ปือมือเลา ฮูโกบ 1 - ซูรัจ ปือมือเลา นะ ตูฮัดมูซา ปรีงัจ กะ ลาฆู นู บือฌาดี ดัฮ_ เดะ บูเกะ โฮเรบ 1 ลาฆู อีนี ฌาดี ปือมือเลา นู มูซา มือเลา_ ฌางัน ลูมอฮ อิซราเอน ซือมูฮา_ เดะ ตือปัจ ตานัฮ ตูโฮยํ นู ลือฆา_ เดะ ซรือบัก ตีมอยํ ซูงัย จอแดน_ ฌาดี จะ_ เดะ ตือปัจ ซามา อาราบา_ โซะ ฮือลด ซูฟะ_ จือลัฮ ปาราน_ ฌางัน โทเฟน_ ลาบัน ฮาเซโรด_ ฌางัน ดีซาฮับ. 2 ฌาลัด ตะเดะ โฮเรบ_ ตูโรจ บีดิก บูเกะ เซอีระ_ ฌู รอจ กะ คาเดด-บาระเนีย เตอ_ ฌาดี ฌาลัด นู ฆาโดฮ นะ บือฌาลัด ซือบือลัซ (11) อารี. 3 เดะ อารี ซา_ บูลัด ซือบือลัซ (11)_ ตาโฮด นู ปัจ ปูโลฮ (40)_ มูซา บือเลฮ มือเลา ฌางัน ลูมอฮ อิซราเอน_ ตูโรจ กะ ปือมือซัด นู ตูฮัด บือซัยํ เดะ อาตัซ ปือซัด ญา_ บรี มือญาเระ กะ กูญา อีตู. 4 ลือปัซ เดะ นู ญา ฌือนัฮ เดะ ซีโฮน_ ราฌา นะ ลูมอฮ อาโมรี_ นู ดูโดะ เดะ นังฆรี เฮชะโบน_ ฌางัน โอก_ ราฌา นังฆรี บาซาน_ นู ดูโดะ เดะ อัดซะทาโรด_ เดะ ตูโปะ เอดเรอี ดัฮ เตอ. 5 มูซา ฮืนตะ นะ มือญาเระ ฮาดัจ ฮูโกบ อีนี_ เดะ นังฆรี โมอับ_ โซะ ซรือบัก ตีมอยํ นะ ซูงัย จอแดน_ จะ_ 6 “ตูฮัด บือซัยํ เดะ อาตัซ_ ตูฮัด นะ กีตา_ บือเลฮ มือเลา ปือซัด กีตา_ เดะ บูเกะ โฮเรบ_ จะ_ ‘กาเญา บือเลฮ บราดู รือมัย_ เดะ บูเกะ อีนี_ ลามา ดัฮ. 7 กือนา อาเลฮ_ บือฌาลัด ตูโรจ ปี_ กะ ฌาลัด นู นะ ปี กะ โซะ บูเกะ_ นะ ลูมอฮ อาโมรี_ นู ดาปิก ฌางัน ตือปัจ ซามา อาราบา_ เดะ โซะ อาตัซ บูเกะ_ เดะ โซะ ตานัฮ รือนัฮ_ ฌางัน โซะ ตือปัจ เดะ เนเกบ_ ฌางัน เดะ โซะ บีดิก ลาโวจ_ ฌาดี นังฆรี คานาอัน_ ฌางัน เลบานอน_ ฌู รอจ กะ ซูงัย บือซัยํ_ ฌาดี ซูงัย ยูเฟรติด. 8 ลีฮัจ เลอ_ กู ตืองะ นังฆรี อีตู ดัฮ_ โซะ ฮือลด กาเญา. กือนา มาโซะ ปี_ ราปัซ นังฆรี นู กู บือเลฮ อาเกะ มือเลา_ ฌางัน โกะ บีลาแก นะ กาเญา_ ฌาดี อับราฮัม_ อีซัก_ ฌางัน ยาโกบ_ จะ_ นะ บรี กะ กูญา ฌางัน ปาลัฮ บือแนฮ บักซา นะ กูญา_ นู ตูโรจ มาแรฮ ฌูฆา.’ นะ อาเกะ ตืองะ กือปาลา ปาลัฮ ( บราเกะ ลารี 18.13-27 ) 9 “วะตู อีตู_ กู มือญาเระ กะ กาเญา ดัฮ_ จะ_ ‘กู ซืออูรัก_ ตาโงก ลูมอฮ กาเญา_ เตด บียัซ. 10 ตูฮัด บือซัยํ เดะ อาตัซ_ ตูฮัด นะ กาเญา_ บือเลฮ บูวัจ บรี กาเญา บาญะ ซือรูโลยํ. ลีฮัจ เลอ_ บีลัก อารี อีนี_ ลูมอฮ กาเญา อาดา บาญะ_ บือกะ โกะ บีตัก เดะ ลาแงะ. 