บราเกะ ลารี 1 - ซูรัจ ปือมือเลา นะ ตูฮัด

ลูมอฮ อิซราเอน เดะ นังฆรี อียิบ

¹ ตะเดะ อีนี ฌาดี ปือนามา_ นะ โกะ นานะ อิซราเอน_ นู มาโซะ ปี ดูโดะ เดะ นังฆรี อียิบ_ กูญา ปาคัจ ตูโรจ กะ ยาโกบ ปี_ มารือมา ฌางัน โกะ ซือมียา ซือรูมัฮ นะ กูญา.

² ฌาดี จะ รูเบน_ ซีเมโอน_ เลวี_ อาดา ฌางัน ยูดา ซามา.

³ อาดา อีซาคา_ เซบูลุน_ ฌางัน_ เบนยามิน.

⁴ อาดา ดาน_ นับทาลี_ กาด_ ฌางัน อาเซอ.

⁵ ลูมอฮ ซือมียา อีนี_ ซือมูฮา ฌาดี บือแนฮ บักซา นะ ยาโกบ ซือมูฮา_ ตูโฌฮ ปูโลฮ (70) อูรัก. โซะ โยเซบ เตอ_ ญา อาดา ดูโดะ เดะ นังฆรี อียิบ ดัฮ.

⁶ ลือปัซ อีตู โยเซบ ฌางัน โกะ อาดี บราดี เดะ ญา_ ฌางัน โกะ ซือมียา ซือมูฮา_ เดะ ฮาดัจ อีตู_ มาตี ฮาบิฮ ดัฮ.

⁷ ตาปี ลูมอฮ บือแนฮ อิซราเอน_ อาดา โกะ อานะ จูจู บือตามัฮ บาญะ ซือรูโลยํ_ ลูมอฮ กูญา ตือฆัยํ อูรัจ ซูโงฮ_ อาดา บาญะ ซือรูโลยํ_ กรือจัย ปี เดะ นังฆรี ปือนอฮ ดัฮ.

ลูมอฮ อิซราเอน กือนา ปรือกัด

⁸ อาดา ราฌา บารู_ ญา มาแรฮ ปือบือลา นังฆรี อียิบ_ ญา เตด บือกราลา ฌางัน โยเซบ.

⁹ กะฆีเตอ_ ญา บือเลฮ มือญาเระ กะ ลูมอฮ บักซา นะ ญา จะ_ “ลีฮัจ เลอ_ ลูมอฮ อิซราเอน บาญะ ตือลาลู_ กูญา ตือฆัยํ อูรัจ ลือเบฮ เดะ ลูมอฮ กีตา ลาฆี เลอ.

¹⁰ มาแรฮ เลอ_ บรี กีตา ปาคัจ ซารี อากัน_ นู นะ บือลาวัด ฌางัน ลูมอฮ กูญา_ เตด กะฆีเตอ_ กูญา นะ อาดา บือตามัฮ บาญะ ซือรูโลยํ. ดัฮ อาดา ลาฆู บือปรัก กาลา ดีฮา_ กูญา นะ บือปาคัจ ฌางัน ซือตรู บือลาวัด กีตา_ นะ ลารี ตรือเบะ บรี ลือปัซ เดะ นังฆรี อีนี เลอ.”

¹¹ ซาเบะ กะฆีเตอ_ ลูมอฮ อียิบ ตืองะ กือปาลา ปราโซฮ_ นู ปรือกัด โกะ ลูมอฮ อิซราเอน บรี บือกรือฌา บรัจ โตระ_ บรี กูญา ซือมูฮา บูวัจ นังฆรี_ บีดา นะ ตาโรฮ โกะ ซือบารัก บรือฆา นะ ราฌา ฟาโร_ ฌาดี จะ_ นังฆรี ปีทม ฌางัน นังฆรี ราเมเซด.

¹² ตาปี กูญา อาดา ปรือกัด กะฮามี_ ลูมอฮ อิซราเอน โปด_ อาดา บือตามัฮ บาญะ ซือรูโลยํ_ กรือจัย ปี ราตา_ บูวัจ บรี ลูมอฮ อียิบ กูญา บราซา ตาโกจ เดะ ลูมอฮ อิซราเอน เลอ.

