1 โกริน 1 - ซูรัจ ปือมือเลา นะ ตูฮัด

¹ กู เปาโล_ กือนา ปาเงน ดัฮ_ ฌาดี ปือญูโรฮ นะ เยซู คริด_ ตูโรจ ฮาตี นะ ตูฮัด เดะ อาตัซ. กู ฌางัน โซซะเทเน_ อาดี บราดี นะ กีตา_

² กามี ฆาแรฮ ซูรัจ อีนี_ กีเรบ บรี กะ ลูมอฮ นะ ตูฮัด_ นู อาดา เดะ นังฆรี โกริน. ตูฮัด บือเลฮ บูวัจ บรี กาเญา ฌาดี ซือมียา จรัฮ บาฌิ_ ลือกัจ บือซามา ฌางัน เยซู คริด. ญา ปาเงน กาเญา ดัฮ_ ฌาดี โกะ ซือมียา นะ ญา_ บือซามา ฌางัน โกะ ซือมียา ซือมูฮา_ ราตาๆ_ นู บือซาโวจ ตรือเบะ ปือนามา นะ ตูฮัด เยซู คริด เตอ_ ตูฮัด นะ กูญา_ ตูฮัด นะ กีตา ฌูฆา.

³ มีตา เดะ ตูฮัด นู อาโปก นะ กีตา_ มีตา เดะ ตูฮัด เยซู คริด_ นะ บรี ซือลามัจ กะ กาเญา_ นะ บรี กาเญา ดูโดะ ซือนัง ซือลามัจ เลอ.

ตูฮัด ฮาลัย บรี ซือลามัจ ดัฮ

⁴ กู บรี ซือลามัจ กะ ตูฮัด นะ กู ซือลาลู_ ปาซัน ลาฆู นะ กาเญา_ ซาเบะ ตูฮัด เตอ_ ญา บือเลฮ ฮาลัย บรี ซือลามัจ กะ กาเญา ดัฮ_ กรานา เยซู คริด เลอ.

⁵ กะฆีเตอ_ นู กาเญา อาดา ลือกัจ บือซามา ฌางัน ญา_ ตูฮัด บรี กาเญา อาดา โกะ บือนา บาฌิ ซือมูฮา_ บาญะ ซูโงฮ เลอ_ บรี กาเญา ปานัย มือเลา_ อาดา อากัน_ เดะ ราตา มาจับ.

⁶ กะฆีเตอ เลอ_ ปือมือเลา ฌาดี ซะซรี ปาซัน เยซู คริด_ อาดา กือฌะ กือมัซ เดะ ตืองัฮ กาเญา ดัฮ.

⁷ กะฆีเตอ_ วะตู กาเญา ฌาฆา นาตี อารี อีตู_ นู เยซู คริด_ ตูฮัด นะ กีตา_ นะ มาแรฮ ปลีฮัจ เตอ_ กาเญา เตด ปูตุซ นามา เลอ_ เดะ โกะ อากัน นู ปานัย นู ตูฮัด ฮาลัย บรี ดัฮ.

⁸ เยซู เตอ_ ญา นะ บูวัจ บรี กาเญา กือฌะ กือมัซ ฌูฆา_ ตือดะ รอจ กะ อารี ปือญูดัฮ_ บรี กาเญา ฮอย ตือปัจ นะ กือนา มือฌัฮ นามา โปด_ เดะ อารี อีตู_ นู เยซู คริด_ ตูฮัด นะ กีตา_ นะ บาลิ มาแรฮ ปาเระ.

⁹ ตูฮัด เดะ อาตัซ_ ญา รือมัก ซูโงฮ เตอ. ญา เลอ_ นู บือเลฮ ปาเงน กาเญา_ บรี กาเญา นะ บรามัย บือซามา ฌางัน นานะ นะ ญา_ เยซู คริด เตอ_ ตูฮัด นะ กีตา.

เปาโล อูจะ กะ กูญา_ นู กูญา ปือจัฮ บือลัฮ ดัฮ

¹⁰ อาดี บราดี นะ กู เออ_ กู มีตา เดะ กาเญา บรี กือมัซๆ เตอ_ มีตา เดะ ปือนามา นะ เยซู คริด_ ตูฮัด นะ กีตา_ บรี กาเญา ซือมูฮา นะ บือปาคัจ บือซามา_ เดะ โกะ ปือมือเลา นะ กาเญา เลอ. กะฆีเตอ_ นะ ฮอย ลาฆู ปือจัฮ บือลัฮ เดะ ตืองัฮ กาเญา. ตาปี บรี กาเญา บือปาคัจ บือซามา_ อาดา ซา ฮาตี ซือมูฮา เลอ.

