1 ราฌา 1 - ซูรัจ ปือมือเลา นะ ตูฮัด

อาบีชาก บือกรือฌา กะ ดาวิด

¹ ราฌา ดาวิด เตอ_ อูมอยํ นะ ญา บาญะ ดัฮ. มีเซ กูญา นะ อาเมด ฆือบัยํ บรี ญา ซาโปจ_ บาญะ ลาปิฮ โปด_ ฮอย เตด ฮางัจ ดัฮ.

² กะฆีเตอ เลอ_ โกะ ซือมียา บือกรือฌา นะ ราฌา_ มือเลา ฌางัน ญา จะ_ “บรี กามี ปี ซารี นีบีนี_ นู เตด ดือละ บือเลฮ ลากี ลาฆี_ บรี กะ ราฌา_ กือปาลา นะ กามี. บรี กะ ญา บือกรือฌา บีดา ซา ราฌา_ บรี กะ ญา ฮัจลีฮัจ ราฌา_ ตีโนะ เดะ ตาฮะ ดาดา นะ ราฌา_ บรี กะ ราฌา นะ ฮางัจ เลอ.”

³ กะฆีเตอ กูญา มือโซะ ซารี นีบีนี ราดารา นู บือฆาจะ_ ราตา เดะ นังฆรี อิซราเอน_ ดาปัจ ดัฮ_ ราดารา ซืออูรัก_ ปือนามา อาบีชาก_ นีบีนี ลูมอฮ ชูเนม. กูญา เตอ_ บาวา ญา มาแรฮ บรี กะ ราฌา.

⁴ นีบีนี อีตู_ ญา บือฆาจะ ซูโงฮ เลอ_ ญา ดูโดะ ฮัจลีฮัจ บือกรือฌา กะ ราฌา_ ตาปี ราฌา ฮอย เตด ตีโนะ บือซามา ฌางัน ญา.

⁵ โซะ อาโดนียัฮ_ นานะ นะ ดาวิด ฌางัน ฮักกีด_ ญา อาเกะ ญาวา นะ ญา ตะอาซิก มือเลา จะ_ “กู นี เลอ_ นะ ฌาดี ราฌา.” กะฆีเตอ_ ญา ซียะ โกะ ซือตรี บือปรัก_ ฌางัน โกะ ตาฮัน กูดา ปือฆัก ซือตรี บือปรัก_ ฌางัน ลูมอฮ ตาฮัน ลีมา ปูโลฮ (50) อูรัก_ นู นะ บลารี ปี โซะ ฮือลด ญา.

⁶ โซะ ปะ เดะ ญา_ ฮอย เตด ดือละ บลารัก ซือกาลี โปด_ เตด ดือละ ตาญา ญา จะ_ “บูวัจ นามา เกา บูวัจ ลาฆู กะฆีนี?” ญา เตอ_ ฌาดี กีลากี นู บือฆาจะ_ ญา ดูโดะ เดะ อาปี บลากัก อับซาโลม.

⁷ ญา ปี บือกีรา ฌางัน โยอาบ_ นานะ นะ เซรูยัฮ_ ฌางัน อาบียาทา_ นู ฌาดี ซามี. กูญา ดูวา อูรัก โปด_ อาดา ตูโลก บือกรือฌา บรี กะ อาโดนียัฮ.

⁸ ตาปี ซาโดก_ นู ฌาดี ซามี_ ฌางัน เบนัยยา_ นานะ นะ เยโฮยาดา_ อาดา ฌางัน นาทัน_ ซือมียา ตูโดฮ ปือมือเลา นะ ตูฮัด_ ฌางัน ชิเมอี_ ฌางัน เรอี_ ฌางัน โกะ ลูมอฮ ตาฮัน นู บรานี นะ ดาวิด_ กูญา ฮอย เตด ดูโดะ ซือบือลัฮ โซะ อาโดนียัฮ.

