อาโมด 1 - ซูรัจ ปือมือเลา นะ ตูฮัด1 ปือมือเลา นะ อาโมด_ ซือมียา ซืออูรัก เดะ ลูมอฮ ปือบือลา กาเมก_ เดะ นังฆรี เทโคอา. ฌาดี ลาฆู นู ญา บือเลฮ ลีฮัจ_ ปาซัน ลูมอฮ อิซราเอน_ เดะ ฮาดัจ นะ อุดซียา_ ราฌา นังฆรี ยูดา_ ฌางัน ฮาดัจ นะ เยโรโบอัม_ นานะ นะ โยอาด_ ราฌา นังฆรี อิซราเอน_ ดูลู เดะ วะตู ดือนียา บรีเงาะ ดูวา ตาโฮด. ลาฆู กรัจ ฮูโกบ ลูมอฮ บักซา ซือมูฮา กาวัด รูมัฮ นะ อิซราเอน 2 อาโมด มือเลา จะ “ตูฮัด บือซัยํ เดะ อาตัซ มือรียัน ซือวารา บือซัยํ บือกะ ซีงา ดาตัก เดะ บูเกะ ซีโยน ญา บือซูระ ดาตัก เดะ นังฆรี เยรูซาเลม. โกะ ปาดัก รูโปจ นะ ซือมียา ปือบือลา กาเมก โปด_ ตูโฮยํ จีรอจ ฮูโฌก บูเกะ คาระเมน โปด_ ลายู ฮาบิฮ ดัฮ.” 3 ตูฮัด บือซัยํ เดะ อาตัซ มือเลา กะฆีนี จะ “ซาเบะ ลาฆู บูวัจ กือลือเบฮ นะ นังฆรี ดามัดกัด นู บูวัจ ซัจ ๆ เตด บราดู กู นะ เตด บราเลฮ เดะ ลาฆู กาเตาะ อาฌัยํ. ซาเบะ กูญา บือเลฮ กือปิ ลูมอฮ กิเลอาด ฌางัน แระฆีแระ บือซี บีดา กาจะ ปาดี เลอ. 4 กะฆีเตอ_ กู นะ บูวัจ บรี อาปี ฆูโฆยํ เดะ อาตัซ รูมัฮ นะ ราฌา ฮาซาเอน. อาปี อีตู นะ บลือกัจ ราตา เดะ รูมัฮ ฌาฆา บือปรัก นะ ราฌา เบนฮาดัด เลอ. 5 กู นะ บูวัจ บรี ปืองาจิก ปีตู นังฆรี ดามัดกัด รูโตฮ กู นะ บรี โกะ ลูมอฮ ซือมียา เดะ นังฆรี ปือจัฮ บือลัฮ ปี ตรือเบะ เดะ จือลัฮ บูเกะ อาเวน ซือมียา นู ปือฆัก ตูกัจ นะ ราฌา นะ กือนา กรัจ ตรือเบะ เดะ เบด-เอเดน โกะ ลูมอฮ ซีเรีย นะ ฆาโดฮ กือนา กีปัซ ปี ฌาดี ปราโซฮ เดะ นังฆรี คีระ.” ตูฮัด บือซัยํ เดะ อาตัซ ญา มือเลา กะฆีนี เลอ. 6 ตูฮัด บือซัยํ เดะ อาตัซ ญา มือเลา กะฆีนี จะ “ซาเบะ ลาฆู บูวัจ กือลือเบฮ นะ นังฆรี ฆาซา นู บูวัจ ซัจๆ เตด บราดู กู นะ เตด บราเลฮ เดะ ลาฆู กาเตาะ อาฌัยํ. ซาเบะ กูญา บือเลฮ กือโปก โกะ ลูมอฮ ซือมียา_ ปี ฌาดี ปราโซฮ บีดา นะ อาเกะ กูญา บรี กะ ลูมอฮ เอโดม. 