เอเฟซัด 1 - ซูรัจ ปือมือเลา นะ ตูฮัด

¹ กู เปาโล_ นู ฌาดี ปือญูโรฮ นะ เยซู คริด_ ตูโรจ นู ตูฮัด เดะ อาตัซ บือคานะ ดัฮ_ กู ฆาแรฮ ซูรัจ อีนี_ กีเรบ บรี กะ โกะ ซือมียา นะ ตูฮัด เดะ นังฆรี เอเฟซัด นู ฮาตี รือมัก_ ปือจายา กะ เยซู คริด.

² มีตา เดะ ตูฮัด_ อาโปก นะ กีตา_ ฌางัน ตูฮัด เยซู คริด_ นะ บรี ซือลามัจ กะ กาเญา_ นะ บรี กาเญา ดูโดะ ซือนัง ซือลามัจ เลอ.

บือนา บาฌิ นู ตูฮัด บรี กะ ซือมียา นู ลือกัจ ฌางัน เยซู คริด

³ ปูฌี กะ ตูฮัด เดะ อาตัซ_ นู อาโปก นะ เยซู คริด_ ตูฮัด นะ กีตา. ญา เตอ_ บรี ซือลามัจ กะ กีตา ดัฮ_ ซาเบะ กีตา ลือกัจ บือซามา ฌางัน เยซู คริด_ บรี กีตา อาดา โกะ ซือบารัก บาฌิ_ ดาตัก เดะ โซะ อาตัซ ลาแงะ_ ราตา มาจับ. ฌาดี บือนา บาฌิ_ บีดา ฮาตี นะ กีตา เลอ.

⁴ ดูลู นู ตูฮัด เดะ อาตัซ บือฌาดี ดือนียา ดัฮ_ ญา ปีเลฮ กีตา ดัฮ_ ซือรูปา ญา ลีฮัจ กีตา ลือกัจ ฌางัน เยซู คริด. ญา ปีเลฮ กีตา นะ บรี กีตา ฌาดี ซือมียา ฮาตี จรัฮ บาฌิ_ ซือมียา นู ญา ลีฮัจ จะ_ ฮอย ซาลัฮ นามา. ญา ซายัก กีตา

⁵ กีรา ดูลู ดัฮ_ นะ ซูโรฮ เยซู คริด มาแรฮ ตูโลก ตืองะ กีตา_ บรี ฌาดี นานะ ปือฮีโดะ นะ ญา. ญา บูวัจ กะฆีเตอ_ ตูโรจ ลาฆู บาฌิ_ นู ญา บือคานะ เดะ ฮาตี.

⁶ บรี กีตา ปูฌี กะ ตูฮัด. นู ญา บรี ซือลามัจ กะฆีนี_ ฌาดี บือนา บือซรี ซูโงฮ_ นู ญา ฮาลัย บรี กะ กีตา_ บือซามา ฌางัน เยซู นู ญา ซายัก.

⁷ นู เยซู มาตี_ ดารัฮ มือนีแลฮ ดัฮ_ บีดา นะ ตือบุซ กีตา_ บูวัจ บรี กีตา ลือปัซ ดัฮ. ฌาดี จะ_ ดูซา นะ กีตา_ ญา อาเกะ ดัฮ_ บือกะ ลาฆู ซือลามัจ บาญะ ซูโงฮ

⁸ นู ญา ฮาลัย บรี กะ กีตา_ ปือนอฮ มีแม ดัฮ. ตูฮัด เดะ อาตัซ อาดา อากัน_ ปานัย โตระ.

⁹ ญา บรี กีตา ตาฮู ลาฆู ดาลับ ซูโงฮ นู ญา อีงัจ เดะ ดาลับ ฮาตี จะ_ นู ญา อาดา ฮาตี บาฌิ ซูโงฮ_ กะฆีเตอ ญา บือกีรา นะ บูวัจ ลาฆู นามา ฌางัน เยซู.

¹⁰ ตานา รอจ วะตู ปือนอฮ ฮาบิฮ ดัฮ_ ญา อีงัจ จะ_ นะ บือมุน บือซามา บือนา ซือมูฮา_ เดะ โซะ ลาแงะ_ เดะ โซะ ดือนียา โปด_ บรี เยซู คริด ฌาดี กือปาลา_ เดะ บือนา อีตู ซือมูฮา.

¹¹ ตูฮัด เดะ อาตัซ ปีเลฮ กามี ดัฮ_ บรี ฌาดี ลูมอฮ ซือมียา นะ ญา_ ลือกัจ บือซามา ฌางัน เยซู คริด. ฌาดี จะ_ ญา กีรา ดูลู_ นะ ตืองะ กามี_ บือกะ ลาฆู นู ญา อีงัจ เดะ ฮาตี ดัฮ. ญา เลอ_ นู บือกรือฌา บือนา ซือมูฮา_ บรี ฌาดี รือมัก_ ฌางัน ลาฆู นู ญา อีงัจ ดัฮ.

¹² กามี นู บือเลฮ ฮาระ กะ เยซู คริด ดูลู เตอ_ ญา ตืองะ บรี ฌาดี ลูมอฮ ซือมียา_ นู นะ บรี ปูฌี กะ ญา นู บือซรี ซูโงฮ.