11 มีตา ตูฮัด บือซัยํ เดะ อาตัซ_ ตูฮัด นะ โกะ บีลาแก นะ กาเญา_ บูวัจ บรี กาเญา บือตามัฮ บาญะ_ บือรีบู-รีบู กาลี. มีตา บรี ญา นะ บรี ซือลามัจ กะ กาเญา_ บือกะ ญา บือเลฮ บือฌาญี ฌางัน กาเญา ดัฮ เลอ. 12 กู ซืออูรัก_ นะ ตาโงก ลาฆู บรัจ_ ดาตัก เดะ ลาฆู ปายัฮ_ ลาฆู บือตือฆัฮ นะ กาเญา_ บือเลฮ กะฮามี? 13 กือนา ปีเลฮ ซือมียา นู อาดา อากัน_ มาโซะ เดะ ฮาตี บือเลฮ_ ดาตัก เดะ โกะ ปาลัฮ นะ กาเญา_ ฌาดี ซือมียา นู กูญา บือกราลา. กู นะ อาเกะ ตืองะ กูญา_ บรี ฌาดี กือปาลา นะ กาเญา.’ 14 กาเญา บือเลฮ ตีกัฮ กะ กู_ จะ_ ‘ลาฆู นู เกา มือเลา เตอ_ บาฌิ ดัฮ_ บือฆูนา นู กามี นะ บูวัจ.’ 15 กะฆีเตอ_ กู ปีเลฮ กือปาลา เดะ ราตา ปาลัฮ_ นู ฌาดี ซือมียา ปานัย อากัน_ ซือมียา บือกราลา บาฌิ_ อาเกะ ตืองะ บรี ฌาดี กือปาลา_ อาตัซ กาเญา_ บรี ฌาดี ซือมียา ปือบือลา ซือมียา ซือรีบู (1,000) อูรัก ซือตืองัฮ_ ซือราตุซ (100) อูรัก ซือตืองัฮ_ ลีมา ปูโลฮ (50) อูรัก ซือตืองัฮ_ ซือปูโลฮ (10) อูรัก ซือตืองัฮ_ ฌางัน โกะ ซือมียา บือกรือฌา แนฮฌือแนฮ_ เดะ โกะ ปาลัฮ นะ กาเญา. 16 วะตู อีตู_ กู บือเลฮ มือเลา กือมัซๆ_ ฌางัน โกะ ซือมียา กรัจ ฮูโกบ นะ กาเญา_ จะ_ ‘กือนา บือฮีมัจ ลาฆู บือดะวา_ นะ โกะ อาดีบราดี นะ กาเญา. กรัจ ฮูโกบ บรี บาฌิ ตือปัจ_ เดะ ลาฆู บือดะวา_ นะ ซืออูรัก ฌางัน โกะ นะบรานะ นะ ญา_ เฆอ จะ_ ฌางัน ซือมียา บักซา อาซิก_ นู ดูโดะ ฌางัน ญา. 17 ฌางัน มาโซะ ลัฮบือลัฮ_ เดะ ลาฆู กรัจ ฮูโกบ. กือนา มือนีงัย กะ ซือมียา มิดือมิ_ ฌางัน ซือมียา ซัยํบือซัยํ_ บรี ซามา บายา. ฌางัน ตาโกจ มูคา นะ อูมัจ ซือมียา เลอ_ ซาเบะ ลาฆู กรัจ ฮูโกบ เตอ_ ฌาดี ลาฆู นะ ตูฮัด. ลาฆู บือดะวา นู ปายัฮ_ กือนา บาวา มาแรฮ บรี กะ กู. กู นะ บือฮีมัจ ตะอาซิก.’ 18 วะตู อีตู_ กู บือเลฮ ปือซัด กาเญา_ ปาซัน ลาฆู ราตา ฌือแนฮ_ นู กาเญา บือฆูนา นะ บูวัจ. อิซราเอน กีปัซ นู นะ มาโซะ นังฆรี คานาอัน ( กีรา 13.1-33 ) 19 “กีตา ตีงัน บูเกะ โฮเรบ_ บือฌาลัด ลาลู เดะ ตือปัจ ตานัฮ ตูโฮยํ นู ลือฆา โตระ_ นู ฌาดี ตือปัจ บราซา ตาโกจ_ บือกะ นู กาเญา บือเลฮ ลีฮัจ เตอ. กีตา บือฌาลัด ตูโรจ บีดิก บูเกะ นะ ลูมอฮ อาโมรี_ บือกะ นู ตูฮัด บือซัยํ เดะ อาตัซ_ ตูฮัด นะ กีตา_ ปือซัด ดัฮ. กีตา มาแรฮ รอจ กะ คาเดด-บาระเนีย. 20 กู บือเลฮ มือเลา ฌางัน กาเญา_ จะ_ ‘กาเญา มาแรฮ รอจ โกะ บูเกะ นะ ลูมอฮ อาโมรี ดัฮ_ ฌาดี ตือปัจ นู ตูฮัด บือซัยํ เดะ อาตัซ_ ตูฮัด นะ กีตา_ ตืองัฮ ซรัฮ บรี กะ กีตา. 21 ลีฮัจ เลอ_ ตูฮัด บือซัยํ เดะ อาตัซ_ ตูฮัด นะ กาเญา_ บือเลฮ ตืองะ ตือปัจ ตานัฮ อีตู_ โซะ ฮือลด มูคา นะ กาเญา ดัฮ. กือนา ปี ราปัซ ตือปัจ อีตู_ บือกะ นู ตูฮัด บือซัยํ เดะ อาตัซ_ ตูฮัด นะ โกะ บีลาแก นะ กาเญา_ มือญาเระ ฌางัน กาเญา ดัฮ. ฌางัน นะ ตาโกจ เลอ. ฌางัน ตือกือฌุจ เลอ.’ 22 กะฆีเตอ_ กาเญา ราตา อูรัก_ มาโซะ มาแรฮ ดาปิก กู ดัฮ_ มือเลา จะ_ ‘บรี กีตา ซูโรฮ ซือมียา ปี_ ดูลู เดะ กีตา_ มือญาซัจ ลีฮัจ ตือปัจ อีตู_ ฆาตี กีตา_ บาวา บรีตา ปาซัน ฌาลัด อีตู_ นู กีตา ฆาโดฮ นะ ญาแญะ ปี_ ปาซัน นังฆรี นู กีตา นะ ปี เตอ_ มาแรฮ มือญาเระ กะ กีตา ปูลัก.’ 23 ลาฆู อีนี_ กู ลีฮัจ จะ_ บาฌิ ฌูฆา. กู ปีเลฮ ซือมียา_ ดูวา บือลัซ (12) อูรัก_ มาแรฮ ดาตัก เดะ ลูมอฮ กาเญา_ ซือปาลัฮ ซา อูรัก. 24 กะฆีเตอ_ โกะ ซือมียา อีตู_ บราเลฮ ญาแญะ ปี_ กะ อาตัซ ตือปัจ บูเกะ_ มาแรฮ รอจ กะ จือลัฮ บูเกะ_ ปือนามา เอซะโคน_ มือญาซัจ ลีฮัจ เดะ ตือปัจ อีตู. 25 กูญา มูงอจ โกะ บูวัฮ_ เดะ ตือปัจ ตานัฮ อีตู_ บาวา มาแรฮ บรี กะ กีตา. กูญา บาวา บรีตา มาแรฮ_ มือญาเระ กะ กีตา_ จะ_ ‘เดะ ตือปัจ นู ตูฮัด บือซัยํ เดะ อาตัซ_ ตูฮัด นะ กีตา_ ตืองัฮ อาเกะ บรี กะ กีตา เตอ_ ฌาดี ตือปัจ นู บาฌิ.’ 26 “ตาปี กาเญา โปด_ ตีเมา ญาแญะ ปี_ อาเลฮ บือลาวัด ฌางัน ปือมือซัด นะ ตูฮัด บือซัยํ เดะ อาตัซ_ ตูฮัด นะ กาเญา. 