ซือมียา อาฌัยํ 1 - ซูรัจ ปือมือเลา นะ ตูฮัดลาฆู บือฮีมัจ นะ ซือมียา ตูโดฮ 1 ปือมือเลา นะ ซือมียา ปานัย อาฌัยํ_ นู ฌาดี บือแนฮ นะ ดาวิด_ ราฌา นังฆรี เยรูซาเลม 2 ซือมียา ปานัย อาฌัยํ มือเลา จะ เตด ตือตู_ เตด ตือตู ซูโงฮ เตด ตือตู_ เตด ตือตู ซูโงฮ_ ราตา ฌือแนฮ นู เตด ตือตู 3 อูมัจ ซือมียา บือเลฮ นามา_ เดะ ลาฆู บือกรือฌา โตระ ราตา ฌือแนฮ นะ กูญา นู กูญา กรือฌา โตระ บาวัฮ มาตา อารี เตอ? 4 ซา บือแนฮ บักซา ลือแงะ ปี_ บือแนฮ บักซา นู ซา โปด มาแรฮ ตาปี ดือนียา อาดา ดูโดะ กะฆีเตอ ปี ซือลาลู 5 มาตา อารี ญาแญะ_ มาตา อารี ฆูโฆยํ กะฆีเตอ งูฆางู ปี รอจ กะ ตือปัจ นู ญาแญะ มาแรฮ เตอ 6 อาเงน ตีโยะ ปี กะ โซะ บารัจ ดายา ลีเกาะ ปี กะ โซะ ตารา อาเงน ตีโยะ ปี มาแรฮ กะฆีเตอ ตีโยะ ปาเระ กะ ฌาลัด นะ ญา เลอ. 7 ซูงัย ซือมูฮา มือนีแลฮ ปี กะ ลาโวจ ตาปี ลาโวจ โปด เตด ปือนอฮ อาเย ซูงัย มือนีแลฮ ปี กะ ดีฮา โปด มือนีแลฮ ปี กะ ตือปัจ อีตู ปูลัก. 8 ราตา ฌือแนฮ ญา บรี รือมัย ปี ฮาบิฮ บือกะ ซือมียา ดีฮา โปด_ มือเลา เตด ตรือเบะ. มาตา ญา ลีฮัจ นามา_ เตด กือญัง ตลีงา โปด_ ดืองัยํ ตารา ดีฮา โปด_ เตด ดือละ ฆือนะ. 9 ลาฆู นู บือฌาดี ดัฮ_ ญา นะ บือฌาดี ปูลัก ลาฆู นู บูวัจ ดัฮ_ ญา นะ ฆาโดฮ บูวัจ ปูลัก ฮอย บารัก นามา บารู เดะ บาวัฮ มาตา อารี. 10 อาดา ซา ฌือแนฮ เฆอ_ นู ซาปา นะ มือเลา บือเลฮ จะ “ลีฮัจ เลอ_ ซือบารัก อีนี บารู”? ซือบารัก อีตู อาดา ดัฮ ดูลู เดะ ฮาดัจ นะ กีตา ซือมูฮา 11 ฮอย ซาปา จับ โกะ ซือมียา ฮาดัจ กาลา ดูลู ฮอย ซาปา นะ จับ โกะ ซือมียา ฮาดัจ เดะ บลากัก_ นู นะ บือฌาดี มาแรฮ โกะ ซือมียา ดีฮา_ นู นะ มาแรฮ เดะ บลากัก_ นะ จับ กูญา เลอ. ลาฆู เตด ตือตู นะ ลาฆู มือโซะ ซารี อากัน 12 กู ซือมียา ปานัย อาฌัยํ_ ดือละ ฌาดี ราฌา นะ ลูมอฮ อิซราเอน_ เดะ นังฆรี เยรูซาเลม. 13 กู ตือตู ฮาตี มือโซะ ซารี_ ฌางัน ลาฆู อากัน_ ลาฆู ซือมูฮา นู บูวัจ เดะ บาวัฮ ลาแงะ. ฌาดี ลาฆู ซูซัฮ ปายัฮ_ นู ตูฮัด บรี กะ อูมัจ ซือมียา ฆาโดฮ บูวัจ เตอ. 14 กู ดือละ ลีฮัจ ลาฆู บือกรือฌา ซือมูฮา_ นู กูญา บูวัจ เตอ_ เดะ บาวัฮ มาตา อารี. ลีฮัจ เลอ_ ราตา ฌือแนฮ ญา เตด ตือตู_ ฌาดี จะ_ ฮอย นามา มากัด อาดา ซา อาเงน. 15 นามา นู ปีเกาะ นะ บูวัจ บรี รือมัก เตด บือเลฮ นามา นู ปูตุซ นะ กีรา บรี ฆือนะ เตด บือเลฮ. 16 กู บือซูงุจ เดะ ฮาตี จะ_ “ลีฮัจ เลอ_ กู อาดา ลาฆู ปานัย อากัน บาญะ โตระ_ บาญะ ลือเบฮ เดะ ปาซาปา_ นู ปือบือลา นังฆรี เยรูซาเลม ดูลู เดะ กู. ฮาตี นะ กู โปด_ ปานัย เดะ ลาฆู อากัน ฌางัน ลาฆู ตาฮู ซูโงฮ.” 17 กู ตือตู ฮาตี มาโซะ ฮาตี ตาฮู ลาฆู ปานัย อากัน_ มาโซะ ฮาตี ลาฆู ลัฮบือลัฮ ฌางัน ลาฆู บูดอ ฌูฆา. กู มือรูมะ ดาปัจ จะ_ ลาฆู อีนี โปด_ ฌาดี ลาฆู ฮอย นามา มากัด ซา อาเงน ฌูฆา. 18 ซาเบะ เดะ ลาฆู ปานัย อากัน บาญะ_ อาดา ลาฆู ซูซัฮ ฮาตี โตระ ซือมียา นู บือตามัฮ ลาฆู ปานัย_ นะ บือตามัฮ ลาฆู เตด ซือนัง ฮาตี. |