เอซะเทอ 1 - ซูรัจ ปือมือเลา นะ ตูฮัด

ราฌา อาฮาซูเอรัด ญา ปรือลอจ ราฌา นีบีนี วาชะที

¹ ลาฆู อีนี บือฌาดี_ เดะ กาลา ฮาดัจ นะ อาฮาซูเอรัด_ ราฌา ปือบือลา ตะเดะ นังฆรี อินเดีย ปี รอจ กะ นังฆรี เอทีโอเปีย_ ซือราตุซ ดูวา ปูโลฮ ตูโฌฮ (127) นังฆรี อีตู.

² เดะ วะตู อีตู_ ราฌา อาฮาซูเอรัด เตอ_ ญา อาดา ดูโดะ เดะ ตือปัจ ดูโดะ นะ ญา_ เดะ นังฆรี ซูซา_ นังฆรี รูมัฮ ฌาฆา บือปรัก.

³ เดะ ตาโฮด นู ตีฆา_ ฮาดัจ นะ ญา_ ญา บูวัจ ลาฆู มากัด บรามัย บือซามา_ บลาโลก โกะ ตกเก ฌางัน โกะ ซือมียา บือกรือฌา กะ ลูวัก นะ ญา_ อาดา ฌางัน โกะ กือปาลา ตาฮัน_ นะ นังฆรี ปือซียา_ นังฆรี มีเดีย_ ฌางัน โกะ ซือมียา ซัยํบือซัยํ_ โกะ กือปาลา นังฆรี_ มาแรฮ บือซามา โซะ ฮือลด มูคา นะ ญา.

⁴ ญา บรี ลีฮัจ โกะ ซือบารัก นู บรือฆา นะ ญา_ ฌางัน โกะ ลาฆู กายา นู บาญะ ซูโงฮ นะ ญา_ อาดา บาญะ อารี เลอ_ รอจ กะ ซือราตุซ ลาปัด ปูโลฮ (180) อารี.

⁵ กาลา ลือปัซ เดะ อารี กะฆีนี ดัฮ_ ญา บูวัจ ลาฆู มากัด บรามัย_ ฌางัน โกะ ลูมอฮ ซือมียา ซือมูฮา_ นู อาดา ดูโดะ เดะ ซูซา_ นังฆรี รูมัฮ ฌาฆา บือปรัก_ เตด จะ_ โกะ ซือมียา มิดือมิ เฆอ จะ_ ซือมียา ซัยํบือซัยํ. ฌาดี ลาฆู บรามัย มากัด ตูโฌฮ อารี_ เดะ กือโบด บือฌาลัด อูซิ นะ รูมัฮ ราฌา.

⁶ อาดา กาเยด กือตัก ลูลู ลือมัฮ_ ซี ปูเตฮ ฌางัน ซี ฮีเฌา_ อีกัจ ฌางัน ตาลี ลูลู ลือมัฮ ซี แนบปริง_ ซรือโกะ ฌางัน ปีระ บูลัจ_ นู ลือกัจ เดะ จาวัก บาตู มูดา. อาดา ฌางัน ตือปัจ ตีโนะ นู บูวัจ ฌางัน มัซ_ ฌางัน ปีระ_ ตืองะ เดะ อาตัซ บาตา_ ตานัม บาตู มีรัฮ_ บาตู มูดา_ บือตือแล ฌางัน กูเละ ซีโปจ ตือมีกา_ ฌางัน โกะ บาตู บรือฆา ซี แนฮฌือแนฮ.

⁷ โกะ ซือบารัก โอะ โปด_ บอฮ เดะ มาโกะ มัซ_ ฌางัน มาโกะ บาญะ ฌือแนฮ. โกะ อาระ อางุน นะ รูมัฮ ราฌา โปด_ บาญะ_ ตูโรจ บือกะ ฮาตี นู ลือฆา นะ ราฌา.

⁸ ลาฆู โอะ โปด_ บูวัจ ตูโรจ ฮูโกบ นู ฮอย ลาฆู ปรือกัด_ กรานา ราฌา ญา ปือซัด กะ โกะ ซือมียา บือกรือฌา_ จะ_ บรี กะ ราตา อูรัก บูวัจ ตูโรจ บือกะ นู ฮาตี บือคานะ.

