1 ซามูเอน 1 - ซูรัจ ปือมือเลา นะ ตูฮัด

ซามูเอน ดูโดะ เดะ อาปี

¹ อาดา กีลากี ซา อูรัก_ นู ฌาดี ลูมอฮ บักซา รามาทายิม-โซฟิม_ เดะ โซะ บูเกะ เอฟราอิม_ นู ปือนามา จะ เอนกานัฮ. ญา เตอ_ ฌาดี นานะ นะ เยโรฮัม_ นู ฌาดี นานะ นะ เอลีฮู. เอลีฮู ญา ฌาดี นานะ นะ โทฮู_ โทฮู ญา ฌาดี นานะ นะ ซูบ_ ซือมียา ลูมอฮ เอฟราอิม.

² เอนกานัฮ_ ญา อาดา บีนี ดูวา อูรัก. นู ซืออูรัก ปือนามา ฮันนา_ นู ซืออูรัก ปูลัก_ ปือนามา จะ_ ปือนินนา. ปือนินนา ญา อาดา นานะ_ ตาปี ฮันนา เตอ_ ญา ฮอย นานะ เลอ.

³ โซะ กีลากี อีนี_ ญา ดือละ ตีงัน นังฆรี นะ ญา_ บีลัก ตาโฮด_ ปี อาเกะ โกะ ซือบารัก มือญือมัฮ มือนืองะ กะ ตูฮัด บือซัยํ เดะ อาตัซ_ ตูฮัด นู มือฆัฮ_ เดะ นังฆรี ซีโลฮ. เดะ ตือปัจ อีตู_ อาดา นานะ นะ เอลี_ ดูวา บราดี_ ปือนามา โฮบนี ฌางัน ฟีเนฮัด_ กูญา เตอ_ ฌาดี ซามี นะ ตูฮัด บือซัยํ เดะ อาตัซ เลอ.

⁴ เดะ อารี นู เอนกานัฮ_ ญา อาเกะ บือนาตัก มือญือมัฮ มือนืองะ เตอ_ ญา บือเลฮ ปาฮาฆิ ซือตืองัฮ_ บรี กะ ปือนินนา_ บีนี นะ ญา_ ฌางัน โกะ นานะ กีลากี_ นานะ นีบีนี นะ ญา ราตา อูรัก.

⁵ ญา เตอ_ บือเลฮ ปาฮาฆิ_ บรี กะ ฮันนา_ ดูวา บาฮาเฆด_ ซาเบะ ญา ซายัก โตระ กะ ฮันนา_ มีเซ จะ ตูฮัด บือซัยํ เดะ อาตัซ_ บือเลฮ บูวัจ บรี ฮันนา_ ญา ฌาดี ซือมือโฆจ_ บูวัจ บรี กะ ญา ฮอย เตด บือโปรจ เลอ.

⁶ ปือนินนา_ บีนี นู ซา เตอ_ มือเลา มืออาฌะ โตระๆ_ บีดา นะ บรี ฮันนา ญา มูซัยํ_ ซาเบะ ตูฮัด บือเลฮ บูวัจ บรี กะ ญา ฌาดี ซือมือโฆจ.

⁷ ลาฆู อีนี อาดา บือฌาดี กะฆีนี_ บีลัก ตาโฮด_ กาลา ดีฮา นู ญา ญาแญะ ปี กะ รูมัฮ มือญือมัฮ นะ ตูฮัด บือซัยํ เดะ อาตัซ. บีนี นู ซา โปด_ มือเลา มืออาฌะ กะ ญา. ซาเบะ กะฆีเตอ_ ฮันนา ญา มือนาแงฮ_ ตีเมา นะ มากัด นาซี.

⁸ กะฆีเตอ เอนกานัฮ_ ลากี นะ ญา_ ตาญา จะ_ “ฮันนา เออ_ เกา มือนาแงฮ บูวัจ นามา? บูวัจ นามา เกา ฮอย เตด มากัด นาซี? เกา ซูซัฮ ฮาตี บูวัจ นามา? นู เกา อาดา กู เตอ_ ฮอย เตด บาฌิ_ ลือเบฮ เดะ โกะ นานะ กีลากี_ ซือปูโลฮ อูรัก เฆอ?”

⁹ กาลา ซูดัฮ มากัด นาซี_ โอะ โกะ อาเย_ เดะ นังฆรี ซีโลฮ ดัฮ_ ฮันนา โปด_ บีกัซ. โซะ เอลี_ นู ฌาดี ซามี เตอ_ ญา อาดา ดูโดะ เดะ ปาปัด กรือซี_ บีดิก จาวัก ปีตู_ รูมัฮ มือญือมัฮ ตูฮัด.

