2 โยฮัน 1 - ซูรัจ ปือมือเลา นะ ตูฮัดปือมือเลา มืองา 1 กู นู ซือมียา ปือบือลา ลูมอฮ นะ ตูฮัด กู ฆาแรฮ ซูรัจ อีนี_ กีเรบ บรี กะ นีบีนี นู ตูฮัด ปีเลฮ ดัฮ_ ฌางัน โกะ นานะ นะ ญา_ นู กู ซายัก ซูโงฮๆ. บูกัด กู ซายัก ซืออูรัก_ ตาปี ราตา ซือมียา นู กราลา ลาฆู นู ซูโงฮ_ กูญา ซายัก ฌูฆา. 2 ซาเบะ นามา? ซาเบะ ลาฆู นู ซูโงฮ นู ดูโดะ ตือตู เดะ ฮาตี กีตา_ นู นะ ดูโดะ บือซามา ฌางัน กีตา ซือลาลู เลอ. 3 กู มีตา เดะ ตูฮัด นู อาโปก บือซัยํ เดะ อาตัซ_ ฌางัน เยซู คริด_ นานะ นะ อาโปก เดะ อาตัซ_ มีตา บรี กูญา นะ บรี ซือลามัจ กะ กาเญา_ นะ ตือจีฮัด กะ กาเญา_ นะ บรี กาเญา ดูโดะ ซือนัง ซือลามัจ เลอ. บรี บือนา อีนี ดูโดะ ฌางัน กาเญา_ นู ตูโรจ กะ ลาฆู นู ซูโงฮ_ นู ซายัก บาญะ เลอ. ลาฆู นู ซูโงฮ ลาฆู นู ซายัก 4 กู ซูกา ฮาตี ซูโงฮ_ กรานา จะ ดาปัจ โกะ นานะ นะ เกา ซือตืองัฮ_ ลีฮัจ จะ_ กูญา ตูโรจ กะ ลาฆู นู ซูโงฮ_ บือกะ อาโปก เดะ อาตัซ บือเลฮ ปือซัด กะ กีตา ดัฮ. 5 นีบีนี เออ_ กู มีตา เดะ เกา_ บรี กีตา ซายัก บือซามา-ซามา เลอ. นี เลอ_ บูกัด กู ฆาแรฮ ปือมือซัด นู บารู บรี กะ เกา_ ตาปี ฌาดี ปือมือซัด นู อาดา ตะเดะ ลามูลา ดัฮ. 6 นู ลาฆู ซายัก เตอ_ ฌาดี กะฆีนี เลอ_ นู กีตา ตูโรจ กะ ปือมือซัด นะ ตูฮัด. ปือมือซัด อีตู ฌาดี กะฆีนี_ บือกะ นู กาเญา บือเลฮ ดืองัยํ ตะเดะ ลามูลา_ บรี กาเญา บูวัจ ตูโรจ กะฆีเตอ เลอ. 7 กรานา จะ อาดา ซือมียา ตีปู บาญะ อูรัก_ นู กรือจัย ปี ราตา เดะ ดือนียา ดัฮ. ลูมอฮ อีนี ฮอย เตด ซาโงะ จะ_ นู เยซู คริด มาแรฮ ฌาดี ซือมียา ดัฮ. ซือมียา กะฆีเตอ_ ฌาดี ซือมียา ตีปู เลอ_ ฌาดี ซือมียา นู ลาวัด ฌางัน เยซู คริด. 8 กาเญา กือนา ฌาฆา ญาวา บรี บาฌิ_ ตีเมา บรี ปูตุซ อูโตก เดะ ลาฆู บือกรือฌา นะ กามี ตาปี นะ บือเลฮ ซาโมจ บาฮาเฆด ปือนอฮ บาฌิ_ ดาตัก เดะ ตูฮัด. 9 ซือมียา นู เตด ดูโดะ กือฌะ กือมัซ เดะ ปือมือเลา อาฌัยํ นะ เยซู คริด_ ตาปี ญา บูวัจ กือลือเบฮ_ ซือมียา อีตู เตอ_ ญา ฮอย ตูฮัด บือซัยํ เดะ อาตัซ เลอ. ซือมียา นู ดูโดะ กือฌะ กือมัซ เดะ ปือมือเลา อาฌัยํ นะ เยซู คริด อีตู เตอ_ ญา เลอ_ อาดา อาโปก บือซัยํ เดะ อาตัซ_ อาดา ฌางัน นานะ นะ ญา ซามา เลอ. 10 ดัฮ อาดา ซาปา มาแรฮ มียา กาเญา_ ตาปี กูญา เตด บาวา ปือมือเลา อาฌัยํ ซือรูปา กะฆีนี มาแรฮ ซามา เตอ_ ฌางัน นะ ซาโมจ กูญา มาโซะ มือนูปัก ดูโดะ เดะ รูมัฮ. ฌางัน บรี ซือลามัจ กะ กูญา. 11 ซือมียา ดีฮา นู บรี ซือลามัจ กะ กูญา_ ซือรูปา จะ ญา อาดา ฮาบด บือซามา_ เดะ ลาฆู ปือบูวัจ นู ฌาฮัจ นะ กูญา ฌูฆา เลอ. ปือมือเลา ปือญูดัฮ 12 กู อาดา ลาฆู อาซิก นะ มือเลา ฌางัน กาเญา_ บาญะ ลาฆู_ ตาปี ตีเมา ฆาแรฮ ฌาดี ซูรัจ. ตาปี กู จาดัก จะ_ นะ บือเลฮ มาแรฮ ซารี กาเญา_ นะ มือเลา บือซูวา มูคา. กะฆีเตอ กีตา ซือมูฮา นะ ซูกา ฮาตี_ บรี ปือนอฮ บาฌิ เลอ. 13 โกะ นานะ นะ อาดี นีบีนี นะ เกา_ นู ตูฮัด ปีเลฮ ดัฮ เตอ_ กูญา กีเรบ บรีงัจ กะ เกา ฌูฆา. |