2 เปโตร 1 - ซูรัจ ปือมือเลา นะ ตูฮัด

¹ กู_ เปโตร นู ฌาดี ปราโซฮ ฌางัน ปือญูโรฮ นะ เยซู คริด_ กู ฆาแรฮ ซูรัจ อีนี กีเรบ บรี กะ กาเญา_ นู บือเลฮ ซาโมจ ลาฆู ปือจายา นู บรือฆา บาฌิ_ ซามา บายา ฌางัน กามี. นู กีตา ซาโมจ ลาฆู ปือจายา กะฆีเตอ ดัฮ เตอ_ กรานา จะ เยซู คริด_ นู ฌาดี ตูฮัด บือซัยํ นะ กีตา_ นู บูวัจ บรี กีตา ฮีโดะ ลือปัซ ซูโงฮ_ ญา เตอ_ ฮาตี รือมัก ซูโงฮ เลอ.

² มีตา เดะ ตูฮัด_ นะ บรี ซือลามัจ กะ กาเญา บือตามัฮ บาญะ_ บรี ดูโดะ ซือนัง ซือลามัจ บือตามัฮ บรี บาญะ_ บือกะ นู กาเญา บือเลฮ กราลา ตูฮัด เดะ อาตัซ_ ฌางัน เยซู_ ตูฮัด นะ กีตา ดัฮ.

ตูฮัด ปาเงน กีตา บรี ฌาดี กะฮามี

³ นู ปือมือฆัฮ นะ ตูฮัด บือเลฮ บรี ลาฆู ซือมูฮา กะ กีตา_ นู นะ บรี กีตา อาดา ฮีโดะ บาฌิ_ ตูโรจ กะ ฌาลัด นะ ตูฮัด. นู ฌาดี กะฆีเตอ_ ซาเบะ กีตา กราลา ตูฮัด_ นู ปาเงน กีตา ดัฮ_ บรี มาโซะ บือซามา เดะ ลาฆู บือซรี บือซายา ฌางัน ลาฆู บาฌิ โตระ นะ ญา.

⁴ กะฆีเตอ_ ตูฮัด ญา บือเลฮ บรี กะ กีตา โกะ ปือมือเลา ฌาญี นู บาฌิ_ นู บือซัยํ ซูโงฮ_ บีดา จะ_ ซาเบะ ลาฆู กะฆีเตอ_ กาเญา นะ บือเลฮ บาฮาเฆด นู บาฌิ_ ฌาดี จะ_ ตูฮัด ฌาดี กะฮามี_ กาเญา นะ ฌาดี กะฆีเตอ ฌูฆา. กะฆีเตอ_ กาเญา นะ บือเลฮ ลือปัซ ดัฮ_ เดะ ลาฆู นู นะ บูโระ บูโซะ_ นู อาดา เดะ ดือนียา อีนี เตอ_ กรานา ลาฆู ฆาละ.

⁵ ซาเบะ กะฆีเตอ เลอ_ บรี กาเญา กือวาซา ฌู ตือดะ ฮาบิฮ อูรัจ_ บรี บือตามัฮ ลาฆู บาฌิ. นู กาเญา ปือจายา ดัฮ_ บรี ฌาดี ซือมียา บาฌิ โตระ ปูลัก. นู ฌาดี ซือมียา บาฌิ ดัฮ_ บรี ตาฮู บาญะ ลาฆู ปูลัก.

⁶ นู ตาฮู บาญะ ลาฆู ดัฮ_ บรี ตาฮู ตาฮัด ญาวา ตะอาซิก ปูลัก. นู ตาฮัด ญาวา ตะอาซิก ดัฮ_ บรี อาดา ฮาตี กือฌะ กือมัซ ปูลัก. นู อาดา ฮาตี กือฌะ กือมัซ ดัฮ_ บรี ตูโรจ กะ ฌาลัด นะ ตูฮัด ปูลัก.

⁷ นู ตูโรจ กะ ฌาลัด นะ ตูฮัด ดัฮ_ บรี ซายัก ซามา ดีบราดี ปูลัก. นู ซายัก ซามา ดีบราดี เตอ_ บรี ซายัก กะ ซือมียา ซือมูฮา ปูลัก เลอ.

⁸ ดัฮ อาดา ฮาตี กะฆีเตอ ดูโดะ เดะ กาเญา ปือนอฮ บาฌิ ดัฮ_ ญา นะ บูวัจ บรี กาเญา บือเลฮ อูโตก_ บือบูวัฮ ลือบัจ_ เดะ ลาฆู นู กาเญา กราลา เยซู คริด ตูฮัด นะ กีตา.

⁹ กรานา จะ_ ดัฮ ซือมียา ดีฮา ฮอย ลาฆู บาฌิ กะฆีเตอ_ ญา ฌาดี ซือมียา มาตา บูตา_ ลีฮัจ บือฆารี เตด ซัฮ เลอ_ ลูปา ดัฮ จะ_ นู ตูฮัด บือเลฮ บาโซฮ ญา ดัฮ_ บรี ลือปัซ เดะ ดูซา นู ดูลู นะ ญา.

¹⁰ ซาเบะ กะฆีเตอ_ ลูมอฮ ดีบราดี เออ_ กือนา กือวาซา บูวัจ ตูโรจ บรี กือฌะ กือมัซ_ บือกะ ลาฆู นู ตูฮัด ปาเงน กาเญา_ ปีเลฮ กาเญา ดัฮ. กรานา จะ_ ดัฮ กาเญา บูวัจ กะฆีเตอ_ นะ เตด ดือละ ซือซัจ ฌาลัด_ ตีงัน ลาฆู ปือจายา.

