2 ซามูเอน 1 - ซูรัจ ปือมือเลา นะ ตูฮัด

ดาวิด ญา มือนาแงฮ บือปาโตด ปาซัน ซาอูน ฌางัน โยนาทาน

¹ ลือปัซ เดะ ซาอูน ญา มาตี ดัฮ_ กาลา นู ดาวิด ญา บาลิ ดาตัก เดะ บือปรัก ฌือนัฮ_ เดะ โกะ ลูมอฮ ซือมียา อามาเลก_ ดาวิด เตอ ญา อาดา ดูโดะ เดะ ซิกลาก บือเลฮ ฆามะ ดูวา อารี.

² กาลา มาโซะ กะ อารี นู ตีฆา_ ลีฮัจ เลอ_ อาดา กีลากี ซืออูรัก_ มาแรฮ ดาตัก เดะ ตือปัจ โกะ รูมัฮ กาฌัก นะ ตาฮัน นะ ซาอูน. ญา บือปากัย โกะ บาฌู จีแจะๆ_ อาดา ฮาบู เดะ ปาลา. ญา เตอ_ มาโซะ มาแรฮ กะ ดาวิด_ ซาแมน ตือมะ มูคา รอจ กะ ตานัฮ_ มือญือมัฮ กะ ดาวิด.

³ ดาวิด เตอ_ ตาญา จะ_ “เกา มาแรฮ ดาตัก ปัจ ดีฮา?” ญา ตีกัฮ จะ_ “กู ลารี มาแรฮ_ ดาตัก เดะ ตือปัจ โกะ รูมัฮ กาฌัก นะ ตาฮัน นะ อิซราเอน”.

⁴ ดาวิด เตอ_ ตาญา ญา จะ_ “กือนา มือญาเระ กะ กู เลอ_ จะ_ ฌาดี ลาฆู กะฮามี ซือตืองัฮ?” ญา ตีกัฮ จะ_ “โกะ ลูมอฮ ตาฮัน_ กูญา ลารี เดะ ลาฆู บือปรัก ปี ดัฮ_ อาดา โกะ ซือมียา มาตี บาญะ. ซาอูน ฌางัน โยนาทาน_ นานะ นะ ญา โปด_ มาตี ฌูฆา ดัฮ.”

⁵ กะฆีเตอ_ ดาวิด ตาญา กีลากี นู มาแรฮ มือญาเระ อีตู จะ_ “เกา ตาฮู กะฮามี เลอ จะ_ ซาอูน ฌางัน โยนาทาน_ นานะ นะ ญา_ มาตี ดัฮ?”

⁶ กีลากี นู มือญาเระ กะ ญา เตอ_ ตีกัฮ จะ_ “ตานา บาฌิ_ กู มาแรฮ กะ บูเกะ กีละโบอา_ ลีฮัจ เลอ_ ซาอูน ญา บือดีรี ซีเดาะ บูลุซ นะ ญา_ ลีฮัจ เลอ_ อาดา ซือตรี บือปรัก_ ฌางัน โกะ ตาฮัน กูดา โปด_ มาแรฮ ดาปิก ญา.

⁷ กาลา ซาอูน ญา กรือแลฮ ลีฮัจ กู_ ญา โปด บลาโลก กู_ กู ตีกัฮ กะ ญา จะ_ ‘กู อาดา เดะ ตือปัจ อีนี เลอ.’

⁸ ซาอูน เตอ_ ญา ตาญา กู จะ_ ‘เกา ฌาดี ซาปา?’ กู ตีกัฮ จะ_ ‘กู ฌาดี ซือมียา ลูมอฮ อามาเลก.’

⁹ ญา ปือซัด กะ กู จะ_ ‘กือนา มาแรฮ บือดีรี ดาปิก กู_ บูนอฮ กู เลอ_ ซาเบะ กู ซาเกะ โตระ_ ตาปี อาดา ฮีโดะ ลาฆี เตอ.’

