2 โกริน 1 - ซูรัจ ปือมือเลา นะ ตูฮัด

¹ กู เปาโล_ ฌาดี ปือญูโรฮ นะ เยซู คริด_ ตูโรจ กะ ฮาตี นะ ตูฮัด เดะ อาตัซ. กู ฌางัน ทิโมที_ อาดี บราดี นะ กีตา_ กามี ฆาแรฮ ซูรัจ อีนี_ กีเรบ บรี กะ ลูมอฮ นะ ตูฮัด นู อาดา เดะ นังฆรี โกริน_ บรี กะ โกะ ซือมียา นะ ตูฮัด ซือมูฮา_ นู ดูโดะ ราตา เดะ โซะ นังฆรี อาคายา_ ฌูฆา เลอ.

² มีตา เดะ ตูฮัด นู อาโปก นะ กีตา_ มีตา เดะ ตูฮัด เยซู คริด_ นะ บรี ซือลามัจ กะ กาเญา_ นะ บรี กาเญา ดูโดะ ซือนัง ซือลามัจ เลอ.

เปาโล บรี ซือลามัจ กะ ตูฮัด เดะ อาตัซ

³ ปูฌี กะ ตูฮัด_ อาโปก เดะ เยซู คริด_ ตูฮัด นะ กีตา_ นู ฌาดี อาโปก ตือจีฮัด ซูโงฮ_ ฌาดี ตูฮัด นู ปูโฌะ ฮาตี_ ราตา ฌือแนฮ.

⁴ ญา เลอ_ นู ปูโฌะ ฮาตี นะ กามี เดะ ลาฆู ซูซัฮ_ ราตา ฌือแนฮ นะ กามี_ บีดา กามี นะ บือเลฮ ปูโฌะ ฮาตี นะ โกะ ซือมียา อาซิก_ นู อาดา ลาฆู ซูซัฮ ปายัฮ มานามา. ตูฮัด ปูโฌะ ฮาตี นะ กามี กะฮามี ดัฮ เตอ_ กามี โปด นะ บือเลฮ ปูโฌะ ฮาตี นะ กูญา กะฆีเตอ เลอ.

⁵ ซาเบะ จะ_ นู กามี อาดา บาฮาเฆด บาญะ_ เดะ ลาฆู ซูซัฮ นะ เยซู คริด กะฮามี เตอ_ กามี อาดา บาฮาเฆด บาญะ_ เดะ ลาฆู ปูโฌะ ฮาตี กรานา เยซู คริด_ กะฆีเตอ ฌูฆา เลอ.

⁶ นู กามี ตาฮัด ซูซัฮ ปายัฮ เตอ_ บีดา นะ ปูโฌะ ฮาตี นะ กาเญา_ บรี อาดา ลาฆู ฮีโดะ ซูโงฮ. นู กามี บือเลฮ ซาโมจ ลาฆู ปูโฌะ ฮาตี โปด_ บีดา นะ ปูโฌะ ฮาตี นะ กาเญา ฌูฆา เลอ. ซาเบะ กะฆีเตอ_ กาลา กาเญา ตาฮัด ซูซัฮ_ ซือรูปา บือกะ กามี บือเลฮ ตาฮัด อีตู เตอ_ กาเญา นะ ลาวัด ตาฮัด ฮาตี บือเลฮ.

⁷ กะฆีเตอ_ กามี จาดัก บือตือตู เดะ กาเญา เตอ_ ซาเบะ ตาฮู จะ_ กาเญา อาดา บาฮาเฆด เดะ ลาฆู ซูซัฮ นะ กามี กะฮามี โปด_ กาเญา นะ บือเลฮ บาฮาเฆด เดะ ลาฆู ปูโฌะ ฮาตี นะ กามี กะฆีเตอ เลอ.

⁸ กะฆีเตอ_ โกะ ดีบราดี เออ_ กามี บือคานะ นะ บรี กาเญา ตาฮู_ ปาซัน ลาฆู ซูซัฮ ปายัฮ นู บือฌาดี เดะ กามี_ เดะ โซะ นังฆรี เอเซีย_ นู บูวัจ บรี กามี ปือนัจ ฮาตี ซูโงฮ_ ฆามะ จะ นะ ตาฮัด เตด บียัซ ดัฮ_ ฌู กามี ฮอย จาดัก นู นะ บือเลฮ ฮีโดะ เลอ.