⁹ อาโดนียัฮ เตอ_ ญา อาเกะ โกะ กาเมก_ โกะ ลือมู_ ฌางัน โกะ อานะ ลือมู นู ลือมะ_ ฌาดี ซือบารัก มือญือมัฮ_ เดะ บาตู โซเฮเลด_ นู อาดา ดูโดะ ดาปิก เอนโรเกน. ญา เตอ_ บือเลฮ บลาโลก โกะ อาดี บราดี นะ ญา ซือมูฮา_ นู ฌาดี นานะ นะ ราฌา_ ฌางัน โกะ ลูมอฮ ซือมียา เดะ นังฆรี ยูดา_ นู ฌาดี ลูมอฮ ซือมียา บือกรือฌา กะ ราฌา.

¹⁰ ตาปี ญา ฮอย เตด บือเลฮ บลาโลก นาทัน_ ซือมียา ตูโดฮ ปือมือเลา นะ ตูฮัด_ เฆอ จะ_ เบนัยยา_ เฆอ จะ_ โกะ ลูมอฮ ตาฮัน นู บรานี_ เฆอ จะ_ ซาโลมอน_ อาดี เดะ ญา.

¹¹ กะฆีเตอ_ นาทัน มือญาเระ กะ บัดเชบา_ มะ เดะ ซาโลมอน จะ_ “เกา ฮอย เตด ตาฮู เฆอ_ จะ_ อาโดนียัฮ_ นานะ นะ ฮักกีด_ ญา ฌาดี ราฌา ดัฮ? ดาวิด_ กือปาลา นะ กีตา โปด_ ญา ฮอย เตด ตาฮู ลาฆู เลอ.

¹² กะฆีเตอ_ กู นะ มีตา บือกีรา ฌางัน เกา_ บีดา เกา นะ บือเลฮ ตูโลก ญาวา นะ เกา_ ฌางัน ซาโลมอน_ นานะ นะ เกา_ ฌูฆา_ บรี ลือปัซ เดะ มาตี.

¹³ มีตา บรี เกา มาโซะ ปี ซารี ราฌา ดาวิด ดัดๆ_ ตาญา ญา จะ_ ‘โอ ราฌา_ กือปาลา นะ กู เออ_ เกา บือเลฮ อาเกะ มือเลา ฌางัน ปราโซฮ นีบีนี นะ เกา ดัฮ_ บูกัด เฆอ_ จะ_ “ซาโลมอน นานะ นะ เกา_ นะ ปือบือลา นังฆรี ฆาตี กู_ นะ อาดา ดูโดะ เดะ ตือปัจ ดูโดะ นะ ราฌา เลอ” บูกัด เฆอ? บูวัจ นามา อาโดนียัฮ ญา ปือบือลา ฌาดี ราฌา ดัฮ เลอ?’

¹⁴ ลีฮัจ เลอ_ วะตู เกา ตืองัฮ มือญาเระ กะ ราฌา_ กู นะ ตูโรจ มาโซะ ปี กะ ราฌา_ นะ มือญาเระ บรี ลีฮัจ จะ_ ปือมือเลา นะ เกา ซูโงฮ เลอ.”

¹⁵ กะฆีเตอ บัดเชบา โปด มาโซะ ปี ซารี ราฌา_ เดะ รูวัก นู ญา ตีโนะ. ราฌา เตอ_ ญา ตูฮา โตระ ดัฮ. อาบีชาก_ นีบีนี ลูมอฮ ชูเนม_ ญา โปด_ ตืองัฮ บือกรือฌา บรี กะ ราฌา.

¹⁶ กาลา บัดเชบา ญา ตือมะ มือญือมัฮ กะ ราฌา ดัฮ_ ราฌา โปด_ ตาญา ญา จะ_ “เกา บือคานะ นามา เลอ?”

