2 ทิโมที 1 - ซูรัจ ปือมือเลา นะ ตูฮัด

¹ กู เปาโล_ ฌาดี ปือญูโรฮ นะ เยซู คริด_ ตูโรจ ฮาตี นะ ตูฮัด เดะ อาตัซ. ตูฮัด_ ญา ซูโรฮ กู_ ปี มือญาเระ ปือมือเลา บือฌาญี นู จะ_ ญา นะ บรี กีตา อาดา ฮีโดะ_ ลือกัจ บือซามา ฌางัน เยซู คริด.

² กู ฆาแรฮ ซูรัจ อีนี_ กีเรบ บรี กะ ทิโมที_ นู ฌาดี ซือรูปา นานะ นะ กู_ นู กู ซายัก. มีตา เดะ ตูฮัด บือซัยํ_ นู ฌาดี อาโปก นะ กีตา เตอ_ มีตา เดะ เยซู คริด_ นู ฌาดี ตูฮัด นะ กีตา_ นะ บรี ซือลามัจ กะ เกา_ นะ ตือจีฮัด กะ เกา_ นะ บรี เกา ดูโดะ ซือนัง ซือลามัจ เลอ.

ฌางัน นะ จือและ เดะ บรีตา นู บาฌิ

³ กู บรี ซือลามัจ กะ ตูฮัด เดะ อาตัซ_ นู กู บือเลฮ บูวัจ ตูโรจ_ ฌางัน ฮาตี นู บราซา จะ_ ฮอย ซาลัฮ นามา_ บือกะ ซือรูปา โกะ ญังมูญัง นะ กู_ บือเลฮ บูวัจ ฌูฆา. กู บรี ซือลามัจ กะ ญา_ เดะ บีลัก กาลี_ วะตู กู บรีงัจ กะ เกา_ ซียัก มาลับ บือซาโวจ บีดา เกา.

⁴ กู บรีงัจ กะ อาเย มาตา นะ เกา_ บือคานะ บาญะๆ_ นะ บือเลฮ ลีฮัจ เกา ปูลัก_ บรี กู นะ ซูกา ฮาตี ปือนอฮ ดัฮ.

⁵ กู บรีงัจ จะ_ นู เกา ปือจายา บือซูโงฮ-ซูโงฮ_ นู บือกะ ซือรูปา โลอิด_ แยะ เดะ เกา_ ฌางัน ยูนิด_ มะ เดะ เกา_ กูญา บือเลฮ ปือจายา ดูลู ดัฮ. กู ตือตู ฮาตี จะ_ เกา อาดา ปือจายา กะฆีเตอ ฌูฆา เลอ.

⁶ กะฆีเตอ กู ปรีงัจ กะ เกา เลอ_ อากัน นู ปานัย อีตู_ นู ตูฮัด ฮาลัย บรี กะ เกา ดัฮ_ ตานา กู บือเลฮ ตืองะ ตางัน เดะ ญาวา นะ เกา เตอ_ อากัน อีตู เกา กือนา ซูโรฮ บรี ปือนอฮ เลอ_ ซือรูปา อาปี นู เกา กือนา รือฆู บรี มือญาลา บาฌิ ดัฮ เลอ.

⁷ ซาเบะ จะ_ ตูฮัด เตด บือเลฮ บรี กีตา อาดา ฮาตี ปือนาโกจ_ ตาปี ญา บูวัจ บรี ฮาตี กีตา ปือนอฮ ฌางัน ปือมือฆัฮ นะ ญา_ อาดา ฮาตี ซายัก กะ กาวัด_ ญา บรี กีตา ตาฮู ฮูโกบ ฮาตี ตะอาซิก เลอ.

⁸ กะฆีเตอ เลอ_ ฌางัน จือและ นู นะ ฌาดี ซะซรี_ ปาซัน ตูฮัด นะ กีตา. ฌางัน นะ จือและ เดะ กู_ นู กู กือนา กานัก กรานา ตูฮัด ดัฮ เลอ. ตาปี เกา กือนา นะ ตาฮัด ซูซัฮ บือซามา-ซามา_ กรานา บรีตา นู บาฌิ บือกะ ตูฮัด บรี กะ เกา นะ ตือฆัยํ อูรัจ กะฆีเตอ เลอ.

