2 จรือตา 1 - ซูรัจ ปือมือเลา นะ ตูฮัดปือมือเลา บือซาโวจ นะ ซาโลมอน บีดา มีตา ลาฆู ปานัย อากัน ( 1 ราฌา 3.3-15 ) 1 ซาโลมอน_ นานะ นะ ราฌา ดาวิด_ ญา บูวัจ บรี ญาวา นะ ญา กือฌะ กือมัซ_ ปือบือลา นังฆรี นะ ญา. ตูฮัด บือซัยํ เดะ อาตัซ_ ตูฮัด นะ ญา โปด_ อาดา ดูโดะ บือซามา ฌางัน ญา_ บูวัจ บรี กะ ญา บือซัยํ ซือรูโลยํ. 2 ซาโลมอน มือเลา ฌางัน ลูมอฮ อิซราเอน ซือมูฮา_ มือเลา ฌางัน โกะ กือปาลา ตาฮัน ซือรีบู อูรัก_ ฌางัน โกะ กือปาลา ตาฮัน ซือราตุซ อูรัก_ ฌางัน โกะ ซือมียา กรัจ ฮูโกบ_ ฌางัน กือปาลา นะ ลูมอฮ อิซราเอน ซือมูฮา_ นู ฌาดี กือปาลา เดะ บือแนฮ นะ กูญา. 3 กะฆีเตอ_ ซาโลมอน ฌางัน โกะ ลูมอฮ ซือมียา ซือมูฮา_ นู ดูโดะ ฌางัน ญา_ กูญา ปี กะ ตือปัจ กรามัจ เดะ นังฆรี กิเบโอน_ กรานา รูมัฮ ซาเราะ บือฌาญี บือดาปัจ นะ ตูฮัด_ อาดา เดะ ตือปัจ อีตู เลอ. มูซา นู ฌาดี ปราโซฮ นะ ตูฮัด บือซัยํ เดะ อาตัซ_ ญา บือเลฮ บูวัจ รูมัฮ ซาเราะ อีตู_ เดะ ตือปัจ ตานัฮ ตูโฮยํ นู ลือฆา. 4 (ตาปี ราฌา ดาวิด_ ญา บือเลฮ บาวา ปือตี ปือมือเลา บือฌาญี บือตือตู นะ ตูฮัด_ มาแรฮ ดาตัก เดะ คีริยัด-ยะอาริม_ รอจ กะ ตือปัจ นู ดาวิด ญา บือเลฮ ซียะ ตาโรฮ ดัฮ. กรานา ญา บือเลฮ ตืองะ รูมัฮ ซาเราะ ดัฮ_ บีดา ปือตี อีตู_ เดะ นังฆรี เยรูซาเลม.) 5 ลือเบฮ เดะ อีตู เตอ_ ตือปัจ มือญือมัฮ มัซ ซือวะซา_ นู เบซาเลน_ นานะ นะ อูรี_ นู ฌาดี นานะ นะ ฮูระ_ บือเลฮ บูวัจ ดัฮ_ ญา อาดา เดะ ตือปัจ อีตู โปด_ โซะ ฮือลด มูคา รูมัฮ กาฌัก กาเยด_ มือญือมัฮ กะ ตูฮัด บือซัยํ เดะ อาตัซ. โกะ ซาโลมอน_ ฌางัน ลูมอฮ ซือมียา นะ ญา โปด_ มือโซะ ซารี ตูฮัด. 6 ซาโลมอน ญาแญะ ปี กะ ตือปัจ มือญือมัฮ กะ ตูฮัด_ นู บูวัจ ฌางัน มัซ ซือวะซา_ โซะ ฮือลด มูคา นะ ตูฮัด บือซัยํ เดะ อาตัซ_ นู อาดา เดะ รูมัฮ ซาเราะ บือฌาญี บือดาปัจ. ญา อาเกะ บือนาตัก_ ตูนู มือญือมัฮ_ ซือรีบู อีโกยํ_ เดะ อาตัซ ตือปัจ มือญือมัฮ อีตู. 7 เดะ มาลับ อีตู_ ตูฮัด ญา ปลีฮัจ กะ ซาโลมอน_ มือเลา ฌางัน ญา จะ_ “เกา บือคานะ นะ บรี กู_ บรี นามา กะ เกา? กือนา มีตา มาแรฮ เลอ.” 8 ราฌา ซาโลมอน โปด_ ญา มือเลา ฌางัน ตูฮัด จะ_ “ตูฮัด เออ_ เกา บือเลฮ ปลีฮัจ ลาฆู ซายัก นู กือฌะ กือมัซ_ นู บือซัยํ โตระ_ กะ ราฌา ดาวิด_ ปะ เดะ กู. เกา บือเลฮ บูวัจ บรี กู ฌาดี ราฌา ฆาตี ปะ เดะ กู เลอ. 9 โอ ตูฮัด_ ตูฮัด บือซัยํ เดะ อาตัซ เออ_ บรี กะ ปือมือเลา บือฌาญี อีตู_ นู ตูฮัด บือเลฮ มือเลา ดัฮ ฌางัน ดาวิด_ ปะ เดะ กู_ ฌาดี ลาฆู ซูโงฮ_ เดะ วะตู อีนี. ซาเบะ เกา บือเลฮ อาเกะ ตืองะ กู ดัฮ_ ฌาดี ราฌา นะ ลูมอฮ ซือมียา นู บาญะ_ บือกะ ตานัฮ ฮาบู เดะ ดือนียา. 10 มีตา บรี กู อาดา