะ กาเญา บูกัด ลูมอฮ ซือมียา นะ กู. กู โปด_ บูกัด ตูฮัด นะ กาเญา.” ลาฆู บรี กะ ลูมอฮ อิซราเอน บาฌิ ปาเระ 10 ตาปี ลูมอฮ อิซราเอน นะ บาญะ_ บือกะ ตานัฮ ปาตัย บีดิก ลาโวจ_ นู นะ ซูกัจ_ เฆอ จะ_ นะ กีรา_ ฮอย เตด ตือตู. เดะ ตือปัจ นู ตูฮัด มือเลา ฌางัน กูญา จะ_ “กาเญา บูกัด ลูมอฮ ซือมียา นะ กู” เตอ_ นะ มือเลา ฌางัน กูญา จะ_ “กาเญา ฌาดี นานะ นะ ตูฮัด นู ฮีโดะ ซือลาลู เลอ.” 11 ลูมอฮ ยูดา ฌางัน ลูมอฮ อิซราเอน นะ มาโซะ บือซามา_ นะ ตืองะ ซือมียา ซืออูรัก บรี ฌาดี กือปาลา. กูญา นะ ปาคัจ ญาแญะ ปี ดาตัก เดะ นังฆรี อีตู_ นังฆรี นู กูญา ดือละ ฌาดี ปราโซฮ_ ซาเบะ วะตู นะ ยิซะเรเอน นะ บือซัยํ โตระ. |