¹⁰ นีบีนี อีตู_ ญา ซูซัฮ ฮาตี โตระ_ บือซาโวจ กะ ตูฮัด บือซัยํ เดะ อาตัซ_ ซาแมน มือนาแงฮ บือปาโตด เลอ.

¹¹ ญา อาเกะ มือเลา จะ_ “โอ ตูฮัด บือซัยํ เดะ อาตัซ_ ตูฮัด นู มือฆัฮ_ ดัฮ เกา นะ อีงัจ ซือซูโงฮ_ กะ ลาฆู ซูซัฮ ฮาตี นะ กู_ นู ฌาดี ปราโซฮ นะ เกา_ นะ ฮอย เตด ลูปา กะ ปราโซฮ นะ เกา_ ตาปี นะ บรี นานะ กีลากี ซืออูรัก_ บรี กะ กู เลอ_ กู โปด_ นะ อาเกะ นานะ อีตู_ มือญือมัฮ กะ ตูฮัด ปี ซือลาลู. โบะ นะ ญา โปด_ นะ ฮอย เตด ดือละ กือนา กูโกยํ เลอ.”

¹² กาลา ญา ตืองัฮ บือซาโวจ กะ ตูฮัด เตอ_ เอลี โปด_ ญา ตีญุง ลีฮัจ มูโลจ นะ ญา.

¹³ โซะ ฮันนา เตอ_ ญา มือเลา ซา เดะ ฮาตี_ ตาปี มูโลจ นะ ญา กือมุจๆ_ ฮอย เตด ตรือเบะ ซือวารา. ซาเบะ กะฆีนี_ เอลี บรีงัจ จะ_ ญา มาโบะ.

¹⁴ กะฆีเตอ เอลี_ มือเลา ฌางัน ญา จะ_ “เกา นะ มาโบะ ลามา ตารา ดีฮา? กือนา ตีงัน บูวัก โกะ อาระ อางุน เลอ.”

¹⁵ ตาปี ฮันนา ตีกัฮ จะ_ “บูกัด กะฆีเตอ เลอ_ จา เออ. กู ฌาดี นีบีนี นู ซูซัฮ โตระ. บูกัด กู มากัด อาระ อางุน_ เฆอ จะ_ โกะ ซือบารัก มาโบะ_ ตาปี กู ปลือปัซ ลาฆู เดะ ฮาตี นะ กู_ โซะ ฮือลด มูคา นะ ตูฮัด บือซัยํ เดะ อาตัซ.

¹⁶ มีตา ฌางัน อีงัจ จะ_ กู นู ฌาดี ปราโซฮ นีบีนี นะ เกา_ ฌาดี นีบีนี ตะอารัฮ. นู กู อาดา มือเลา ตารา อีนี เตอ โปด_ ฌาดี ลาฆู บรีงัจ บาญะ_ ฌางัน ลาฆู ซูซัฮ เดะ ฮาตี โตระ เลอ.”

¹⁷ กะฆีเตอ เอลี โปด_ ตีกัฮ จะ_ “มีตา บรี กะ เกา บาลิ ปี_ ซือนัง ซือลามัจ เลอ. มีตา บรี กะ ตูฮัด นะ ลูมอฮ อิซราเอน_ นะ บรี บือกะ นู เกา บือเลฮ บือซาโวจ_ มีตา เดะ ญา เลอ.”

¹⁸ กะฆีเตอ นีบีนี อีตู ตีกัฮ จะ_ “มีตา บรี ปราโซฮ นีบีนี นะ เกา_ นะ กือนา เดะ ฮาตี นะ เกา เลอ.” กะฆีเตอ นีบีนี อีตู โปด_ ญา ปี ตูโรจ ฌาลัด นะ ญา_ ปี มากัด นาซี. โซะ มูคา นะ ญา_ อาดา ลาฆู ซูกา ฮาตี_ ฮอย ลาฆู ซูซัฮ ดัฮ.