⁹ ตูฮัด เลอ_ บือเลฮ ตูโลก กีตา_ บรี ฮีโดะ ลือปัซ บาฌิ ดัฮ. ญา บือเลฮ ปาเงน กีตา บรี ฌาดี ซือมียา จรัฮ บาฌิ นะ ญา_ บูกัด ซาเบะ ปือบูวัจ นะ กีตา_ ตาปี ซาเบะ ญา บือเลฮ บือคานะ ดูลู_ นู นะ ฮาลัย บรี ซือลามัจ กะ กีตา. ตะเดะ ดูลู นูตู เลอ_ ญา ฮาลัย บรี ซือลามัจ กะ กีตา_ กรานา เยซู คริด ดัฮ.

¹⁰ ตาปี รอจ วะตู อีนี_ ญา บือเลฮ ปลีฮัจ ลาฆู อีตู กะ กีตา ดัฮ_ ซาเบะ จะ_ เยซู คริด ซือมียา นู ตูโลก กีตา บรี ฮีโดะ ลือปัซ บาฌิ เตอ_ ญา มาแรฮ ปลีฮัจ ดัฮ. เดะ บรีตา นู บาฌิ ปาซัน นะ เยซู อีตู_ ญา บือเลฮ บรี กีตา ลีฮัจ ซัฮ จะ_ นู ญา บูวัจ บรี ลาฆู มาตี_ บือนาซา ฮาบิฮ ดัฮ. ญา บือเลฮ บรี กะ กีตา_ ลาฆู ฮีโดะ_ นู ฮอย เตด ดือละ นะ มาตี เลอ.

¹¹ ตูฮัด บือเลฮ ตืองะ กู เลอ_ ฌาดี ปือญูโรฮ_ บีดา นะ มือญาเระ บรี ตาฮู ราตาๆ_ บีดา นะ อาฌัยํ_ บรีตา นู บาฌิ อีตู.

¹² ซาเบะ ลาฆู อีตู เลอ_ กู กือนา ตาฮัด ซูซัฮ ปายัฮ กะฆีนี. ตาปี กู ฮอย เตด จือและ เลอ_ ซาเบะ ตูฮัด นู กู ปือจายา อีตู เตอ_ กู กราลา ญา บรี บาฌิ ดัฮ. กู ตือตู ฮาตี จะ_ ญา มือฆัฮ ซูโงฮ_ นะ บือเลฮ ฌาฆา ลาฆู อีตู_ นู กู กีเรบ บรี กะ ญา ดัฮ_ ตือดะ รอจ กะ อารี ปือญูดัฮ อีตู เลอ.

¹³ โกะ ปือมือเลา อาฌัยํ นู รือมัก ซูโงฮ_ นู เกา ดืองัยํ เดะ กู ดัฮ เตอ_ เกา กือนา อาเมด ฌาดี จูตอ_ นะ บือเลฮ ปี อาฌัยํ กะฆีเตอ ปูลัก. กือนา ปือจายา_ กือนา ซายัก ฌูฆา_ บือกะ ซือมียา นู มาโซะ บือซามา ฌางัน เยซู คริด ดัฮ.

¹⁴ ลาฆู นู ซูโงฮ อีตู_ นู กู บือเลฮ กีเรบ บรี กะ เกา ดัฮ_ ลาฆู อีตู_ เกา กือนา ฌาฆา บรี บาฌิ_ อาดา ซือมืองัจ นะ ตูฮัด_ นู ดูโดะ เดะ ดาลับ ลูมอฮ กีตา_ ญา นะ ตูโลก ฌาฆา ซามา.

¹⁵ เกา ตาฮู ดัฮ เลอ จะ_ โกะ ซือมียา ซือมูฮา_ นู ดูโดะ เดะ โซะ นังฆรี เอเซีย กูญา ปาคัจ มืองือละ ตีงัน กู ปี ดัฮ. เดะ ลูมอฮ อีตู_ อาดา ฟูเฆโล ฌางัน ฮือโมเฆน.

¹⁶ มีตา บรี ตูฮัด นะ ตือจีฮัด กะ โกะ ซือมียา ซือรูมัฮ นะ โอเนซิโฟรัด_ ซาเบะ ญา บือเลฮ บูวัจ บรี กู ซูกา ฮาตี ซัจๆ. ญา เตด จือและ_ เดะ ลาฆู นู กู อาดา เดะ ราตัย.

¹⁷ ตาปี ตานา ญา มาแรฮ รอจ กะ นังฆรี โรม_ ญา กือวาซา ปี มือโซะ มียา กู_ ฌู ดาปัจ.

¹⁸ นู ญา บือเลฮ ตูโลก บือกรือฌา บราปา บาญะ_ เดะ นังฆรี เอเฟซัด_ เกา โปด_ ตาฮู บาฌิ ดัฮ. มีตา บรี ตูฮัด นะ ตือจีฮัด กะ ญา_ เดะ อารี กรัจ ฮูโกบ อีตู เลอ.