⁹ โงฮซูโงฮ_ กามี อาคา จะ_ กามี นะ กือนา บูนอฮ มาตี ดัฮ เตอ. ตาปี นู บือฌาดี กะฆีเตอ โปด_ บีดา ตีเมา บรี กามี ฮาระ กะ ญาวา นะ ตะอาซิก_ ตาปี บรี ฮาระ กะ ตูฮัด เดะ อาตัซ_ ญา เลอ_ นู บูวัจ บรี โกะ ซือมียา นู มาตี ดัฮ_ นะ ฮีโดะ ปาเระ.

¹⁰ ตูฮัด ญา ตูโลก กามี บรี ลือปัซ ดัฮ_ เดะ ลาฆู ฌาฮานัม_ ญา นะ ตูโลก กามี บรี ลือปัซ ปูลัก เลอ. กามี บือเลฮ ตือตู ฮาตี เดะ ตูฮัด จะ_ ญา นะ ตูโลก กามี ปูลัก_

¹¹ บือกะ นู กาเญา ปาคัจ ตูโลก บือซาโวจ บีดา กามี. นู อาดา ซือมียา บาญะ บือซาโวจ บีดา กามี_ ตูฮัด ญา นะ ตีกัฮ_ นะ บรี ซือลามัจ กะ กามี. กะฆีเตอ โกะ ซือมียา บาญะ นะ บรี ซือลามัจ กะ ตูฮัด_ กรานา กามี เลอ.

ซาเบะ นามา เปาโล เตด บือเลฮ ปี มียา กูญา

¹² นี เลอ_ กามี อาดา ลาฆู นะ งันตืองัน กะฆีนี. ฌาดี จะ_ ฮาตี นะ กามี_ บรี กามี ตาฮู ตือตู จะ_ ลาฆู ปือบูวัจ นะ กามี เดะ ดือนียา อีนี เตอ_ กามี บือเลฮ บูวัจ ฌางัน ฮาตี นู รือมัก_ ฮาตี นู จรัฮ ซูโงฮ_ นู มาแรฮ ดาตัก เดะ ตูฮัด. ลือเบฮ เดะ ซาปา อาซิก_ กามี บือเลฮ บูวัจ กะฆีเตอ_ ฌางัน กาเญา เลอ. กามี เตด บือเลฮ ตูโรจ กะ อากัน นะ อูมัจ ซือมียา_ ตาปี ตูโรจ บือกะ ลาฆู นู ตูฮัด ฮาลัย บรี ซือลามัจ กะ กามี ดัฮ.

^13-14 ซาเบะ จะ_ กามี เตด ฆาแรฮ ลาฆู อาซิก รอจ กะ กาเญา_ ลือเบฮ ซา เดะ ลาฆู นู กาเญา บาจา บือเลฮ_ มาโซะ เดะ ฮาตี บือเลฮ. มีเซ จะ เดะ วะตู อีนี_ กาเญา บือเลฮ มาโซะ เดะ ฮาตี แนฮ ซือตืองัฮ ดัฮ_ ตาปี กู บรีงัจ จาดัก จะ_ กาเญา นะ มาโซะ เดะ ฮาตี บรี ปือนอฮ บาฌิ เลอ. กะฆีเตอ_ เดะ อารี นู เยซู_ ตูฮัด นะ กีตา_ นะ บาลิ ปาเระ_ กาเญา โปด นะ งันตืองัน เดะ กามี_ บือกะ กามี ฌูฆา_ นู งันตืองัน เดะ กาเญา.

¹⁵ กรานา กู ตือตู ฮาตี ดัฮ_ เดะ ลาฆู อีตู ซีงี_ กะฆีเตอ ลามูลา กู อีงัจ จะ_ นะ ปี ฌือเงาะ ลีฮัจ ลูมอฮ กาเญา ดูลู_ บีดา กาเญา นะ บือเลฮ ซาโมจ ลาฆู ซือลามัจ ดูวา กาลี เลอ.