¹³ กาเญา ฌูฆา เตอ_ กาลา กาเญา ดืองัยํ ปือมือเลา นู ซูโงฮ อีตู ดัฮ_ ฌาดี บรีตา นู บาฌิ นู บรี กาเญา ฮีโดะ ลือปัซ บาฌิ ดัฮ_ กาเญา ฌูฆา ฌาดี ลูมอฮ ซือมียา นะ ญา_ ลือกัจ บือซามา ฌางัน เยซู เลอ. ตานา ปือจายา กะ เยซู ดัฮ_ ซือรูปา ตูฮัด ตาแปะ มือกรา นะ ญา_ เดะ กาเญา ดัฮ. มือกรา อีตู_ ฌาดี ซือมืองัจ นะ ตูฮัด นู ตูฮัด บือฌาญี นะ บรี กะ กีตา.

¹⁴ ซือมืองัจ อีตู_ ฌาดี_ ซือรูปา รือฆา อูปัฮ ดูลู_ เดะ ปือซากา นะ กีตา_ ตือดะ อารี อีตู_ นู ตูฮัด นะ ตือบุซ กีตา บรี ลือปัซ_ บรี ซาโมจ ปือซากา อีตู_ รือมัก ดัฮ. บรี กีตา ปูฌี กะ ตูฮัด นู บือซรี ซูโงฮ เลอ.

เปาโล บือซาโวจ ลาฆู นะ กูญา

¹⁵ กรานา ลาฆู กะฆีนี_ ตะเดะ กู บือเลฮ ดืองัยํ ดัฮ_ นู กาเญา ปือจายา กะ ตูฮัด เยซู เตอ_ นู กาเญา ซายัก โกะ ซือมียา นะ ตูฮัด ซือมูฮา เตอ_

¹⁶ ตานา กู บือซาโวจ อีงัจ กะ กาเญา_ กู บรี ซือลามัจ กะ ตูฮัด_ เตด บราดู.

¹⁷ กู มีตา เดะ อาโปก นู บือซรี ซูโงฮ_ นู ฌาดี ตูฮัด นะ ตูฮัด เยซู คริด เตอ_ บรี ญา นะ บรี ซือมืองัจ นะ ญา กะ กาเญา_ นู นะ บรี กาเญา อาดา อากัน_ ลีฮัจ ซัฮ เตอ_ บรี กราลา ตูฮัด บาฌิ.

¹⁸ กู มีตา บรี มาตา ฮาตี นะ กาเญา นะ จรัฮ ซูโงฮ_ บรี กาเญา นะ ตาฮู จะ_ ตูฮัด ปาเงน กาเญา_ บรี กาเญา จาดัก นะ บือเลฮ ลาฆู นู บาฌิ เตอ_ นะ ตาฮู จะ_ ตูฮัด อาดา ปือซากา นู บือซรี บาฌิ ซูโงฮ_ บีดา โกะ ซือมียา_ นู ญา ปีเลฮ ดัฮ เตอ

¹⁹ นะ ตาฮู จะ_ ตูฮัด ญา มือฆัฮ โตระ ซูโงฮ_ ลือเบฮ เดะ มานามา_ บีดา กีตา นู ปือจายา เลอ. ลาฆู มือฆัฮ อีตู_ ซือรูปา บือกะ นู ตูฮัด เดะ อาตัซ บือกรือฌา กรัซ ซีดี ซูโงฮ

²⁰ บูวัจ บรี เยซู คริด ฮีโดะ ปาเระ เดะ มาตี ดัฮ_ บรี ญา ดูโดะ โซะ อาตัซ ลาแงะ_ เดะ โซะ ซือบือลัฮ กานัน นะ ตูฮัด เดะ อาตัซ.

²¹ โซะ อีตู_ ญา ดูโดะ ตีงี เดะ อาตัซ โกะ ฌิด_ นู ซัยํบือซัยํ_ นู มือฆัฮ_ ซือมูฮา_ เดะ อาตัซ โกะ ฮาตู กรัซ_ โกะ ดาโตะ กรามัจ ซือมูฮา เลอ. ญา เตอ_ ตีงี เดะ อาตัซ ราตา ปือนามา_ นู กูญา ซือโบจ_ เดะ ฮาดัจ อีนี เตอ_ เดะ ฮาดัจ โซะ ฮือลด ฌูฆา.

²² ตูฮัด เดะ อาตัซ_ บือเลฮ ตืองะ บือนา ซือมูฮา_ บรี อาดา เดะ บาวัฮ ตาปะ กากี นะ เยซู คริด เตอ_ บือเลฮ ตืองะ ญา_ บรี ฌาดี กือปาลา เดะ โกะ มานามา ซือมูฮา_ บีดา ซา ลูมอฮ นะ ตูฮัด.

²³ ซา ลูมอฮ อีตู_ ฌาดี ญาวา นะ เยซู คริด_ ฌาดี ญาวา นู ญา ดูโดะ ปือนอฮ ดัฮ. ญา เลอ_ ดูโดะ ปือนอฮ เดะ บือนา ซือมูฮา_ ราตาๆ.