⁹ โซะ วาชะที_ บีนี ราฌา โปด_ บูวัจ ลาฆู มากัด บรามัย_ กะ ลูมอฮ นีบีนี เดะ รูมัฮ นะ ราฌา อาฮาซูเอรัด ฌูฆา.

¹⁰ เดะ อารี ตูโฌฮ_ กาลา ฮาตี นะ ราฌา ญา รามัย ฌางัน อาระ อางุน_ ญา บือเลฮ ซูโรฮ เมฮูมาน_ บีซะทา_ ฮาระโบนา_ บิกทา_ ฌางัน อาบักทา_ เซทาระ_ ฌางัน คาระคาซะ_ ปราโซฮ นู กือนา กรัจ ตือโลยํ_ ตูโฌฮ อูรัก_ ฌาดี ซือมียา บือกรือฌา บรี กะ ราฌา อาฮาซูเอรัด_

¹¹ บรี กูญา ปี บลาโลก วาชะที_ บีนี ราฌา_ นู บอฮ กือจูบุก_ มาแรฮ ซารี ราฌา_ บีดา นะ บรี โกะ ลูมอฮ ซือมียา_ ฌางัน โกะ ลูมอฮ ซือมียา ซัยํบือซัยํ นะ ญา_ นะ บือเลฮ ลีฮัจ มูคา นะ บีนี นะ ญา_ กรานา บีนี นะ ญา บือฆาจะ โตระ.

¹² ตาปี วาชะที_ บีนี ราฌา_ ญา ตีเมา มาแรฮ_ ตูโรจ กะ ปือมือเลา นะ ราฌา_ นู ญา ปือซัด กะ ปราโซฮ ตูโฌฮ อูรัก อีตู ดัฮ. กะฆีเตอ_ ราฌา ญา บืออีเซด_ บูวัจ บรี กะ ลาฆู มูซัยํ นะ ญา อาดา ลาฆู ฮางัจ_ บือกะ อาปี เดะ ดาลับ ฮาตี.

¹³ กะฆีเตอ ราฌา_ ญา มือเลา บือกีรา_ ฌางัน โกะ ซือมียา ปานัย อากัน_ นู ตาฮู ลาฆู ฮาดัจ ฮูโกบ. นู บือกีรา กะฆีนี_ ฌาดี บือกะ ราฌา ญา ลาดัจ บูวัจ_ ฌางัน โกะ ซือมียา นู ปานัย เดะ ลาฆู ฮูโกบ_ ฌางัน ลาฆู บือดะวา.

¹⁴ ซือมียา นู ดาปิก ราฌา เตอ_ อาดา คาระเชนา_ เชทาระ_ อัดมาทา_ ทาระซิด_ เมเรซะ_ มาระเซนา ฌางัน เมมูคาน_ กือปาลา กือตูโฌฮ อูรัก_ นะ นังฆรี ปือซียา ฌางัน มีเดีย_ นู ดือละ มาโซะ ซารี ราฌา_ ฌาดี โกะ ซือมียา ซัยํบือซัยํ เดะ กาวัด_ เดะ นังฆรี.

¹⁵ ราฌา ญา ตาญา กูญา อีตู จะ_ “ตูโรจ กะ ฮาดัจ ฮูโกบ_ นะ ฆาโดฮ บูวัจ ลาฆู นามา_ กะ วาชะที_ บีนี นะ ราฌา_ กรานา บีนี ราฌา ตีเมา บูวัจ ตูโรจ_ กะ ปือมือเลา นะ ราฌา อาฮาซูเอรัด_ นู ญา ซูโรฮ โกะ ปราโซฮ ปี มือญาเระ เลอ?”