27 กาเญา บือซูงุจ_ เดะ รูมัฮ ซาเราะ นะ กาเญา_ มือเลา จะ_ ‘ซาเบะ ตูฮัด บือชี กะ กีตา_ ญา บาวา กีตา_ ตรือเบะ เดะ นังฆรี อียิบ_ บีดา นะ ซรัฮ กีตา_ บรี กะ ลูมอฮ อาโมรี_ บีดา นะ บูวัจ บรี กีตา ฌาฮานัม เลอ. 28 กีตา นะ ญาแญะ ปี กะ ดีฮา เลอ? โกะ ลูมอฮ นะบรานะ นะ กีตา_ บือเลฮ บูวัจ บรี ฮาตี นะ กีตา บรูบัฮ_ มือเลา จะ “โกะ ซือมียา อีตู_ ซัยํบือซัยํ_ ตีงี_ ลือเบฮ เดะ กีตา ลาฆี. โกะ นังฆรี อีตู โปด_ บือซัยํ_ อาดา ดีนิง ตีงี โตระ. ลือเบฮ เดะ อีตู_ กามี บือเลฮ ลีฮัจ โกะ ลูมอฮ นะ อานาก_ เดะ ตือปัจ อีตู ฌูฆา.” ’ 29 กะฆีเตอ กู มือเลา ฌางัน กาเญา จะ_ ‘ฌางัน บรีงัจ ตาโกจ_ เดะ ลูมอฮ กูญา เลอ. 30 ตูฮัด บือซัยํ เดะ อาตัซ_ ตูฮัด นะ กาเญา_ ญา อาดา บือฌาลัด โซะ ฮือลด กาเญา_ นะ บือลาวัด บีดา กาเญา_ บือกะ นู ญา บือเลฮ บูวัจ บีดา กาเญา_ เดะ นังฆรี อียิบ_ โซะ ฮือลด มูคา นะ กาเญา. 31 ญา บือเลฮ บูวัจ กะฆีเตอ ฌูฆา_ เดะ ตือปัจ ตานัฮ ตูโฮยํ นู ลือฆา_ ตือปัจ นู กาเญา นะ บือเลฮ ลีฮัจ ดัฮ จะ_ ตูฮัด บือซัยํ เดะ อาตัซ_ ตูฮัด นะ กาเญา_ ญา อาเกะ ฌูโญก กาเญา_ บือกะ ปะ ญา ฮือแนก นานะ นะ ญา_ ฮาบิฮ ฌาลัด นู กาเญา ปี เตอ_ ฌู ตือดะ กาเญา มาแรฮ รอจ กะ ตือปัจ อีนี.’ 32 ตาปี กะฮามี โปด_ กาเญา เตด บือเลฮ ปือจายา กะ ตูฮัด บือซัยํ เดะ อาตัซ_ ตูฮัด นะ กาเญา. 33 ญา เตอ_ นู บือฌาลัด โซะ ฮือลด กาเญา_ บีดา นะ ซารี ตือปัจ บรี จาจะ รูมัฮ ซาเราะ นะ กาเญา_ ฌาดี อาปี เดะ วะตู มาลับ_ ฌาดี กือมูวัง เดะ วะตู ซียัก_ บีดา นะ ปลีฮัจ บรี กาเญา ลีฮัจ_ ฌาลัด นู บือฆูนา นะ ปี. ตูฮัด กรัจ ฮูโกบ_ กรานา อิซราเอน บูวัจ กือบลากัก ( กีรา 14.20-35 ) 34 “ตูฮัด บือซัยํ เดะ อาตัซ_ ญา บือเลฮ ดืองัยํ ซือวารา มือเลา นะ กาเญา. ญา มูซัยํ โตระ_ อาเกะ มือเลา จะ 35 ‘โงฮซูโงฮ_ นะ ฮอย ซาปา ซืออูรัก_ เดะ บือแนฮ บักซา นู ฌาฮัจ อีนี_ นู นะ บือเลฮ ลีฮัจ ตือปัจ ตานัฮ นู บาฌิ อีตู_ นู กู บือเลฮ บือฌาญี ดัฮ_ จะ_ นะ บรี กะ โกะ บีลาแก นะ กาเญา_ 36 ลือเบฮ ซา คาเลบ_ นานะ นะ เยฟุนเนฮ. ญา เลอ_ ลีฮัจ ตือปัจ ตานัฮ อีตู ดัฮ. กะฆีเตอ_ กู นะ บรี ตือปัจ นู ญา บือเลฮ กาจะ อีตู_ กะ ญา_ ฌางัน โกะ อานะ จูจู นะ ญา_ ซาเบะ ญา บือเลฮ ตูโรจ กะ ตูฮัด บือซัยํ เดะ อาตัซ_ ปือนอฮ เดะ ฮาตี เลอ.’ 37 กรานา กาเญา เตอ_ ตูฮัด มูซัยํ กะ กู ฌูฆา_ มือเลา จะ_ ‘เกา ฌูฆา_ นะ เตด บือเลฮ มาโซะ ปี เดะ ตือปัจ อีตู. 