¹⁷ กะฆีเตอ บัดเชบา_ ญา มือเลา ฌางัน ราฌา จะ_ “โอ กือปาลา นะ กู เออ_ เกา บือเลฮ อาเกะ มือเลา บือฌาญี เดะ ปือนามา นะ ตูฮัด บือซัยํ เดะ อาตัซ_ ตูฮัด นะ เกา_ โซะ ฮือลด มูคา นะ ปราโซฮ นีบีนี นะ เกา จะ_ ‘ซาโลมอน_ นานะ นะ เกา_ ญา นะ ฌาดี ราฌา ลือปัซ เดะ กู_ ญา นะ บือเลฮ ดูโดะ เดะ ตือปัจ ดูโดะ นะ ราฌา เลอ.’

¹⁸ ลีฮัจ เลอ_ วะตู อีนี อาโดนียัฮ ญา ฌาดี ราฌา ดัฮ_ มีเซ จะ ราฌา_ กือปาลา นะ กู โปด_ ฮอย เตด ตาฮู เลอ.

¹⁹ ญา เตอ_ บือเลฮ บูนอฮ โกะ ลือมู_ โกะ อานะ ลือมู นู ลือมะ_ ฌางัน โกะ กาเมก_ บาญะ อีโกยํ_ ฌาดี ซือบารัก มือญือมัฮ เลอ. ญา บือเลฮ บลาโลก โกะ นานะ นะ ราฌา_ ฌางัน อาบียาทา นู ฌาดี ซามี_ ฌางัน โยอาบ นู ฌาดี กือปาลา ตาฮัน. ตาปี ซาโลมอน_ นู ฌาดี ปือญูโรฮ นะ ราฌา เตอ_ ญา ฮอย เตด บือเลฮ บลาโลก เลอ.

²⁰ โอ ราฌา_ กือปาลา นะ กู เออ_ วะตู อีนี โกะ ลูมอฮ อิซราเอน ซือมูฮา_ กูญา ตีญุง ลีฮัจ กะ เกา_ บีดา นะ บรี เกา มือเลา ฌางัน กูญา จะ_ นะ บรี กะ ซาปา ดูโดะ เดะ อาตัซ ตือปัจ ดูโดะ นะ ราฌา_ กือปาลา นะ กู_ ฆาตี เกา เลอ.

²¹ เตด กะฆีเตอ_ นะ ฌาดี บือกะฆีนี_ ฌาดี จะ_ กาลา ราฌา กือปาลา นะ กู_ มาตี ปี ดูโดะ ฌางัน โกะ บีลาแก นะ ญา เตอ_ กูญา นะ กีรา จะ_ กู ฌางัน ซาโลมอน นานะ นะ กู_ ฌาดี ซือมียา นู ซาลัฮ เลอ.”

²² กาลา บัดเชบา_ ญา ตืองัฮ มือเลา ฌางัน ราฌา เตอ_ นาทัน ซือมียา ตูโดฮ นะ ตูฮัด โปด_ มาโซะ มาแรฮ.

²³ กะฆีเตอ_ กูญา มือญาเระ กะ ราฌา จะ_ “นี เลอ_ นาทัน_ ซือมียา ตูโดฮ ปือมือเลา นะ ตูฮัด.” กาลา นาทัน ญา มาโซะ มาแรฮ โซะ ฮือลด มูคา นะ ราฌา_ ญา โปด_ ตือมะ มูคา รอจ กะ ตานัฮ_ มือญือมัฮ กะ ราฌา.

²⁴ นาทัน เตอ_ ญา มือญาเระ กะ ราฌา จะ_ “โอ ราฌา_ กือปาลา นะ กู_ เกา บือเลฮ มือเลา กะฆีนี ดัฮ เฆอ_ จะ_ ‘อาโดนียัฮ ญา นะ บือเลฮ ปือบือลา นังฆรี ลือปัซ เดะ กู_ ญา นะ ดูโดะ เดะ ตือปัจ ดูโดะ นะ ราฌา ฆาตี กู’?