¹⁶ กู อีงัจ จะ_ นะ ซีงัฮ ลีฮัจ ลูมอฮ กาเญา_ ตืองัฮ กู บือฌาลัด ปี กะ นังฆรี มาซิโดเนีย. ลือปัซ อีตู_ ตานา บาลิ ปาเระ เดะ นังฆรี มาซิโดเนีย_ กู นะ ซีงัฮ ลีฮัจ ลูมอฮ กาเญา ปูลัก_ บีดา กาเญา นะ บือเลฮ ตูโลก_ อาตัจ บรี กู ปี_ กะ นังฆรี ยูเดีย.

¹⁷ นู กู อีงัจ นะ บูวัจ กะฆีเตอ ดัฮ_ กู บรีงัจ ปี มาแรฮ บาญะ เฆอ? ลาฆู บรีงัจ นะ กู_ ซือรูปา บือกะ นะ โกะ อูมัจ ซือมียา ราตา เฆอ? บูกัด กู ฌาดี บือกะ ซือมียา นู ซัจ มือเลา จะ “เออ_ เออ_ นะ ปี” ซัจ จะ “เตด ปี.”

¹⁸ บือกะ ตูฮัด เดะ อาตัซ ญา รือมัก ซูโงฮ เตอ_ ปือมือเลา นู กามี มือเลา ฌางัน กาเญา โปด_ บูกัด กามี ซัจ มือเลา ซาโงะ_ ซัจ มือเลา กีปัซ กะฆีเตอ.

¹⁹ ซาเบะ จะ_ เยซู คริด_ นู นานะ นะ ตูฮัด เดะ อาตัซ เตอ_ ญา บูกัด ฌาดี ซือมียา นู ซัจ มือเลา ซาโงะ_ ซัจ มือเลา กีปัซ. ญา เลอ นู กามี ตีฆา อูรัก_ จะ_ กู ฌางัน ซีลา ฌางัน ทิโมที_ บือเลฮ มือญาเระ_ บรี กะ ลูมอฮ กาเญา เตอ_ ญา ฌาดี บือกะ ปือมือเลา นู ซาโงะ นะ ตูฮัด ซือลาลู เลอ.

²⁰ ซาเบะ จะ_ ปือมือเลา บือฌาญี นะ ตูฮัด ซือมูฮา_ ญา ซาโงะ ฌาดี ซูโงฮ กรานา เยซู. ซาเบะ กะฆีนี_ กีตา มือเลา จะ_ “อาเมน” เดะ ปือนามา นะ เยซู คริด_ ฌาดี ลาฆู ปูฌี มือโอจ กะ ตูฮัด เดะ อาตัซ เลอ.

²¹ ตูฮัด เตอ เลอ_ นู บูวัจ บรี กามี ฌางัน กาเญา_ ดูโดะ กือฌะ กือมัซ ดัฮ_ ลือกัจ บือซามา ฌางัน เยซู คริด. ตูฮัด เลอ_ นู ตืองะ กีตา ดัฮ_ บีดา ฌาดี ซือมียา บือกรือฌา นะ ญา.

²² ญา บือเลฮ ตาแปะ มือกรา นะ ญา เดะ กีตา ดัฮ. ญา บรี ซือมืองัจ นะ ญา มาแรฮ ดูโดะ เดะ ฮาตี นะ กีตา_ ฌาดี บือกะ รือฆา อูปัฮ ดูลู_ เดะ ลาฆู ซือมูฮา นู ญา นะ บรี กะ กีตา.

²³ มีตา เดะ ตูฮัด บรี ฌาดี ซะซรี_ ปาซัน ลาฆู โซะ ฮาตี นะ กู จะ_ นู กู เตด ปี รอจ นังฆรี โกริน เตอ_ บีดา ตีเมา นะ บือฆาโดฮ กาเญา ลาฆี เลอ.

²⁴ บูกัด จะ กามี ฌาดี บือกะ ตกเก_ นู นะ ปรือกัด กาเญา บรี ปือจายา กะฮามี. ตาปี จะ_ กามี ฌาดี ซือมียา บือกรือฌา บือซามา_ บีดา นะ บรี กะ กาเญา ซูกา ฮาตี_ ซาเบะ กาเญา ตือตู ฮาตี ปือจายา กะ เยซู ดัฮ.