38 โยซูวา_ นานะ นะ นูน_ นู อาดา บือดีรี โซะ ฮือลด เกา_ ญา เลอ_ นะ มาโซะ ปี. กือนา อาโซฮ ฮาตี นะ ญา ฌูฆา_ ซาเบะ ญา นะ บาวา ลูมอฮ อิซราเอน_ ปี อาเมด ตือปัจ ตานัฮ อีตู_ ฌาดี ปือซากา นะ กูญา. 39 ลือเบฮ เดะ อีตู_ โซะ โกะ นานะ ดือมิ นะ ลูมอฮ กาเญา_ นู กาเญา มือเลา จะ_ นะ กือนา ซามุน บือปี เตอ_ ฌางัน โกะ นานะ นะ ลูมอฮ กาเญา_ เดะ อารี อีนี_ ซือมียา เตด ตาฮู ซาลัฮ กือนา_ กูญา เตอ_ นะ บือเลฮ มาโซะ เดะ ตือปัจ อีตู. กู นะ บรี ตือปัจ ตานัฮ อีตู_ กะ ลูมอฮ กูญา. กูญา นะ ราปัซ_ ปือบือลา_ ดูโดะ เดะ ตือปัจ อีตู. 40 ตาปี โซะ กาเญา_ กือนา บือฌาลัด มาโซะ กะ ตือปัจ ตานัฮ ตูโฮยํ นู ลือฆา_ ตูโรจ กะ ฌาลัด นู นะ ปี กะ ลาโวจ มีรัฮ เลอ.’ 41 “กะฆีเตอ_ กาเญา ตีกัฮ กะ กู จะ ‘กามี บูวัจ ดูซา กะ ตูฮัด บือซัยํ เดะ อาตัซ ดัฮ. กามี เลอ_ นะ ญาแญะ ปี_ บือลาวัด บือปรัก_ ตูโรจ กะ ปือมือซัด นะ ตูฮัด บือซัยํ เดะ อาตัซ_ ตูฮัด นะ กามี.’ กะฆีเตอ_ กาเญา บือเลฮ ซือและ ซือนาตา_ ซียะ ตาโรฮ ดัฮ_ ราตา อูรัก_ บรีงัจ จะ_ นู นะ ญาแญะ ปี กะ อาตัซ ตือปัจ บูเกะ อีตู_ ญา นะ ซือนัง เลอ. 42 ตูฮัด บือซัยํ เดะ อาตัซ_ มือเลา ฌางัน กู_ จะ_ ‘กือนา มือญาเระ กะ กูญา อีตู จะ_ ฌางัน ญาแญะ ปี บือลาวัด บือปรัก เลอ_ ตาโกจ จะ_ กาเญา นะ อาลัฮ เดะ โกะ ซือตรู_ ซาเบะ กู เตด ดูโดะ_ เดะ ซามา ตืองัฮ กาเญา.’ 43 กะฆีเตอ_ กู มือเลา ฌางัน กาเญา ดัฮ_ ตาปี กาเญา ฮอย เตด มือนีงัย_ ตาปี ลาวัด ปือมือซัด นะ ตูฮัด_ อาดา ฮาตี บรานี_ ญาแญะ ปี กะ อาตัซ ตือปัจ บูเกะ อีตู. 44 กะฆีเตอ_ ลูมอฮ ซือมียา อาโมรี_ นู ดูโดะ เดะ ตือปัจ บูเกะ อีตู_ กูญา ตรือเบะ มาแรฮ บือลาวัด_ อูเซ กาเตาะ กาเญา_ บือกะ กาวัด มาทู อูเซ ซือมียา_ บูนอฮ กาเญา ตะเดะ ตูโปะ เซอีระ_ ฌู รอจ กะ โฮระมัฮ. 45 กาเญา บาลิ มาแรฮ_ มือนาแงฮ โซะ ฮือลด ตูฮัด บือซัยํ เดะ อาตัซ_ ตาปี ญา เตด บือเลฮ ดืองัยํ ซือวารา มือนาแงฮ_ เฆอ จะ_ จีเฮะ ตลีงา มือนีงัย กะ กาเญา. 46 กะฆีเตอ กาเญา โปด_ ดูโดะ เดะ คาเดด_ บาญะ อารี_ ฌาดี โกะ อารี นู กาเญา บือเลฮ ดูโดะ เตอ. |