²⁵ ซาเบะ อารี อีนี_ นานะ นะ ราฌา อีตู บือเลฮ ตูโรด ปี_ บูนอฮ โกะ ลือมู_ โกะ อานะ ลือมู นู ลือมะ_ ฌางัน โกะ กาเมก_ บาญะ อีโกยํ_ ฌาดี ซือบารัก มือญือมัฮ. ญา บือเลฮ บลาโลก โกะ นานะ นะ ราฌา_ โกะ กือปาลา ตาฮัน_ ฌางัน อาบียาทา นู ฌาดี ซามี. ลีฮัจ เลอ_ กูญา ตืองัฮ โอะ มากัด_ โซะ ฮือลด มูคา นะ ญา_ มือเลา จะ_ ‘บรี กะ ราฌา อาโดนียัฮ_ ซือนัง ซือลามัจ เลอ.’

²⁶ ตาปี โซะ กู_ นู ฌาดี ปือญูโรฮ นะ เกา_ ฌางัน ซาโดก นู ฌาดี ซามี_ ฌางัน เบนัยยา_ นานะ นะ เยโฮยาดา_ ฌางัน ซาโลมอน นู ฌาดี ปือญูโรฮ นะ เกา ฌูฆา_ ญา ฮอย เตด บลาโลก เลอ.

²⁷ ลาฆู กะฆีนี บือฌาดี_ กรานา ราฌา กือปาลา นะ กู ปือซัด เฆอ? เกา เตอ_ ฮอย เตด บือเลฮ มือญาเระ กะ โกะ ปือญูโรฮ นะ เกา จะ_ นะ บรี กะ ซาปา ดูโดะ เดะ ตือปัจ ดูโดะ นะ ราฌา_ ลือปัซ เดะ ราฌา นู กือปาลา นะ กู เฆอ?”

ซาโลมอน ฌาดี ราฌา

²⁸ กะฆีเตอ ราฌา ดาวิด ตีกัฮ จะ_ “กือนา บลาโลก บัดเชบา_ บรี กะ ญา มาแรฮ ซารี กู.” บัดเชบา โปด_ มาโซะ ปี บือดีรี โซะ ฮือลด มูคา นะ ราฌา.

²⁹ กะฆีเตอ_ ราฌา ญา อาเกะ มือเลา บือฌาญี บือตือตู จะ_ “ตูฮัด บือซัยํ เดะ อาตัซ_ ญา อาดา ฮีโดะ กะฮามี_ ญา เลอ_ นู ตือบุซ ญาวา นะ กู_ บรี ลือปัซ เดะ ลาฆู ซูซัฮ ปายัฮ ซือมูฮา เลอ_

³⁰ บือกะ นู กู บือเลฮ อาเกะ มือเลา บือฌาญี ฌางัน เกา_ เดะ ปือนามา นะ ตูฮัด บือซัยํ เดะ อาตัซ_ ตูฮัด นะ อิซราเอน_ จะ_ ‘ซาโลมอน_ นานะ นะ เกา_ นะ บือเลฮ ปือบือลา นังฆรี ลือปัซ เดะ กู ซูโงฮ เลอ_ ญา นะ อาดา ดูโดะ เดะ ตือปัจ ดูโดะ นะ ราฌา_ ฆาตี กู’ กู เตอ_ นะ บูวัจ บรี ฌาดี กะฆีเตอ_ เดะ อารี อีนี เลอ.”

³¹ กะฆีเตอ บัดเชบา_ ญา ตือมะ มูคา รอจ กะ ตานัฮ_ มือญือมัฮ กะ ราฌา_ มือเลา จะ_ “บรี กะ ราฌา ดาวิด_ กือปาลา นะ กู_ อาดา ดูโดะ ซือนัง ซือลามัจ ปี ซือลาลู เลอ.”