¹⁶ กะฆีเตอ_ เมมูคาน ญา มือญาเระ_ โซะ ฮือลด มูคา ราฌา_ ฌางัน ลูมอฮ โกะ ซือมียา ซัยํบือซัยํ ซือมูฮา จะ_ “วาชะที_ นู บีนี นะ ราฌา_ บูวัจ ซาลัฮ_ บูกัด ซา กะ ราฌา เลอ_ ตาปี ญา บูวัจ ซาลัฮ กะ ซือมียา ซัยํบือซัยํ ซือมูฮา_ ฌางัน โกะ ซือมียา ราตา เดะ โกะ นังฆรี ซือมูฮา_ นะ ราฌา อาฮาซูเอรัด.

¹⁷ ซาเบะ ลาฆู นู บีนี ราฌา ญา บูวัจ เตอ_ โกะ ลูมอฮ นีบีนี ซือมูฮา_ กูญา นะ ตาฮู_ บูวัจ บรี กูญา ตีญุง กะ ลากี นะ กูญา_ ฌางัน ลาฆู อาฆัฮ ฆือละ_ ซาเบะ กูญา นะ มือเลา จะ_ ‘ราฌา อาฮาซูเอรัด ญา ซูโรฮ บรี บาวา วาชะที_ บีนี นะ ญา ปี ซารี ญา_ ตาปี บีนี นะ ญา ฮอย เตด มาแรฮ’.

¹⁸ เดะ อารี อีนี เลอ_ โกะ นีบีนี นู ซัยํบือซัยํ_ เดะ นังฆรี ปือซียา ฌางัน มีเดีย_ กูญา ดืองัยํ ลาฆู ปรางัย นะ บีนี ราฌา_ กูญา โปด_ มือเลา บรี กะ โกะ ซือมูฮา บือกรือฌา นะ ราฌา_ บูวัจ บรี อาดา ลาฆู มือฌัฮ_ ลาฆู มูซัยํ บาญะ โตระ.

¹⁹ ซาเบะ กะฆีเตอ_ ดัฮ ราฌา ซูกา เดะ ฮาตี_ มีตา บรี กะ ราฌา ปือซัด กะฆีนี_ บรี อาดา ลาฆู ฆาแรฮ ตาโรฮ เดะ ซูรัจ ฮูโกบ นะ ลูมอฮ ปือซียา ฌางัน ลูมอฮ มีเดีย_ บีดา ตีเมา บรี กือนา กาเลฮ อาซิก_ จะ_ วาชะที นะ มาโซะ ซารี ราฌา อาฮาซูเอรัด ปูลัก_ ฮอย เตด บือเลฮ. บรี กะ ราฌา อาเกะ ซือมียา อาซิก_ นู บาฌิ ลือเบฮ เดะ ญา_ มาแรฮ ฌาดี บีนี นะ ราฌา.

²⁰ กะฆีเตอ_ กาลา ปือมือซัด นะ ราฌา_ นะ มือญาเระ ปี ราตา เดะ นังฆรี นะ ญา_ นู บือซัยํ โตระ เตอ_ โกะ ลูมอฮ นีบีนี ราตา_ นะ กือนา มือโอจ กะ ลากี นะ ญา_ เตด จะ_ ซือมียา ซัยํบือซัยํ_ เฆอ จะ_ ซือมียา มิดือมิ.”

²¹ ปือมือเลา บือกีรา ตูโญะ อีนี_ บูวัจ บรี กะ ราฌา ฌางัน โกะ ลูมอฮ ซือมียา ซัยํบือซัยํ ญา_ ซูกา ฮาตี. กะฆีเตอ_ ราฌา ญา บูวัจ ตูโรจ บือกะ ปือมือเลา นู เมมูคาน ญา มือเลา ดัฮ.

²² ราฌา ญา อาตัจ ซูรัจ_ ปี ราตา เดะ โกะ นังฆรี นะ ญา_ รอจ กะ ราตา นังฆรี ฌาดี ซูรัจ บาซา นังฆรี อีตู_ รอจ กะ ราตา บักซา ฌาดี บาซา นะ กูญา ซิกมาซิก_ บรี กะ กีลากี ราตา อูรัก_ ฌาดี กือปาลา เดะ รูมัฮ นะ ญา_ บรี ญา มือเลา ตูโรจ กะ บาซา ปือมือเลา บักซา นะ ญา.