ปือบูวัจ 1 - ซูรัจ ปือมือเลา นะ ตูฮัด

เยซู บือฌาญี ปาซัน ซือมืองัจ นะ ตูฮัด

¹ เทโอฟีโล เออ_ เดะ ซูรัจ ลามูลา นะ กู_ กู ฆาแรฮ ดัฮ_ ลาฆู ซือมูฮา นู เยซู ฮึนตะ นะ บูวัจ_ ฮึนตะ นะ อาฌัยํ_

² ตือดะ อารี อีตู_ นู ญา กือนา ซาโมจ บือญาแญะ ปี กะ อาตัซ ลาแงะ. ดูลู เดะ อารี อีตู_ ซือมืองัจ นะ ตูฮัด อาดา ฌางัน เยซู_ ตูโลก บรี ญา ปือซัด กะ ลูมอฮ ซือมียา อีตู_ นู ญา บือเลฮ ปีเลฮ ดัฮ_ บรี ฌาดี ลูมอฮ ปือญูโรฮ นะ ญา.

³ ลือปัซ ญา มาตี ดัฮ_ ญา มาแรฮ ปลีฮัจ กะ ลูมอฮ กูญา_ บาญะ กาลี_ บาญะ มาจับ_ นู บรี ลีฮัจ ตือตู จะ_ ญา ฮีโดะ ปาเระ ซูโงฮ ดัฮ. ปัจ ปูโลฮ อารี_ ญา ปลีฮัจ กะ กูญา_ มือเลา ฌางัน กูญา_ ปาซัน ลาฆู นู ตูฮัด เดะ อาตัซ นะ ปือบือลา_ ฌาดี ราฌา นะ อูมัจ ซือมียา.

⁴ กาลา กูญา อาดา บือซามา ลาฆี_ ญา ปือซัด กะ กูญา จะ_ “ฌางัน ตรือเบะ ปี เดะ นังฆรี เยรูซาเลม_ ตาปี นาตี เลอ_ บรี ซาโมจ บือนา นู อาโปก นะ กู บือฌาญี นะ บรี_ บือกะ กู บือเลฮ มือญาเระ กะ กาเญา ดัฮ.

⁵ โยฮัน บรี ซือมียา ซือลับ เดะ อาเย ดัฮ_ ตาปี เตด บาญะ อารี_ กาเญา นะ ซือลับ เดะ ซือมืองัจ นะ ตูฮัด.” เยซู ญา จะ.

เยซู ญาแญะ ปี กะ อาตัซ ลาแงะ

⁶ กาลา โกะ ปือญูโรฮ บือมุน บือซามา ฌางัน เยซู_ กูญา ปาคัจ ตาญา จะ_ “ตูฮัด เออ_ เกา นะ ตืองะ นังฆรี อิซราเอน บรี ลือปัซ ปูลัก_ เดะ วะตู อีนี เฆอ?”

⁷ เยซู มือเลา ฌางัน กูญา จะ_ “นู นะ ฌาดี วะตู ดีฮา_ บูกัด ลาฆู นะ กาเญา เลอ. อาโปก เดะ อาตัซ_ ญา เลอ_ นู นะ ตืองะ วะตู อีตู_ บือกะ ฮาตี นะ ญา เลอ.

⁸ ตาปี กาลา ซือมืองัจ นะ ตูฮัด_ นะ ตูโรด เดะ อาตัซ กาเญา_ ตูฮัด นะ บูวัจ บรี กาเญา มือฆัฮ เลอ. กะฆีเตอ_ กาเญา นะ ฌาดี ซะซรี_ มือญาเระ ลาฆู นะ กู_ เดะ นังฆรี เยรูซาเลม_ เดะ นังฆรี ยูเดีย_ เดะ นังฆรี ซะมาเรีย เดะ โกะ นังฆรี ราตาๆ_ ฌู รอจ กะ ฮูโฌก ปือญูดัฮ นังฆรี เดะ ดือนียา เลอ.” ญา จะ.