³² กะฆีเตอ_ ราฌา ดาวิด มือเลา จะ_ “กือนา บลาโลก ซาโดก นู ฌาดี ซามี_ ฌางัน นาทัน ซือมียา ตูโดฮ ปือมือเลา นะ ตูฮัด_ ฌางัน เบนัยยา_ นานะ นะ เยโฮยาดา_ บรี กูญา มาแรฮ ซารี กู.” กะฆีเตอ_ กูญา อีนี มาแรฮ ซารี ราฌา ดัฮ.

³³ ราฌา เตอ_ มือเลา ปือซัด กูญา จะ_ “กือนา บาวา โกะ ซือมียา บือกรือฌา นะ กู_ บรี กะ ซาโลมอน_ นานะ นะ กู_ ญาแญะ เดะ อาตัซ กูดา บาซา ดือมิ นะ กู_ บาวา ญา ปี กะ ตือปัจ อาเย ซือบุยํ กีโฮน เลอ.

³⁴ โซะ อีตู เตอ_ บรี กะ ซาโดก นู ฌาดี ซามี_ ฌางัน นาทัน ซือมียา ตูโดฮ ปือมือเลา นะ ตูฮัด_ ลือมัยํ มีญะ อาเกะ ตืองะ ญา_ บรี ฌาดี ราฌา นะ ลูมอฮ อิซราเอน. กะฆีเตอ กาเญา กือนา ตีโยะ ซือลูนัย ตาโนะ บือนาตัก_ มือญาเระ จะ_ ‘บรี กะ ราฌา ซาโลมอน ซือนัง ซือลามัจ เลอ.’

³⁵ กะฆีเตอ บรี กาเญา ตูโรจ ญา_ ญาแญะ มาแรฮ_ บรี ญา มาโซะ มาแรฮ ดูโดะ_ เดะ ตือปัจ ดูโดะ นะ กู_ จะ ตือปัจ ดูโดะ นะ ราฌา เลอ. ญา เตอ_ นะ ฌาดี ราฌา ฆาตี กู_ ซาเบะ กู บือเลฮ อาเกะ ตืองะ ญา_ บรี ฌาดี ราฌา ปือบือลา ลูมอฮ อิซราเอน ฌางัน ลูมอฮ ยูดา.”

³⁶ เบนัยยา_ นานะ นะ เยโฮยาดา_ ญา มือญาเระ กะ ราฌา จะ_ “ซูโงฮ เลอ_ บรี กะ ตูฮัด บือซัยํ เดะ อาตัซ_ ตูฮัด นะ ราฌา_ กือปาลา นะ กู_ ปือซัด บรี ฌาดี กะฆีเตอ เลอ.

³⁷ ตูฮัด บือซัยํ เดะ อาตัซ อาดา ดูโดะ บือซามา ฌางัน ราฌา_ กือปาลา นะ กู_ กะฮามี_ มีตา บรี ดูโดะ บือซามา ฌางัน ซาโลมอน กะฆีเตอ ฌูฆา_ มีตา บรี กะ ตือปัจ ดูโดะ ฌาดี ราฌา นะ ญา_ บือซัยํ ลือเบฮ เดะ ตือปัจ ดูโดะ นะ ราฌา ดาวิด_ กือปาลา นะ กู เลอ.”

³⁸ กะฆีเตอ ซาโดก นู ฌาดี ซามี_ นาทัน ซือมียา ตูโดฮ ปือมือเลา นะ ตูฮัด_ ฌางัน เบนัยยา_ นานะ นะ เยโฮยาดา_ อาดา ฌางัน โกะ ลูมอฮ เคเรที_ ฌางัน ลูมอฮ เปเลที_ กูญา ซียะ บรี กะ ซาโลมอน ดูโดะ เดะ อาตัซ กูดา บาซา ดือมิ นะ ราฌา ดาวิด_ บาวา ญา มาแรฮ รอจ กะ ตือปัจ อาเย ซือบุยํ กีโฮน.

