ฆาลาเตีย 1 - ซูรัจ ปือมือเลา นะ ตูฮัด

¹ กู เปาโล_ นู ฌาดี ปือญูโรฮ นะ ตูฮัด เตอ_ บูกัด ปือญูโรฮ นู โกะ ซือมียา ตืองะ ดัฮ_ นู ซือมียา ซืออูรัก ซูโรฮ ดัฮ เตอ_ ตาปี เยซู คริด_ ฌางัน ตูฮัด นู อาโปก เลอ_ ญา ตืองะ กู ดัฮ. ตูฮัด นู อาโปก อีตู เลอ_ นู บูวัจ บรี เยซู ฮีโดะ ปาเระ เดะ มาตี ดัฮ.

² กู ฌางัน ลูมอฮ อาดี บราดี_ นู อาดา บือซามา ฌางัน กู เตอ_ กามี ฆาแรฮ ซูรัจ อีนี_ กีเรบ กะ โกะ ลูมอฮ นะ ตูฮัด นู อาดา เดะ โซะ นังฆรี ฆาลาเตีย.

³ มีตา เดะ ตูฮัด นู อาโปก เดะ อาตัซ_ ฌางัน เยซู คริด_ ตูฮัด นะ กีตา_ นะ บรี ซือลามัจ กะ กาเญา_ นะ บรี กาเญา ดูโดะ ซือนัง ซือลามัจ เลอ.

⁴ เยซู คริด เตอ_ ญา ซรัฮ ญาวา นะ ญา ตะอาซิก_ กรานา ดูซา นะ กีตา_ บีดา นะ ตูโลก กีตา_ บรี ลือปัซ เดะ ฮาดัจ นู ฌาฮัจ นะ กาลา อีนี. ญา บูวัจ กะฆีเตอ เลอ_ ตูโรจ ลาฆู นู ตูฮัด_ อาโปก นะ กีตา_ บือคานะ ดัฮ.

⁵ ตูฮัด เลอ_ ญา บือซรี ซูโงฮ_ ซือมาญัก รอจ_ ซือลาลู. อาเมน.

ฮอย บรีตา บาฌิ นู อาซิก

⁶ กู ปือและ ฮาตี ซูโงฮ_ นู ลูมอฮ กาเญา_ ปาคัจ ตีงัน ตูฮัด งัจบางัจ กะฆีนี. ตูฮัด เลอ_ นู ปาเงน กาเญา ดัฮ_ ซาเบะ เยซู คริด_ นู ตือจีฮัด บาฌิ กะ กาเญา. ตาปี กาเญา อูโนยํ ปี ซารี บรีตา บาฌิ นู อาซิก ดัฮ.

⁷ ตาปี ฮอย บรีตา บาฌิ นู อาซิก เลอ. ตาปี อาดา ซือมียา ซือตืองัฮ_ นู บูวัจ บรี กาเญา ฆาโดฮ ฮาตี เตอ. กูญา อีงัจ นะ อาเลฮ_ บรีตา นู บาฌิ ปาซัน เยซู คริด_ บรี ฌาดี ลาฆู อาซิก เลอ.

⁸ ตาปี มีเซ จะ กามี เตอ_ ฮูลู บาลัก นู มาแรฮ_ เดะ โซะ อาตัซ ลาแงะ โปด_ นะ มาแรฮ มือญาเระ บรีตา นู บาฌิ กะ กาเญา เตอ_ นู อาซิก เดะ บรีตา บาฌิ อีตู_ นู กามี มือญาเระ กะ กาเญา ดัฮ_ บรี ซือมียา อีตู_ กือนา ซูปัฮ อาโบยํ เลอ.

⁹ ซือรูปา กามี บือเลฮ มือญาเระ ดูลู ดัฮ_ เดะ วะตู อีนี เลอ_ กามี มือเลา ปูลัก จะ_ ดัฮ ซือมียา ดีฮา มาแรฮ มือญาเระ กะ กาเญา_ บรีตา นู บาฌิ_ นู อาซิก เดะ ลาฆู นู กาเญา บือเลฮ ซาโมจ ดัฮ เตอ_ บรี ซือมียา อีตู_ กือนา ซูปัฮ อาโบยํ เลอ.

¹⁰ กรานา_ นู กู มือเลา ซีงี เตอ_ กู มือเลา_ บรี อาเมด ฮาตี_ นะ โกะ ซือมียา เฆอ? เฆอ จะ_ บรี อาเมด ฮาตี_ นะ ตูฮัด เดะ อาตัซ เฆอ? กู อีงัจ นะ บูวัจ บรี_ โกะ ซือมียา ซูกา ฮาตี เฆอ? ฮอย เลอ. ดัฮ กู อีงัจ นะ บูวัจ กะฆีเตอ ลาฆี_ กู เตด ฌาดี ปราโซฮ นะ เยซู คริด เลอ.