ลาฆู ปานัย อากัน_ อาดา ลาฆู ตาฮู ซูโงฮ_ บีดา นะ ปือบือลา โซะ ฮือลด มูคา นะ โกะ ลูมอฮ บักซา อีนี_ กรานา จะ_ ซาปา เลอ_ นู นะ กรัจ ฮูโกบ โกะ ลูมอฮ ซือมียา นะ ตูฮัด_ นู อาดา บาญะ โตระ อีนี_ บือเลฮ เลอ?” 11 ตูฮัด มือเลา ตีกัฮ กะ ซาโลมอน จะ_ “กรานา ลาฆู อีนี อาดา เดะ ฮาตี นะ เกา_ นู เกา ฮอย เตด บือเลฮ มีตา ซือบารัก บรือฆา_ ลาฆู กายา_ ลาฆู บรี กือนา มือโอจ_ เฆอ จะ_ นะ บรี โกะ ลูมอฮ ซือมียา นู บือชี กะ เกา นะ มาตี_ นู เกา ฮอย เตด บือเลฮ มีตา บรี อาดา ฮีโดะ ปาญัก ปี ซือรูโลยํ_ ตาปี เกา มีตา ลาฆู ปานัย อากัน_ ลาฆู ตาฮู_ บีดา ญาวา ตะอาซิก_ บีดา เกา นะ บือเลฮ กรัจ ฮูโกบ โกะ ลูมอฮ ซือมียา นะ กู_ ซือมียา นู กู บือเลฮ อาเกะ ตืองะ ดัฮ บรี ฌาดี ราฌา_ เดะ อาตัซ กูญา ซือมูฮา 12 กะฆีเตอ กู นะ บูวัจ บรี เกา อาดา ลาฆู ปานัย อากัน_ อาดา ลาฆู ตาฮู ซูโงฮ_ กู นะ บรี โกะ ซือบารัก บรือฆา_ บรี เกา กายา_ กือนา มือโอจ ฌูฆา_ บือกะ ฮอย ราฌา นู ฌาดี_ ดูลู เดะ เกา_ อาดา ดัฮ_ ฮอย ซาปา นู ลือปัซ บลากัก เดะ เกา_ ปูลัก นะ ฌาดี บือกะ เกา เลอ.” 13 กะฆีเตอ ซาโลมอน_ ญา ดาตัก เดะ ตือปัจ กรามัจ_ เดะ นังฆรี กิเบโอน_ ดาตัก เดะ โซะ ฮือลด รูมัฮ ซาเราะ บือฌาญี บือดาปัจ_ มาแรฮ กะ นังฆรี เยรูซาเลม. กะฆีเตอ_ ญา ฌาดี ราฌา อาตัซ โกะ ลูมอฮ อิซราเอน. ปาซัน ลาฆู โกะ ตาฮัน_ ฌางัน ลาฆู บือฌูวัน_ นะ ซาโลมอน ( 1 ราฌา 10.26-29 ; 2 จรือตา 9.25-28 ) 14 ราฌา ซาโลมอน ญา ปือมุน โกะ ซือตรี บือปรัก ฌางัน โกะ ตาฮัน กูดา_ บูวัจ บรี กะ ญา อาดา ซือตรี กูดา ซือรีบู ปัจ ราตุซ (1,400) บูวัฮ_ โกะ ตาฮัน กูดา ซือละซา ดูวา รีบู (12,000) อูรัก_ นู ญา บรี ดูโดะ ตูงู_ โซะ โกะ ตูโปะ ตาโรฮ ซือตรี กูดา_ ฌางัน เดะ นังฆรี เยรูซาเลม ดาปิก ราฌา ฌูฆา. 15 ราฌา ญา บูวัจ บรี ปีระ ฌางัน มัซ อีตู_ ฌาดี ซือบารัก นู กรือจัย ปี_ ราตา เดะ นังฆรี เยรูซาเลม_ ซือรูปา บือกะ บาตู_ ญา บูวัจ บรี กะ ปูโฮด รู ซีดา_ อาดา บาญะ_ ซือรูปา บือกะ ปูโฮด กือดูโนด_ เดะ โซะ ตือปัจ ตานัฮ รือนัฮ. 16 โกะ กูดา นู ฌาดี โกะ ซือบารัก มาโซะ นังฆรี_ นะ ราฌา ซาโลมอน_ มาแรฮ ดาตัก เดะ นังฆรี อียิบ_ ฌางัน นังฆรี คูเอ. โกะ ซือมียา ฌูวัน บารัก นะ ราฌา โปด_ บือเลฮ อาเมด มาแรฮ ดาตัก เดะ คูเอ_ ตูโรจ กะ รือฆา นะ ญา เลอ. 17 กูญา นะ บาวา โกะ ซือบารัก_ มาแรฮ ดาตัก เดะ นังฆรี อียิบ_ ฌูวัน กะ นังฆรี อาซิก ปูลัก. ซือตรี บือปรัก อาดา รือฆา บือลี นัม ราตุซ (600) รีเงะ ปีระ_ กูดา ซา อีโกยํ_ ซือราตุซ ลีมา ปูโลฮ (150) รีเงะ เตอ. โกะ ซือมียา ฌูวัน_ กูญา นะ อาตัจ ฌูวัน ปี ปูลัก_ กะ โกะ ราฌา ซือมูฮา_ นะ ลูมอฮ เฮด_ ฌางัน โกะ ราฌา นังฆรี ซีเรีย. |