³⁹ กะฆีเตอ_ ซาโดก นู ฌาดี ซามี_ บือเลฮ บาวา ตาโนะ บือนาตัก นู อาดา มีญะ_ มาแรฮ ดาตัก เดะ รูมัฮ กาฌัก กาเยด_ ตือปัจ มือญือมัฮ กะ ตูฮัด_ ลือมัยํ มีญะ อาเกะ ตืองะ ซาโลมอน ดัฮ. โกะ ลูมอฮ ซือมียา ซือมูฮา มือเลา จะ_ “บรี กะ ราฌา ซาโลมอน ซือนัง ซือลามัจ เลอ.”

⁴⁰ โกะ ลูมอฮ ซือมียา ซือมูฮา โปด_ ปาคัจ ตูโรจ ปี_ ตีโยะ ซือลูนัย_ อาดา ลาฆู บรามัย ซูกา ฮาตี ซูโงฮ_ บูวัจ บรี ตานัฮ บือฆาญะ ดัฮ_ กรานา ซือวารา นะ กูญา ซือมูฮา.

⁴¹ กาลา อาโดนียัฮ_ ฌางัน โกะ ซือมียา นู อาดา ดูโดะ บือซามา ฌางัน ญา_ มากัด ซูดัฮ ดัฮ โปด_ กูญา ดืองัยํ ซือวารา อีตู. ตานา โยอาบ ดืองัยํ ซือวารา ซือลูนัย ตาโนะ บือนาตัก_ ญา มือเลา จะ_ “ซือวารา บูริ เดะ นังฆรี อีนี เตอ_ ฌาดี ลาฆู กะฮามี เลอ?”

⁴² กาลา นู ญา ตืองัฮ มือเลา เตอ_ นี เลอ_ โยนาทาน นานะ นะ อาบียาทา_ นู ฌาดี ซามี_ ญา มาแรฮ รอจ ดัฮ. อาโดนียัฮ โปด มือเลา จะ_ “มาโซะ มาแรฮ เลอ_ เกา ฌาดี ซือมียา นู บาฌิ ซูโงฮ_ นู บาวา บรีตา บาฌิ มาแรฮ เลอ.”

⁴³ โยนาทาน ญา มือญาเระ กะ อาโดนียัฮ จะ_ “บูกัด บรีตา บาฌิ เลอ_ ซาเบะ ราฌา ดาวิด_ กือปาลา นะ กีตา ซือมูฮา_ ญา บือเลฮ บูวัจ บรี กะ ซาโลมอน ฌาดี ราฌา.

⁴⁴ ราฌา ดาวิด ญา ซูโรฮ ซาโดก นู ฌาดี ซามี_ ฌางัน นาทัน ซือมียา ตูโดฮ ปือมือเลา นะ ตูฮัด_ อาดา ฌางัน เบนัยยา_ นานะ นะ เยโฮยาดา_ ฌางัน โกะ ลูมอฮ เคเรที_ ฌางัน ลูมอฮ เปเลที_ ตูโรจ ซาโลมอน ปี_ บรี กะ ซาโลมอน ดูโดะ เดะ อาตัซ กูดา บาซา ดือมิ นะ ราฌา.

⁴⁵ ซาโดก ฌางัน นาทัน บือเลฮ ลือมัยํ มีญะ_ อาเกะ ตืองะ ญา บรี ฌาดี ราฌา ดัฮ_ เดะ โซะ อาเย ซือบุยํ กีโฮน. กะฆีเตอ กูญา ซือมูฮา โปด_ ญาแญะ มาแรฮ ดาตัก เดะ ตือปัจ อีตู_ ฌางัน ลาฆู บรามัย ซูกา ฮาตี ซูโงฮ_ บูวัจ บรี กะ นังฆรี บูริ โตระ. นี เลอ_ ฌาดี ซือวารา นู กาเญา ดืองัย ดัฮ.

⁴⁶ ซาโลมอน เตอ_ ญา อาดา ดูโดะ เดะ อาตัซ ตือปัจ ดูโดะ นะ ราฌา ฌูฆา.