⁹ ตานา ญา มือเลา กะฆีเตอ ดัฮ_ กูญา ตีญุง ลีฮัจ ญา_ ญาแญะ ปี กะ อาตัซ ลาแงะ. ญา มาโซะ เดะ ดาลับ กือมูวัง ดัฮ_ บรี กูญา ลีฮัจ ญา เตด บือฆารี.

¹⁰ ตืองัฮ กูญา ตีญุง โซะ ลาแงะ_ นู ญา ปี ดัฮ_ นี เลอ_ อาดา ซือมียา บือปากัย กาเยด ปูเตฮ_ ดูวา อูรัก. กูญา มาแรฮ บือดีรี ดาปิก_

¹¹ มือเลา จะ_ “ลูมอฮ ซือมียา นังฆรี ฆาลิลี เออ_ บูวัจ นามา_ กาเญา บือดีรี ตีญุง กะ ลาแงะ? เยซู อีนี เตอ_ นู กือนา ซาโมจ บือญาแญะ ปี เดะ กาเญา_ รอจ กะ อาตัซ ลาแงะ ดัฮ_ ญา เลอ_ นะ ปาเระ มาแรฮ ปูลัก_ ซือรูปา บือกะ กาเญา บือฆารี ญา ปี กะ ลาแงะ ดัฮ.” กูญา จะ.

กูญา ปีเลฮ ปือญูโรฮ บารู ซืออูรัก

¹² กะฆีเตอ โกะ ปือญูโรฮ บาลิ ปี_ เดะ บูเกะ กือดูโนด_ มาโซะ กะ นังฆรี เยรูซาเลม. บูเกะ อีตู อาดา ฌาโวฮ เดะ นังฆรี_ ฆามะ บือเลฮ ซา กีโลเมด.

¹³ ตานา กูญา มาโซะ นังฆรี ดัฮ_ กูญา ปี กะ รูวัก โซะ อาตัซ_ นู กูญา มือนูปัก. อาดา เปโตร_ โยฮัน_ ยากอบ_ อันดรู_ ฟีลิบ_ โทมัด_ บาโทโลมัย_ มัดทัย_ ยากอบ นานะ นะ อันเฟอัด_ ซีโมน ซือมียา เดะ ลูมอฮ นู นะ บือลาวัด บีดา ปลือปัซ นังฆรี. อาดา ฌูฆา_ ยูดา นานะ นะ ยากอบ.

¹⁴ กูญา ซือมูฮา ซาฮาตี_ บือปาคัจ บือซาโวจ บือซามา. อาดา ฌูฆา ลูมอฮ นีบีนี_ อาดา มารียา_ มะ เดะ เยซู_ ฌางัน ลูมอฮ อาดี เดะ ญา.

¹⁵ วะตู อีตู_ อาดา ลูมอฮ ดีบราดี บือมุน บือซามา_ กือมูฮา ซือราตุซ ดูวา ปูโลฮ (120) อูรัก. เปโตร บีกัซ บือดีรี เดะ ตืองัฮ กูญา_ มือเลา จะ_

¹⁶ “ดีบราดี เออ_ อาดา ลาฆู เดะ ซูรัจ ปือมือเลา นะ ตูฮัด_ นู ฆาโดฮ ฌาดี รือมัก ดัฮ. ซือมืองัจ นะ ตูฮัด_ บูวัจ บรี ราฌา ดาวิด ตูโดฮ ดูลู_ ปาซัน ลาฆู นะ ยูดา. ยูดา เตอ_ ฌาดี ซือมียา นู บาวา โกะ ซือมียา บือปี รีฆะ เยซู_

¹⁷ ญา เตอ_ ฌาดี ซือมียา ซืออูรัก เดะ ลูมอฮ กามี. เยซู บือเลฮ ปีเลฮ ญา_ บรี บือกรือฌา ฌางัน กามี ดัฮ.” ญา จะ.