¹¹ กะฆีเตอ ตูฮัด นะ บูกา ปีตู นู ลือฆา บาฌิ_ บรี กะ กาเญา นะ มาโซะ กะ ดือนียา นู ซือลาลู อีตู_ นู อาดา ตูฮัด เยซู คริด ฌาดี ราฌา ญา เลอ นู ตูโลก กีตา บรี ฮีโดะ ลือปัซ บาฌิ.

¹² ซาเบะ กะฆีเตอ_ มีเซ จะ กาเญา ตาฮู ดัฮ_ กาเญา กือฌะ กือมัซ เดะ ลาฆู ซูโงฮ นู กาเญา ซาโมจ ดัฮ_ ตาปี กู โปด_ อาดา ฮาตี นะ ปรีงัจ กะ กาเญา ซือลาลู_ บรี อีงัจ กะ ลาฆู กะฆีนี ซือมูฮา.

¹³ กาลา กู อาดา ดูโดะ เดะ ญาวา นู อีนี ลาฆี_ กู ฆามะ ลีฮัจ บาฌิ ดัฮ_ นู นะ ปรีงัจ กะ กาเญา เดะ ลาฆู กะฆีนี.

¹⁴ กรานา กู ตาฮู จะ_ เตด บราปา ลามา_ กู นะ มือนีงัน ญาวา นะ กู ปี_ บือกะ นู เยซู คริด_ ตูฮัด นะ กีตา_ ญา บือเลฮ ปลีฮัจ กะ กู ดัฮ.

¹⁵ กู กือวาซา นะ มียา ฌาลัด_ บรี กะ กาเญา นะ บรีงัจ รอจ กะ ลาฆู กะฆีนี บือเลฮ_ วะตู กู มือนีงัน ปี เดะ ดือนียา อีนี ดัฮ.

เปโตร บือเลฮ ลีฮัจ นู บือซรี บือซายา นะ เยซู

¹⁶ กรานา จะ_ กาลา กามี บือเลฮ บรี กะ กาเญา ตาฮู ปาซัน นะ เยซู คริด_ ตูฮัด นะ กีตา_ นู ญา นะ มาแรฮ ฌางัน ลาฆู มือฆัฮ เตอ_ กามี เตด บือเลฮ ตูโรจ กะ ลาฆู จรือตา นู กูญา ปานัย อีงัจ เตอ_ ตาปี กามี ฌาดี ซะซรี_ บือเลฮ ลีฮัจ ฌางัน มาตา นะ กามี จะ_ เยซู ญา บือซัยํ บือซรี เลอ.

¹⁷ ซาเบะ จะ_ กามี อาดา บือซามา ฌูฆา_ กาลา ตูฮัด นู อาโปก เดะ อาตัซ บือเลฮ ปูฌี กะ เยซู_ บรี ญา ซาโมจ ลาฆู บือซรี บือซายา เตอ. อาดา ซือวารา มาแรฮ รอจ กะ ญา ฌูฆา_ ดาตัก เดะ นู บือซรี ซูโงฮ นะ ตูฮัด_ นู จะ_ “ซือมียา อีนี เลอ_ ฌาดี นานะ นะ กู_ นู กู ซายัก. กู ซูกา ฮาตี กะ ญา ซูโงฮ เลอ.”

¹⁸ กามี โปด_ บือเลฮ ดืองัยํ ซือวารา อีตู_ บูงี ดาตัก มาแรฮ เดะ โซะ ลาแงะ_ กรานา จะ_ กามี อาดา ดูโดะ ฌางัน เยซู_ เดะ บูเกะ นู บาฌิ บือซรี อีตู เตอ.

¹⁹ กะฆีเตอ_ กีตา ซือมูฮา บือเลฮ ตือตู ฮาตี บาญะ ลาฆี_ เดะ ปือมือเลา นะ โกะ ซือมียา นู ตูโดฮ ลาฆู นะ ตูฮัด. นะ ฌาดี ลาฆู บาฌิ เลอ_ บรี กาเญา ตูโรจ กะ ปือมือเลา อีตู_ ซาเบะ ปือมือเลา อีตู ฌาดี ซือรูปา ซายา ปลีตา นู ซูโลฮ ปี กะ โซะ กือลับ_ ตือดะ อารี อีตู นะ บือบีฮัก_ ตือดะ บีตัก มูกัยํ นะ ตีโมน เดะ ฮาตี นะ กาเญา.

²⁰ กาเญา กือนา ตาฮู ลาฆู อีนี ดูลู จะ_ ปือมือเลา ตูโดฮ ราตา_ นู อาดา ฆาแรฮ เดะ ซูรัจ ปือมือเลา นะ ตูฮัด ดัฮ เตอ_ ฮอย ซือมียา ดีฮา_ นะ บือเลฮ มาโซะ เดะ ฮาตี_ บรีงัจ ตูโรจ กะ ฮาตี นะ ญา ตะอาซิก เตอ.

²¹ กรานา จะ_ ฮอย ปือมือเลา ตูโดฮ นู ดีฮา โปด_ นู ดือละ บือฌาดี มาแรฮ_ ตูโรจ กะ ฮาตี นะ ซือมียา_ ตาปี จะ ซือมืองัจ นะ ตูฮัด บาวา โกะ ซือมียา บือปี_ บรี กูญา มือเลา ตูโรจ กะ ปือมือเลา นู มาแรฮ ดาตัก เดะ ตูฮัด เดะ อาตัซ เลอ.