7 กะฆีเตอ กู นะ บูวัจ บรี อาปี ฆูโฆยํ เดะ อาตัซ ดีนิง นังฆรี ฆาซา อาปี อีตู นะ บลือกัจ ราตา เดะ รูมัฮ ฌาฆา บือปรัก นะ นังฆรี อีตู เลอ. 8 กู นะ บรี โกะ ลูมอฮ ซือมียา เดะ นังฆรี ปือจัฮ บือลัฮ ปี ตรือเบะ เดะ อาซะโดด ซือมียา นู ปือฆัก ตูกัจ นะ ราฌา นะ กือนา กรัจ ตรือเบะ เดะ นังฆรี อัดซะเคโลน กู นะ อาเลฮ ตางัน นะ กู ปาเระ ปี บือลาวัด ฌางัน เอโครน ลูมอฮ ฟีลิซะเตีย นู อาดา ลือเบฮ เตอ_ นะ ฌาฮานัม.” ตูฮัด บือซัยํ เดะ อาตัซ มือเลา กะฆีนี เลอ. 9 ตูฮัด บือซัยํ เดะ อาตัซ มือเลา กะฆีนี จะ “ซาเบะ ลาฆู บูวัจ กือลือเบฮ นะ นังฆรี ทัยระ นู บูวัจ ซัจ ๆ เตด บราดู กู นะ เตด บราเลฮ เดะ ลาฆู กาเตาะ อาฌัยํ เลอ. ซาเบะ กูญา บือเลฮ อาเกะ โกะ ลูมอฮ ซือมียา ซือมูฮา บรี กะ ลูมอฮ เอโดม ฮอย เตด บือเลฮ บรีงัจ รอจ กะ ปือมือเลา บือฌาญี บือตือตู นะ โกะ อาดี บราดี. 10 กะฆีเตอ กู นะ บูวัจ บรี อาปี ฆูโฆยํ เดะ อาตัซ ดีนิง นังฆรี ทัยระ อาปี อีตู นะ บลือกัจ ราตา เดะ รูมัฮ ฌาฆา บือปรัก นะ นังฆรี อีตู.” 11 ตูฮัด บือซัยํ เดะ อาตัซ มือเลา กะฆีนี จะ “ซาเบะ ลาฆู บูวัจ กือลือเบฮ นะ นังฆรี เอโดม นู บูวัจ ซัจ ๆ เตด บราดู กู นะ เตด บราเลฮ เดะ ลาฆู กาเตาะ อาฌัยํ. ซาเบะ กูญา บือเลฮ อูเซ ตูโรจ ลูมอฮ อาดี เดะ กูญา ฌางัน ปือดัก กูญา กือติฮ ลาฆู ตือจีฮัด บูวัก ดัฮ. กูญา ฌือนัฮ มูซัยํ ปี ซือลาลู กูญา ฌาฆา ลาฆู บืออีเซด ซือมาญัก รอจ. 12 กะฆีเตอ กู นะ บูวัจ บรี อาปี ฆูโฆยํ เดะ อาตัซ นังฆรี เทมาน อาปี อีตู นะ ปลือกัจ ปี ราตา เดะ รูมัฮ ฌาฆา บือปรัก นะ นังฆรี โบซรา.” 13 ตูฮัด บือซัยํ เดะ อาตัซ มือเลา กะฆีนี จะ “ซาเบะ ลาฆู บูวัจ กือลือเบฮ นะ ลูมอฮ อัมโมน นู บูวัจ ซัจ ๆ เตด บราดู กู นะ เตด บราเลฮ เดะ ลาฆู กาเตาะ อาฌัยํ. ซาเบะ กูญา บือเลฮ บือลัฮ โปรจ นะ นีบีนี นู บือโปรจ เดะ นังฆรี กิเลอาด บีดา นะ บรี นังฆรี นะ ญา บือซัยํ เลอ. 14 กะฆีเตอ กู นะ รูโมด อาปี เดะ ดีนิง นังฆรี รับบา อาปี นะ ปลือกัจ ปี ราตา เดะ รูมัฮ ฌาฆา บือปรัก นะ นังฆรี อีตู อาดา ฌางัน ซือวารา บือซูระ เดะ อารี บูวัจ ลาฆู บือปรัก มารือมา ฌางัน รีโบจ เดะ อารี อาดา อาเงน ตือบีโยก. 15 ราฌา นะ กูญา นะ กือนา กือโปก ปี ฌาดี ปราโซฮ จะ_ อีซี ญา_ ฌางัน โกะ กือปาลา นะ ญา ฌูฆา.” ตูฮัด บือซัยํ เดะ อาตัซ มือเลา กะฆีนี เลอ. |