ลาฆู นู เปาโล ฌาดี ปือญูโรฮ นะ ตูฮัด ดัฮ

¹¹ อาดี บราดี เออ_ กู ซูกา มือญาเระ_ บรี กะ กาเญา ตาฮู จะ_ บรีตา นู บาฌิ นู กู บือตาฮู กะ กาเญา ดัฮ เตอ_ เตด ฌาดี ลาฆู นะ โกะ ซือมียา เลอ.

¹² กรานา กู เตด ซาโมจ บรีตา บาฌิ อีตู_ เดะ โกะ ซือมียา ดีฮา โปด. ฮอย ซาปา นู อาฌัยํ กู ดัฮ_ ตาปี เยซู คริด เลอ_ ญา ปลีฮัจ กะ กู ดัฮ.

¹³ กรานา กาเญา ดืองัยํ ดัฮ_ ลาฆู นะ กู กาลา ดูลู เตอ_ วะตู กู ตูเฮะ กะ ฮาดัจ บักซา ยิว ดัฮ. กาลา อีตู_ กู ปรือกัด ลูมอฮ นะ ตูฮัด เดะ อาตัซ_ บาญะ โตระ ดัฮ. กู อีงัจ นะ บูวัจ บรี ลูมอฮ อีตู_ นะ ฮาบิฮ บูวัก ดัฮ.

¹⁴ กาลา อีตู เลอ_ กู ตูเฮะ โตระ_ กะ ฮาดัจ บักซา ยิว_ ลือเบฮ เดะ กาวัด นู อูมอยํ ซามา บายา ฌางัน กู_ เดะ บักซา นะ กู. กู อาดา ฮาตี ตูเฮะ ซูโงฮ เลอ_ กะ ฮาดัจ นู ตูโรด มือนูโรด มาแรฮ_ เดะ บือแนฮ นะ กู.

¹⁵ ตาปี ตะเดะ กู อาดา_ เดะ โปรจ นะ มะ เดะ กู_ ตูฮัด เดะ อาตัซ_ ญา ปีเลฮ กู ดัฮ. ญา ฮาลัย บรี ซือลามัจ กะ กู_ กะฆีเตอ ญา ปาเงน กู ดัฮ.

¹⁶ ญา ซูกา ปลีฮัจ นานะ นะ ญา_ กะ กู_ บีดา กู นะ มือญาเระ บรีตา นู บาฌิ นะ ญา_ กะ โกะ ลูมอฮ ซือมียา บักซา อาซิก. ดัดดัด อีตู_ กู เตด ปี บือกีรา ลาฆู อีตู_ ฌางัน ซือมียา ดีฮา ดัฮ.

¹⁷ กู เตด ปี กะ นังฆรี เยรูซาเลม_ บีดา นะ ดาปัจ_ โกะ ซือมียา นู ฌาดี ปือญูโรฮ นะ ตูฮัด_ ดูลู เดะ กู. ตาปี กู ปี กะ นังฆรี อาระเบีย ดัฮ. เดะ บลากัก_ กู บาลิ ปี_ กะ นังฆรี ดามัดกัด ปูลัก เลอ.

¹⁸ ลือปัซ ตีฆา ตาโฮด กะ บลากัก_ กู บือฌาลัด ญาแญะ ปี กะ นังฆรี เยรูซาเลม ดัฮ_ บีดา นะ ดาปัจ เปโตร. กู ดูโดะ มือนูปัก ฌางัน ญา ปัจ อีตู_ ลีมา บือลัซ อารี ดัฮ.

¹⁹ ตาปี กู เตด ดาปัจ โกะ ปือญูโรฮ อาซิก เลอ_ ดาปัจ ซา ยากอบ_ นู ฌาดี อาดี เดะ ตูฮัด เยซู.

²⁰ ตูฮัด เดะ อาตัซ ฌาดี ซะซรี_ นู กู เตด มืออูปัย เดะ ลาฆู_ นู กู ฆาแรฮ กะ กาเญา อีนี เลอ.

²¹ เดะ บลากัก_ กู บือฌาลัด ปี_ กะ โซะ นังฆรี ซีเรีย_ โซะ นังฆรี ซิลีเซีย ฌูฆา.

²² โกะ ลูมอฮ นะ ตูฮัด เยซู คริด_ เดะ โซะ นังฆรี ยูเดีย_ กูญา เตด กราลา กู ลาฆี เลอ.

²³ ตาปี กูญา อีตู ดืองัยํ ซา ลาฆู อีนี จะ_ “ซือมียา อีตู_ นู ดูลู ปรือกัด กีตา ดัฮ_ กาลา อีนี_ ญา ปี มือญาเระ ลาฆู นู กีตา ปือจายา_ ฌาดี ลาฆู นู ดูลู_ ญา อีงัจ นะ บูวัจ บรี ฮาบิฮ ดัฮ.”

²⁴ กะฆีเตอ_ ลูมอฮ กูญา มือโอจ กะ ตูฮัด เดะ อาตัซ_ ซาเบะ ลาฆู นะ กู เลอ.