¹⁰ กะฆีเตอ_ กู ปี บือดีรี ดาปิก_ บูนอฮ ญา ดัฮ_ กรานา กู ตือตู เดะ ฮาตี ดัฮ จะ_ กาลา นู ญา รือบัฮ เตอ_ ญา นะ เตด ฮีโดะ ลาฆี ดัฮ. กู โปด_ อูฆัย กือจูบุก เดะ ปาลา_ ฌางัน ฆือลัก เดะ ตางัน_ บาวา มาแรฮ กะ ตือปัจ อีนี_ บีดา นะ บรี กะ กือปาลา นะ กู.”

¹¹ กะฆีเตอ_ ดาวิด จูลัด บาฌู นะ ญา. โกะ ซือมียา นู อาดา ดูโดะ ฌางัน ญา โปด_ บูวัจ กะฆีเตอ ฌูฆา.

¹² กูญา ซือมูฮา ปาคัจ มือนาแงฮ บือปาโตด_ บูวัจ ลาฆู บือตาฮัด บารัก มากัด_ ฌู ตือดะ รอจ วะตู ปะฮือญา_ บรี กะ ซาอูน ฌางัน โยนาทาน_ นานะ นะ ญา_ ฌางัน โกะ ลูมอฮ ตาฮัน นะ ตูฮัด บือซัยํ เดะ อาตัซ_ โกะ บือแนฮ บักซา อิซราเอน ฌูฆา_ ซาเบะ กูญา ซือมูฮา_ มาตี ฌางัน ปือดัก เลอ.

¹³ ดาวิด เตอ_ ญา ตาญา อูรัก มูดา นู มาแรฮ มือญาเระ กะ ญา_ จะ_ “เกา มาแรฮ ดาตัก เดะ ตือปัจ ดีฮา?” ญา ตีกัฮ จะ_ “กู ฌาดี นานะ นะ ซือมียา บักซา อาซิก_ ซือมียา ลูมอฮ อามาเลก.”

¹⁴ ดาวิด ตาญา ญา จะ_ “บูวัจ นามา เกา ฮอย เตด ตาโกจ_ เดะ ลาฆู อาเงา ตางัน ปี บูนอฮ ซือมียา นู ตูฮัด บือซัยํ เดะ อาตัซ ลือมัยํ มีญะ ดัฮ?”

¹⁵ กะฆีเตอ_ ดาวิด ญา บลาโลก อูรัก มูดา นู ซืออูรัก มือเลา จะ_ “ปี เลอ_ บูนอฮ ญา.” อูรัก มูดา อีตู โปด_ ปี บูนอฮ กีลากี นู มาแรฮ มือญาเระ เตอ_ มาตี ดัฮ.

¹⁶ ดาวิด เตอ_ ญา มือเลา กะ กีลากี นู อีตู จะ_ “เกา ฆาโดฮ ซาโมจ_ เดะ ลาฆู นู เกา มาตี เตอ_ ซาเบะ มูโลจ นะ เกา ฌาดี ซะซรี_ ตูโดฮ กะ ญาวา นะ เกา จะ_ ‘กู บือเลฮ บูนอฮ ซือมียา นู ตูฮัด บือซัยํ เดะ อาตัซ ลือมัยํ มีญะ ดัฮ.’ ”

¹⁷ ดาวิด เตอ_ ญา มือนาแงฮ บือปาโตด กะฆีนี_ บีดา ซาอูน ฌางัน โยนาทาน_ นานะ นะ ญา.

¹⁸ ญา มือเลา จะ_ กือนา อาฌัยํ ลาฆู มือญาญี บือปาโตด อีนี กะ ลูมอฮ ยูดา. ลีฮัจ เลอ ลาฆู บือปาโตด อีตู_ กือนา ฆาแรฮ ดัฮ_ เดะ ซูรัจ ยาชา. ญา จะ_

¹⁹ “โอ อิซราเอน_ บือซรี บือซายา นะ เกา_ กือนา บูนอฮ ดัฮ_ เดะ อาตัซ ตือปัจ นู ตีงี นะ เกา ซือมียา ตือฆัยํ อูรัจ โปด มาตี ดัฮ เลอ.

