2 ราฌา 1 - ซูรัจ ปือมือเลา นะ ตูฮัดเอลียา มือเลา ตูโดฮ กะ อาฮาซียา 1 กาลา อาฮับ ญา มาตี ดัฮ_ ลูมอฮ นังฆรี โมอับ โปด_ บูวัจ กือบลากัก กะ ลูมอฮ อิซราเอน. 2 โซะ ราฌา อาฮาซียา_ ญา ฆูโฆยํ ดาตัก เดะ จือลัฮ ตีกะ_ นู ตูโดก ฌางัน กายู นีปิฮ บือกะ ปูกัจ_ เดะ รูวัก โซะ อาตัซ นะ ญา_ เดะ นังฆรี ซะมาเรีย_ บูวัจ บรี ญา ฮอย เตด ซือนัง. กะฆีเตอ_ ญา ซูโรฮ ซือมียา บาวา บรีตา ปี_ มือเลา จะ_ “กือนา ปี ตาญา บราลา บาอัน-เซบูบ_ บราลา นะ ลูมอฮ นังฆรี เอโครน_ จะ_ กู นะ ลือฆา เดะ ลาฆู ฮอย เตด ซือนัง อีนี_ เฆอ เตด.” 3 ตาปี ฮูลู บาลัก นะ ตูฮัด บือซัยํ เดะ อาตัซ มือเลา ฌางัน เอลียา_ ซือมียา ตูโปะ ทีชะบี_ จะ_ “กือนา บีกัซ ปี_ ซารี ซือมียา นู บาวา บรีตา นะ ราฌา นังฆรี ซะมาเรีย_ มือเลา ฌางัน กูญา จะ_ ‘ซาเบะ ฮอย ตูฮัด เดะ อิซราเอน ดัฮ เฆอ_ นู กาเญา ฆาโดฮ ปี ตาญา บราลา บาอัน-เซบูบ_ บราลา นะ เอโครน?’ 4 ซาเบะ กะฆีเตอ ตูฮัด บือซัยํ เดะ อาตัซ ญา มือเลา จะ_ ‘เกา นะ ฮอย เตด บือเลฮ บีกัซ เดะ ตือปัจ ตีโนะ นะ เกา เตอ_ ตาปี เกา ฆาโดฮ นะ มาตี เลอ.’ ” กะฆีเตอ_ เอลียา ญา ปี ดัฮ. 5 ซือมียา นู บาวา บรีตา อีตู_ กูญา บาลิ มาแรฮ ซารี ราฌา. กะฆีเตอ ราฌา ตาญา กูญา จะ_ “บูวัจ นามา ลูมอฮ กาเญา ปาคัจ บาลิ ปาเระ?” 6 กูญา มือเลา ฌางัน ราฌา จะ_ “อาดา กีลากี ซืออูรัก_ มาแรฮ บือดาปัจ ฌางัน กามี_ มือเลา ฌางัน กามี จะ_ ‘กือนา บาลิ ปี ซารี ราฌา_ นู ซูโรฮ กาเญา มาแรฮ_ มือเลา ฌางัน ญา จะ_ “ตูฮัด บือซัยํ เดะ อาตัซ มือเลา กะฆีนี จะ_ ซาเบะ ฮอย ตูฮัด เดะ อิซราเอน ดัฮ เฆอ_ เกา บือเลฮ ซูโรฮ ซือมียา ปี ตาญา บราลา บาอัน-เซบูบ_ บราลา นะ เอโครน? ซาเบะ กะฆีเตอ_ เกา นะ ฮอย เตด บือเลฮ บีกัซ เดะ ตือปัจ ตีโนะ นะ เกา เตอ_ ตาปี เกา นะ มาตี ซูโงฮ.” ’ ” 7 ราฌา ตาญา กูญา จะ_ “ซือมียา นู มาแรฮ ดาปัจ กาเญา_ นู มือญาเระ ลาฆู อีนี กะ กาเญา เตอ_ ฌาดี ซือมียา กะฮามี?” 8 กูญา ตีกัฮ กะ ญา จะ_ “ญา ฌาดี ซือมียา อาดา บูลู ลือบัจ_ อาดา ตาลี กูเละ บือนาตัก_ อีกัจ เดะ ปีงัก นะ ญา.” ญา มือเลา จะ_ “ฌาดี เอลียา_ ซือมียา ตูโปะ ทีชะบี.” 9 กะฆีเตอ ราฌา โปด_ ญา ซูโรฮ กือปาลา ตาฮัน_ นู ฮูโกบ ลีมา ปูโลฮ (50) อูรัก_ ปี ฌางัน ตาฮัน ลีมา ปูโลฮ อูรัก นะ ญา_ ปี ซารี เอลียา. ญา โปด_ ปี ดาปัจ เอลียา_ นู อาดา ดูโดะ เดะ อาตัซ บูเกะ. กือปาลา ตาฮัน อีตู_ มือเลา ฌางัน ญา จะ_ “โอ_ ซือมียา นะ ตูฮัด_ ราฌา ญา มือเลา กะฆีนี จะ_ ‘ตูโรด มาแรฮ เลอ.’ ” 10 ตาปี เอลียา ตีกัฮ กะ กือปาลา ตาฮัน อีตู จะ_ “ดัฮ กู ฌาดี ซือมียา นะ ตูฮัด เตอ_ มีตา บรี กะ อาปี ตูโรด มาแรฮ_ ดาตัก เดะ ลาแงะ_ ตูนู เกา ฌางัน โกะ ซือมียา ลีมา ปูโลฮ อูรัก นะ เกา.” กะฆีเตอ อาปี โปด_ ตูโรด มาแรฮ ดาตัก เดะ ลาแงะ_ ตูนู ญา ฌางัน โกะ ซือมียา ลีมา ปูโลฮ อูรัก นะ ญา. 11 กะฆีเตอ_ ราฌา ญา ซูโรฮ กือปาลา ตาฮัน_ นู ฮูโกบ ลีมา ปูโลฮ (50) อูรัก_ ซืออูรัก ลาฆี_ ปี ฌางัน ตาฮัน ลีมา ปูโลฮ อูรัก ซือปาลัฮ ปูลัก. ญา โปด_ มือเลา กะ เอลียา จะ_ “โอ_ ซือมียา นะ ตูฮัด_ ราฌา ญา มือเลา กะฆีนี จะ_ ‘ตูโรด มาแรฮ งัจบางัจ เลอ.’ ” 12 ตาปี เอลียา ตีกัฮ จะ_ “ดัฮ กู ฌาดี ซือมียา นะ ตูฮัด_ มีตา บรี กะ อาปี ตูโรด มาแรฮ_ ดาตัก เดะ ลาแงะ_ ตูนู เกา ฌางัน โกะ ซือมียา ลีมา ปูโลฮ อูรัก นะ เกา เลอ.” กะฆีเตอ_ อาปี นะ ตูฮัด ตูโรด มาแรฮ_ ดาตัก เดะ ลาแงะ_ ตูนู ญา ฌางัน ซือมียา ลีมา ปูโลฮ อูรัก นะ ญา. 13 กะฆีเตอ ราฌา_ ญา ซูโรฮ กือปาลา ตาฮัน นู ฮูโกบ ลีมา ปูโลฮ (50) อูรัก_ มาโซะ กะ นู ตีฆา_ ปี มารือมา ฌางัน โกะ ตาฮัน ลีมา ปูโลฮ อูรัก นะ ญา. ญา เตอ_ ญาแญะ ปี ตูกู ลูโตจ_ ฮือลด มูคา นะ เอลียา_ มือเลา ปูโฌะ ญา จะ_ “โอ_ ซือมียา นะ ตูฮัด_ มีตา บรี ญาวา นะ กู_ ฌางัน โกะ ปราโซฮ นะ เกา_ ลีมา ปูโลฮ อูรัก อีนี_ อาดา รือฆา บาฌิ โซะ ฮือลด มาตา นะ เกา. 14 ลีฮัจ เลอ_ อาปี ตูโรด มาแรฮ ดาตัก เดะ ลาแงะ_ ตูนู โกะ กือปาลา ตาฮัน_ นู ฮูโกบ ลีมา ปูโลฮ อูรัก_ จะ ดูวา อูรัก นู ดูลู อีตู เตอ_ มารือมา ฌางัน โกะ ตาฮัน ลีมา ปูโลฮ อูรัก นะ กูญา ฌูฆา. ตาปี วะตู อีนี_ บรี กะ ญาวา นะ กู อาดา รือฆา บาฌิ โซะ ฮือลด มาตา นะ เกา.” 15 กะฆีเตอ_ ฮูลู บาลัก นะ ตูฮัด บือซัยํ เดะ อาตัซ_ มือเลา ฌางัน เอลียา จะ_ “กือนา ตูโรด ปี บือซามา ฌางัน ญา. ฌางัน นะ ตาโกจ เดะ ญา เลอ.” ญา โปด_ ตูโรด ปี ฌางัน กือปาลา ตาฮัน_ ปี ซารี ราฌา 16 มือเลา ฌางัน ญา จะ_ “ตูฮัด บือซัยํ เดะ อาตัซ มือเลา กะฆีนี จะ_ ‘ซาเบะ เกา ซูโรฮ ซือมียา บาวา บรีตา_ ปี ซารี บราลา บาอัน-เซบูบ_ บราลา นะ เอโครน (ซาเบะ ฮอย ตูฮัด เดะ อิซราเอน นู นะ ตาญา ลาฆู ปือมือเลา นะ ญา เฆอ?) ซาเบะ กะฆีเตอ_ เกา นะ ฮอย เตด บือเลฮ ตูโรด เดะ ตือปัจ นู เกา ตีโนะ เตอ_ เกา นะ ฆาโดฮ มาตี ซูโงฮ.’ ” อาฮาซียา มาตี ดัฮ 17 ญา โปด_ มาตี_ ตูโรจ กะ ปือมือเลา นะ ตูฮัด บือซัยํ เดะ อาตัซ_ นู เอลียา ญา มือเลา ดัฮ. กะฆีเตอ_ โยรัม_ อาดี เดะ ญา_ ฌาดี ราฌา ฆาตี ญา_ เดะ ตาโฮด นู ดูวา_ ฮาดัจ นะ เยโฮรัม_ นานะ นะ เยโฮชาฟัด_ ราฌา นังฆรี ยูดา_ ซาเบะ อาฮาซียา ญา ฮอย นานะ กีลากี. 18 โซะ ลาฆู บือกรือฌา อาซิก นะ อาฮาซียา_ นู ญา บือเลฮ บูวัจ เตอ_ บือเลฮ ฆาแรฮ ตาโรฮ เดะ ซูรัจ จรือตา นะ ราฌา นังฆรี อิซราเอน_ บูกัด เฆอ? |