¹⁸ (ยูดา อีตู บูวัจ ฌาฮัจ กะฆีเตอ_ บือเลฮ รือฆา อูปัฮ ดัฮ. ญา อาเมด ดูเวะ อีตู_ ปี บือลี ตือปัจ ตานัฮ_ ซา ตือปัจ. ปัจ อีตู ญา รือบัฮ ตือซือมับ_ มาตี ดัฮ. โปรจ นะ ญา ปือจัฮ_ โกะ กลือกะ โปรจ เดะ ดาลับ_ ตรือเบะ ฮาบิฮ ดัฮ.

¹⁹ ซือมียา ซือมูฮา เดะ นังฆรี เยรูซาเลม ดืองัยํ ลาฆู อีตู ดัฮ. กะฆีเตอ กูญา ตืองะ ปือนามา กะ ตือปัจ ตานัฮ อีตู_ เดะ บาซา นะ กูญา_ จะ_ อาเคนดามา_ ฌาดี จะ_ บือนัก ดารัฮ ตูปัฮ.)

²⁰ เปโตร มือเลา ปูลัก จะ_ “อาดา นู ฆาแรฮ เดะ ซูรัจ มือญาญี ปูฌี ตูฮัด_ นู จะ “ ‘บรี ตือปัจ ดูโดะ นะ ญา_ ฌาดี ตือปัจ ฮอย ซือมียา ดูโดะ. ฌางัน บรี ซาปา ดูโดะ ปัจ อีตู เลอ .’ อาดา ฌูฆา นู จะ ‘บรี ซือมียา อาซิก ฌาดี กือปาลา_ ฆาตี ญา .’

^21-22 กะฆีเตอ เลอ_ กือนา อาดา ซือมียา ซืออูรัก ลาฆี_ นู นะ มือเลา ฌาดี ซะซรี บือซามา ฌางัน กามี_ ปาซัน ลาฆู นู ตูฮัด เยซู ฮีโดะ ปาเระ เดะ มาตี ดัฮ. ญา กือนา ฌาดี ซือมียา_ นู อาดา บือซามา ฌางัน กามี ซือลาลู_ วะตู ตูฮัด เยซู ปี มาแรฮ เดะ ตืองัฮ กามี_ ตะเดะ ตือกาลา โยฮัน บรี ลาฆู ซือลับ เดะ อาเย_ ตือดะ อารี อีตู_ นู เยซู_ กือนา ซาโมจ บือญาแญะ ปี เดะ กามี ดัฮ.” ญา จะ.

²³ กะฆีเตอ กูญา ปีเลฮ ซือมียา ดูวา อูรัก. อาดา โยเซบ นู ปือนามา จะ_ บาระซาบา_ (ญา อาดา ปือนามา อาซิก จะ_ ยูซะตัด). อาดา ฌูฆา มัดเทีย.

²⁴ กูญา บือซาโวจ จะ_ “โอ ตูฮัด_ เกา เลอ นู ตาฮู ฮาตี นะ ราตา ซือมียา. กะฆีเตอ_ ตูฮัด เออ_ บรี กามี ลีฮัจ ซือมียา ดีฮา_ นู เกา ปีเลฮ ดัฮ_

²⁵ บรี ญา บือกรือฌา ฌาดี ปือญูโรฮ ฆาตี ยูดา. กรือฌา อีนี_ ยูดา ญา ตีงัน ดัฮ_ ปี กะ ตือปัจ นะ ญา เลอ.” กูญา จะ.

²⁶ กะฆีเตอ กูญา ยิบละ_ นะ ลีฮัจ จะ_ ฌาดี ซือมียา ดีฮา. ฌาดี มัดเทีย ดัฮ. กะฆีเตอ กูญา ซาโมจ ญา_ บรี ฌาดี ซือมียา ซืออูรัก_ บือซามา ฌางัน ปือญูโรฮ_ ซือบือลัซ อูรัก อีตู.