²⁰ ฌางัน มือญาเระ ลาฆู อีนี_ เดะ นังฆรี กัด ฌางัน มือญาเระ ลาฆู อีนี_ เดะ ฌาลัด บือซัยํ นะ นังฆรี อัดซะเคโลน ตาโกจ จะ_ โกะ นานะ นีบีนี นะ ลูมอฮ ฟีลิซะเตีย นะ ซูกา ฮาตี ตาโกจ จะ_ โกะ นานะ นีบีนี นะ ซือมียา นู ฮอย เตด บือเลฮ มาโซะ ลาฆู กรัจ กูญา นะ บรามัย เลอ.

²¹ “โอ บูเกะ กีละโบอา เออ ฌางัน บรี อาดา อาเย ฮือโมด เฆอ จะ_ อาเย ฮูฌัด เดะ อาตัซ เกา เฆอ จะ_ เดะ บือนัก นู อาดา ซือบารัก อาเกะ มือญือมัฮ ซาเบะ เดะ ตือปัจ อีตู เตอ_ ตือปัจ ซาฆัก นะ ซือมียา ตือฆัยํ อูรัจ_ กือนา บูวัจ บรี ตะอารัฮ ดัฮ ฌาดี ตือปัจ ซาฆัก นะ ซาอูน เลอ_ นู นะ ฮอย เตด กือนา ลือมัยํ มีญะ ลาฆี.

²² “ปานัฮ นะ โยนาทาน_ ญา ฮอย เตด บือเลฮ อาเลฮ ปาเระ เดะ ดารัฮ นะ ซือมียา นู กือนา บูนอฮ เฆอ จะ_ เดะ ลือมะ นะ ซือมียา นู ตือฆัยํ อูรัจ ปือดัก นะ ซาอูน โปด_ ญา ฮอย เตด บาลิ เปลาๆ.

²³ “ซาอูน ฌางัน โยนาทาน เออ_ ฌาดี ซือมียา นู กือนา ซายัก นู กือนา ซูกา เดะ ฮาตี เตอ เตด จะ_ นะ ฮีโดะ_ เฆอ จะ_ นะ มาตี กูญา ดูวา อูรัก ฮอย เตด จัฮบือลัฮ_ กูญา จือปัจ ลือเบฮ เดะ บูโรก ราฌา วาลี ตือฆัยํ อูรัจ ลือเบฮ เดะ ซีงา เลอ.

²⁴ “นานะ นีบีนี นะ อิซราเอน เออ_ กือนา มือนาแงฮ เลอ_ บีดา ซาอูน นู บือเลฮ ปือตัด กาเญา_ บรี บือฆาจะ_ ฌางัน กาเยด มีรัฮ ฮีตับ ญา นู ปือตัด โกะ ซือบารัก มัซ_ เดะ กาเยด บาฌู นะ กาเญา.

²⁵ “โกะ ซือมียา ตือฆัยํ อูรัจ โปด_ รือบัฮ มาตี ดัฮ เดะ ซามา ตืองัฮ ลาฆู บือปรัก. “โยนาทาน โปด_ กือนา บูนอฮ เดะ อาตัซ ตือปัจ นู ตีงี นะ อิซราเอน.

²⁶ โอ โยนาทาน_ จา เออ_ กู ซูซัฮ ฮาตี บีดา เกา เกา เตอ_ ฌาดี ตือปัจ นู กู ซูกา เดะ ฮาตี โตระ ลาฆู ซายัก นะ เกา_ นู อาดา ฌางัน กู เตอ_ ปือและ ซูโงฮ ลือเบฮ เดะ ลาฆู ซายัก นะ โกะ นีบีนี เลอ.

²⁷ “ซือมียา ตือฆัยํ อูรัจ โปด_ รือบัฮ มาตี ดัฮ โกะ กลือกะ นะ ตาฮัน ซือมูฮา โปด_ บือนาซา ฮาบิฮ เลอ.”