¹³ กะฆีเตอ กูญา ปรือกัด ลูมอฮ อิซราเอน บรี บือกรือฌา บรัจ โตระ_

¹⁴ บูวัจ บรี กูญา ซูซัฮ โตระ_ กรานา จะ ลาฆู นู กูญา บือกรือฌา เตอ_ ฌาดี โกะ บาตู ปูเตฮ_ โกะ บาตา_ เฆอ จะ บือกรือฌา แนฮฌือแนฮ เดะ บือนัก. กูญา ปรือกัด บรี กรือฌา บารัก ราตา มาจับ เลอ.

¹⁵ โซะ ราฌา นังฆรี อียิบ_ ญา ปือซัด กะ นีบีนี นู ฌาดี บีดัด_ ลูมอฮ ฮีบรู_ (นู ซืออูรัก ปือนามา จะ ชีฟรา_ นู ซืออูรัก ปือนามา ปูอา)

¹⁶ มือเลา จะ_ “กาลา กาเญา ปี ฌาดี บีดัด กะ นีบีนี บักซา ฮีบรู_ ลีฮัจ จะ_ ญา ดูโดะ เดะ อาปี_ ดัฮ ฌาดี นานะ กีลากี_ บรี กาเญา บูนอฮ บูวัก_ ตาปี ดัฮ ฌาดี นานะ นีบีนี_ ปือบียัยํ บรี ญา ฮีโดะ เลอ.”

¹⁷ ตาปี นีบีนี นู ฌาดี บีดัด_ กูญา บรีงัจ ตาโกจ เดะ ตูฮัด_ กะฆีเตอ กูญา เตด บือเลฮ บูวัจ ตูโรจ กะ ปือมือซัด นะ ราฌา นังฆรี อียิบ_ ปือบียัยํ บรี นานะ กีลากี ฮีโดะ เลอ.

¹⁸ กะฆีเตอ_ ราฌา ญา ปือซัด บรี กะ นีบีนี นู ฌาดี บีดัด มาแรฮ_ มือเลา จะ “บูวัจ นามา ปะ กาเญา บูวัจ ลาฆู กะฆีนี_ บรี กะ นานะ กีลากี ญา ฮีโดะ เลอ?”

¹⁹ กะฆีเตอ นีบีนี นู ฌาดี บีดัด อีตู_ กูญา มือญาเระ กะ ราฌา ฟาโร จะ_ “โกะ นีบีนี ลูมอฮ ฮีบรู_ เตด ซือรูปา กะ นีบีนี ลูมอฮ อียิบ โบะ. กูญา ดูโดะ เดะ อาปี ซือนัง_ จือปัจ_ กามี ปี ฮอย เตด ดัด เลอ.”

²⁰ กะฆีเตอ_ ตูฮัด ญา ตือจีฮัด กะ โกะ นีบีนี นู ฌาดี บีดัด อีตู_ กะฆีเตอ โกะ ลูมอฮ ซือมียา_ อาดา บือตามัฮ บาญะ ซือรูโลยํ_ บูวัจ บรี กูญา ตือฆัยํ อูรัจ โตระ เลอ.

²¹ กรานา นีบีนี นู ฌาดี บีดัด_ กูญา บรีงัจ ตาโกจ เดะ ตูฮัด_ กะฆีเตอ ตูฮัด_ บูวัจ บรี กูญา ดูวา อูรัก_ อาดา โกะ ลากี บือเลฮ โกะ นานะ ดัฮ.

²² โซะ ราฌา ฟาโร_ ญา ปือซัด โกะ ลูมอฮ ซือมียา ซือมูฮา จะ_ “โกะ นานะ กีลากี บักซา ฮีบรู นู บือฌาดี มาแรฮ เตอ_ อาเมด บือปี บูวัก เดะ ซูงัย นัยละ เลอ_ ตาปี นานะ นีบีนี ราตา อูรัก ปือบียัยํ. เลอ.”