¹⁹ กูญา ซือมูฮา บีกัซ เดะ วะตู มูกัยํ_ ปี มือญือมัฮ กะ ตูฮัด บือซัยํ เดะ อาตัซ. กะฆีเตอ กูญา บาลิ ปี กะ รูมัฮ นะ กูญา_ เดะ ตูโปะ รามา. โซะ เอนกานัฮ_ ญา ปี ตีโนะ บือซามา ฌางัน ฮันนา_ บีนี นะ ญา. ตูฮัด โปด_ บรีงัจ กะ นีบีนี อีตู เลอ_

²⁰ บรี กะ ญา บือโปรจ. กาลา รอจ วะตู นะ ญา_ ฮันนา ญา ดูโดะ เดะ อาปี_ บือเลฮ นานะ กีลากี_ ตืองะ ปือนามา นานะ อีตู จะ_ ซามูเอน_ ซาเบะ ญา มือเลา จะ_ “กู บือเลฮ บือซาโวจ มีตา ญา_ เดะ ตูฮัด บือซัยํ เดะ อาตัซ ดัฮ.”

²¹ โซะ เอนกานัฮ_ ฌางัน ราตา ซือมียา เดะ ซือรูมัฮ นะ ญา โปด_ ปาคัจ ญาแญะ ปี อาเกะ โกะ บือนาตัก มือญือมัฮ มือนืองะ กะ ตูฮัด บือซัยํ เดะ อาตัซ_ ตูโรจ กะ ลาฆู นู บือเลฮ บูวัจ_ บีลัก ตาโฮด. ญา ปี ปลือปัซ นียัจ นะ ญา ฌูฆา เลอ.

²² ตาปี ฮันนา ฮอย เตด บือเลฮ ญาแญะ ปี ซามา_ ซาเบะ ญา มือเลา ฌางัน ลากี จะ_ “กู ฮอย เตด ปี_ ฌู ตือดะ นานะ อีนี ญา นะ บูวัก ดาดา. ลือปัซ อีตู_ กู นะ บาวา ญา_ ญาแญะ ปี_ กะ โซะ ฮือลด มูคา นะ ตูฮัด บือซัยํ เดะ อาตัซ. กู นะ บรี ญา ดูโดะ เดะ ตือปัจ อีตู_ ปี ซือลาลู เลอ.”

²³ เอนกานัฮ_ ลากี นะ ญา_ มือญาเระ จะ_ “กือนา บูวัจ ตูโรจ บือกะ ฮาตี นะ เกา ลีฮัจ จะ_ บาฌิ เลอ. นาตี ฌู ตือดะ นานะ ญา บูวัก ดาดา. ตาปี มีตา บรี ตูฮัด บือซัยํ เดะ อาตัซ นะ บูวัจ บือกะ ปือมือเลา นะ ญา เลอ.”

²⁴ กาลา นานะ อีตู ญา บูวัก ดาดา ดัฮ_ นีบีนี อีตู โปด_ บาวา นานะ_ ปี มารือมา ฌางัน ลือมู บาปา_ ตีฆา อีโกยํ_ ฌางัน ตือโปก ซือปูโลฮ (10) กีโล_ อาดา ฌางัน อาระ อางุน_ ซา บูลี กูเละ บือนาตัก. กะฆีเตอ_ นีบีนี อีตู_ ญา บาวา นานะ ปี_ กะ รูมัฮ มือญือมัฮ ตูฮัด บือซัยํ เดะ อาตัซ_ เดะ ตูโปะ ซีโลฮ. นานะ อีตู โปด_ ญา ดือมิ ลาฆี เลอ.

²⁵ กะฆีเตอ_ กูญา ซือมูฮา โปด_ บูนอฮ ลือมู บาปา_ บาวา นานะ อีตู มาแรฮ ซารี เอลี.

²⁶ นีบีนี อีตู ญา มือเลา จะ_ “โอ จา_ เกา จับ บือเลฮ เฆอ? จา เออ กู นี เลอ_ ฌาดี นีบีนี อีตู_ นู บือเลฮ บือดีรี โซะ ฮือลด มูคา นะ เกา_ อาดา บือซาโวจ รอจ กะ ตูฮัด บือซัยํ เดะ อาตัซ เลอ.

²⁷ กู บือซาโวจ มีตา นานะ อีนี. ตูฮัด โปด_ ญา บือเลฮ บูวัจ ตูโรจ บือกะ นู กู บือเลฮ มีตา ดัฮ.

²⁸ ซาเบะ กะฆีเตอ_ กู ซรัฮ นานะ อีนี_ บรี กะ ตูฮัด บือซัยํ เดะ อาตัซ. กาลา นู ญา อาดา ฮีโดะ ลาฆี_ ญา เตอ_ กือนา ซรัฮ บรี กะ ตูฮัด ดัฮ.” กะฆีเตอ กูญา โปด_ มือญือมัฮ กะ ตูฮัด บือซัยํ เดะ อาตัซ เดะ ตือปัจ อีตู เลอ.