ดาเนียน 1 - ซูรัจ ปือมือเลา นะ ตูฮัดลาฆู บลาฌัยํ นะ ดาเนียน ฌางัน ซาบัจ ญา 1 เดะ ตาโฮด นู ตีฆา_ ฮาดัจ นะ เยโฮยาคิม_ ราฌา นังฆรี ยูดา เตอ_ เนบูคัดเนดซา_ ราฌา นังฆรี บาบีโลน_ มาแรฮ กะ นังฆรี เยรูซาเลม_ ซูโรฮ โกะ ตาฮัน ฌาฆา กือลีลิก นังฆรี อีตู. 2 ตูฮัด ญา ซรัฮ เยโฮยาคิม_ ราฌา นังฆรี ยูดา_ บรี อาดา เดะ บาวัฮ ฮูโกบ นะ ญา_ ฆือนะ ฌางัน โกะ กลือกะ นะ ซูโรฮ ซือตืองัฮ เดะ รูมัฮ มือญือมัฮ นะ ตูฮัด. ญา บาวา โกะ กลือกะ อีตู_ มาแรฮ กะ นังฆรี บาบีโลน_ มาแรฮ กะ รูมัฮ มือญือมัฮ ดาโตะ นะ ญา_ ปือมาโซะ ตาโรฮ โกะ กลือกะ อีตู_ เดะ รูมัฮ ตาโรฮ โกะ ซือบารัก นะ ดาโตะ นะ ญา. 3 กะฆีเตอ_ ราฌา อีตู_ ญา ซูโรฮ อัดชะเปนัด_ กือปาลา ปราโซฮ นะ ญา_ บรี บาวา ลูมอฮ อิซราเอน ซือตืองัฮ_ ฌาดี บือแนฮ นะ ราฌา ฌางัน บือแนฮ นะ ซือมียา ซัยํบือซัยํ 4 ฌาดี อูรัก มูดา นู ฮอย ปะออย_ นู ญาวา บือฆาจะ_ อาดา ลาฆู ปานัย อากัน_ อาดา ฌางัน ลาฆู นู ตาฮู มาโซะ ฮาตี เดะ ลาฆู ซือมูฮา_ ฆือนะ เดะ ลาฆู ปานัย นะ บือกรือฌา เดะ รูมัฮ นะ ราฌา. อัดชะเปนัด เตอ_ กือนา อาฌัยํ โกะ ลาฆู ซูรัจ_ ฌางัน ปือมือเลา นะ ลูมอฮ บาบีโลน_ บรี กะ กูญา ซือมูฮา. 5 ราฌา ญา ซูโรฮ บาวา โกะ นาซี ฌางัน อาระ อางุน_ บือกะ นู ราฌา โอะ มากัด_ บรี กะ กูญา อีตู_ ตูโรจ บือกะ วะตู บีลัก อารี. ญา ซูโรฮ บรี อาฌัยํ ปือบือลา กูญา_ ตีฆา ตาโฮด. กาลา ฆือนะ วะตู อีตู ดัฮ_ ญา บรี กะ กูญา มาโซะ ปี บือกรือฌา กะ ลูวัก เลอ. 6 เดะ ลูมอฮ อูรัก มูดา อีตู อาดา ซือมียา ปาลัฮ นะ ยูดา เตอ_ ฌาดี จะ_ ดาเนียน_ ฮานันยา_ มิชาเอน_ ฌางัน อาซารียา. 7 กือปาลา ปราโซฮ ตืองะ ปือนามา นู บารู_ บรี กะ กูญา. ดาเนียน_ ญา บรี บลาโลก จะ_ เบนเทชะซา_ ฮานันยา บลาโลก ปือนามา อาซิก ฌูฆา จะ_ ชัดรัก_ มิชาเอน ฌูฆา อาดา ปือนามา อาซิก จะ_ เมชัก_ อาซารียา บลาโลก ปือนามา อาซิก ฌูฆา จะ_ อาเบดเนโฆ. 8 ตาปี ดาเนียน_ ญา ตือตู ฮาตี จะ_ นะ ฮอย เตด บูวัจ บรี ญาวา นะ ญา ตะอารัฮ_ กรานา นาซี นู บาฌิ โตระ นะ ราฌา_ เฆอ จะ_ กรานา อาระ อางุน นู ราฌา โอะ. กะฆีเตอ_ ญา มีตา เดะ กือปาลา ปราโซฮ_ บรี กะ ญา นะ ฮอย เตด บูวัจ บรี ญาวา อาดา ลาฆู ตะอารัฮ. 9 ตูฮัด บรี กะ กือปาลา ปราโซฮ_ ซูกา อาดา ตือจีฮัด กะ ดาเนียน. 10 