⁴⁷ ลือเบฮ เดะ อีตู ปูลัก_ โกะ ลูมอฮ ซือมียา บือกรือฌา นะ ราฌา_ กูญา โปด_ มาโซะ ปี มือญือมัฮ บรี ซือลามัจ กะ ราฌา ดาวิด_ กือปาลา นะ กีตา_ จะ_ ‘มีตา บรี ตูฮัด นะ ราฌา_ บูวัจ บรี กะ ปือนามา นะ ซาโลมอน_ กรือจัย ปี ราตา_ ลือเบฮ เดะ ปือนามา นะ เกา_ บูวัจ บรี กะ ตือปัจ ดูโดะ ฌาดี ราฌา นะ ญา_ บือซัยํ เดะ ตือปัจ ดูโดะ นะ เกา เลอ.’ กะฆีเตอ ราฌา_ ญา ตือมะ เดะ อาตัซ ตือปัจ ตีโนะ นะ ญา.

⁴⁸ กะฆีเตอ ราฌา มือเลา จะ_ ‘บรี ซือลามัจ เลอ_ กะ ตูฮัด บือซัยํ เดะ อาตัซ_ ตูฮัด นะ ลูมอฮ อิซราเอน_ นู บูวัจ บรี กะ ซือมียา ซืออูรัก_ บือเลฮ ดูโดะ เดะ ตือปัจ ดูโดะ นะ กู_ เดะ อารี อีนี_ นู กู บือเลฮ ลีฮัจ บือฆารี ฌางัน มาตา นะ กู ดัฮ.’ ”

⁴⁹ กะฆีเตอ_ โกะ ลูมอฮ ซือมียา ซือมูฮา นะ อาโดนียัฮ_ กูญา ปาคัจ ตาโกจ_ ซิกมาซิก บีกัซ_ บือฌาลัด ปี ตูโรจ บือกะ ฌาลัด นะ กูญา เลอ

⁵⁰ โซะ อาโดนียัฮ เตอ_ ญา ตาโกจ เดะ ซาโลมอน_ บีกัซ ปี ปือฆัก เดะ ซีกู ตือปัจ ตูนู บารัก มือนืองะ กะ ตูฮัด.

⁵¹ อาดา ซือมียา ปี มือญาเระ กะ ซาโลมอน จะ_ “ลีฮัจ เลอ_ อาโดนียัฮ ญา ตาโกจ เดะ ราฌา ซาโลมอน_ ซาเบะ กะฆีเตอ เลอ_ ญา อาเลฮ ปี ปือฆัก เดะ ซีกู ตือปัจ มือนืองะ_ มือเลา จะ_ ‘บรี กะ ราฌา ซาโลมอน อาเกะ มือเลา บือฌาญี ฌางัน กู ดูลู จะ_ ญา นะ ฮอย เตด บูนอฮ ปราโซฮ นะ ญา ฌางัน ปือดัก’ ”.

⁵² ซาโลมอน มือเลา จะ_ “ดัฮ ญา ปลีฮัจ จะ_ ญา ฌาดี ซือมียา บาฌิ_ โบะ ซา อูรัจ นะ ญา โปด_ นะ ฮอย เตด ฆูโฆยํ รอจ กะ ตานัฮ. ตาปี ดัฮ ดาปัจ ลาฆู ฌาฮัจ เดะ ญาวา นะ ญา_ ญา นะ ฆาโดฮ มาตี เลอ”.

⁵³ ราฌา ซาโลมอน เตอ_ ญา ซูโรฮ ซือมียา ปี บาวา ญา ตูโรด มาแรฮ_ ดาตัก เดะ ตือปัจ มือนืองะ. ญา โปด_ มาแรฮ มือญือมัฮ โซะ ฮือลด มูคา นะ ราฌา ซาโลมอน. ราฌา ซาโลมอน มือเลา ฌางัน ญา จะ_ “กือนา บาลิ ปี กะ รูมัฮ นะ เกา เลอ.”