กะฆีเตอ_ กือปาลา ปราโซฮ มือเลา กะ ดาเนียน จะ_ “กู ตาโกจ เดะ ราฌา_ กือปาลา นะ กู_ นู บรี นาซี ฌางัน โกะ ซือบารัก โอะ กะ กาเญา. ดัฮ ญา ลีฮัจ จะ_ ลูมอฮ กาเญา มูคา ปูจัจ_ ลือเบฮ เดะ โกะ ลูมอฮ อูรัก มูดา_ นู อาดา อูมอยํ ซามา บายา_ กาเญา นะ บูวัจ บรี ญาวา นะ กู_ กือนา ลาฆู ฌาฮานัม_ กรานา ราฌา เลอ.” 11 กะฆีเตอ_ ดาเนียน มือเลา ฌางัน ตาฮัน_ นู กือปาลา ปราโซฮ บรี ฮัจลีฮัจ ดาเนียน_ ฮานันยา_ มิชาเอน_ ฌางัน อาซารียา_ 12 มือเลา จะ_ “บรี เกา ลกลีฮัจ ปือญูโรฮ นะ เกา ซือปูโลฮ อารี. บรี กูญา บาวา ตาโระ มาแรฮ บรี กามี มากัด_ บาวา อาเย ฌูฆา บรี กามี โอะ เลอ. 13 กะฆีเตอ_ บรี เกา มือญาซัจ ลีฮัจ_ โกะ มูคา มาตา นะ กามี ซือมูฮา_ ปือซามา ฌางัน มูคา มาตา นะ โกะ อูรัก มูดา นู มากัด นาซี นู บาฌิ โตระ นะ ราฌา. กาลา เกา ลีฮัจ กะฮามี เตอ_ บรี เกา บูวัจ กะ ปือญูโรฮ นะ เกา บือกะฆีเตอ เลอ.” 14 ญา โปด_ ยอม บรี ฌาดี กะฆีเตอ_ ลกลีฮัจ กูญา ซือปูโลฮ อารี. 15 กาลา รอจ ซือปูโลฮ อารี ดัฮ_ กูญา ลีฮัจ จะ_ โกะ ซือมียา อีตู มูคา มาตา บือฆาจะ_ ญาวา นะ กูญา โปด_ ลือมะ_ ลือเบฮ เดะ โกะ อูรัก มูดา นู มากัด นาซี นู บาฌิ โตระ นะ ราฌา. 16 กะฆีเตอ_ กือปาลา ตาฮัน อีตู_ ญา อาเมด นาซี นู บาฌิ_ ฌางัน อาระ อางุน นู กูญา บือฆูนา นะ บือเลฮ โอะ_ รีบัย บรี โกะ ตาโระ กะ กูญา. 17 โซะ อูรัก มูดา_ ปัจ อูรัก อีนี_ ตูฮัด บรี กูญา อาดา ลาฆู ปานัย อากัน_ บรี กูญา ปานัย เดะ ลาฆู ซูรัจ ซือมูฮา. ดาเนียน_ ญา มาโซะ ฮาตี เดะ ลาฆู มีปี ซือมูฮา เลอ. 18 กาลา ฮาบิฮ วะตู อีตู_ นู ราฌา ซูโรฮ บาวา กูญา ซือมูฮา มาโซะ ซารี ราฌา_ กือปาลา ปราโซฮ บาวา กูญา มาโซะ ซารี เนบูคัดเนดซา. 19 ราฌา เตอ_ ญา มือเลา ฌางัน กูญา. เดะ กาวัด อูรัก มูดา อีตู_ ฮอย ซาปา ซืออูรัก นู ซือรูปา กะ ดาเนียน_ ฮานันยา_ มิชาเอน_ ฌางัน อาซารียา. กะฆีเตอ_ กูญา บือเลฮ มาโซะ บือกรือฌา กะ ลูวัก. 20 เดะ ปาซัน ลาฆู ปานัย อากัน_ ฌางัน ลาฆู ตาฮู_ นู ราฌา ตาญา กูญา_ ญา ลีฮัจ จะ_ ลูมอฮ กูญา บาฌิ เดะ โกะ ลูมอฮ ซือมียา ตูโดฮ_ ฌางัน ลูมอฮ บูมอยํ ลีฮัจ โฆรฮ_ นู อาดา เดะ นังฆรี นะ ราฌา ซือมูฮา. 21 ดาเนียน เตอ_ ญา อาดา บือกรือฌา มาแรฮ ซือรูโลยํ_ ฌู รอจ กะ ฮาดัจ นะ ราฌา ซัยรัด. |