¹¹ โกะ อาดี บราดี นะ กู เออ_ กู มือเลา กะฆีนี_ ซาเบะ จะ_ โกะ ซือมียา ซือรูมัฮ นะ นีบีนี ปือนามา คะโลเอ_ กูญา บือเลฮ มาแรฮ มือญาเระ กะ กู จะ_ ลูมอฮ กาเญา อาดา บือตือฆัฮตือฆัฮ ซามา กาเญา.

¹² กู มือเลา กะฆีนี จะ_ กาเญา ซอก ซืออูรัก มือเลา ซิกมาซิก จะ_ “กู นี_ ตูโรจ กะ เปาโล”_ ซือตืองัฮ จะ_ “กู ตูโรจ กะ อะโปโล”_ ซือตืองัฮ จะ_ “กู ตูโรจ กะ เปโตร” ซือตืองัฮ จะ_ “กู ตูโรจ กะ เยซู คริด”_ ฌูฆา.

¹³ กะฮามี เลอ? เยซู คริด กือนา ปือจัฮ ดัฮ เฆอ? กู เปาโล_ กือนา กาจิก เดะ กายู ปลีตัก กรานา กาเญา ดัฮ เฆอ? กาเญา ซาโมจ ลาฆู ซือลับ เดะ อาเย เดะ ปือนามา นะ เปาโล เฆอ? บูกัด ฌาดี กะฆีเตอ เลอ.

¹⁴ กู บรี ซือลามัจ กะ ตูฮัด จะ_ กู บือเลฮ บูวัจ บรี ซา คริซือปัด ฌางัน ฆาโย_ ซาโมจ ลาฆู ซือลับ เดะ อาเย. ลือเบฮ เดะ กูญา_ กู เตด บือเลฮ บูวัจ บรี ซาปา ซือลับ เดะ อาเย เลอ_

¹⁵ ตีเมา บรี ซือมียา ดีฮา_ นะ บือเลฮ มือเลา จะ_ ญา ซาโมจ ลาฆู ซือลับ อีตู_ เดะ ปือนามา นะ กู ดัฮ.

¹⁶ นาตี ดูลู เลอ_ อาดา โกะ ซือมียา ซือรูมัฮ นะ ซือเตฟานัด_ กู บือเลฮ บูวัจ บรี กูญา ซือลับ เดะ อาเย ฌูฆา. ลือเบฮ เดะ อีตู_ กู เตด ตาฮู จะ_ กู บูวัจ บรี ซาปา โปด_ ซาโมจ ลาฆู ซือลับ เดะ อาเย ดัฮ.

¹⁷ กะฮามี โปด_ เยซู คริด เตด บือเลฮ ซูโรฮ กู_ นะ บรี โกะ ซือมียา ซือลับ เดะ อาเย เตอ_ ตาปี ญา ซูโรฮ กู_ ปี มือญาเระ บรีตา นู บาฌิ เลอ. ญา บรี กู มือญาเระ กะฆีเตอ_ บือกะ ซือมียา นู ฮอย อากัน_ เตด ปานัย มือเลา เตอ_ ตาโกจ จะ_ กู นะ บูวัจ บรี ลาฆู นู เยซู คริด_ มาตี เดะ กายู ปลีตัก_ นะ เตด ฌาดี นามา เลอ.

เยซู คริด_ ญา มือฆัฮ_ ญา ปานัย อากัน ซูโงฮ

¹⁸ ซาเบะ จะ_ โซะ โกะ ซือมียา นู ตืองัฮ ฌาฮานัม เตอ_ กูญา ลีฮัจ จะ_ ปือมือเลา มือญาเระ_ ปาซัน ลาฆู นู เยซู มาตี เดะ กายู ปลีตัก เตอ_ ฌาดี ปือมือเลา บูดอ. ตาปี โซะ กีตา นี_ นู ตูฮัด ตืองัฮ บูวัจ บรี ฮีโดะ ลือปัซ บาฌิ เตอ_ ปือมือเลา อีตู_ ฌาดี ปือมือฆัฮ นะ ตูฮัด เลอ.

¹⁹ กรานา ซูรัจ ปือมือเลา นะ ตูฮัด มือเลา จะ “ลาฆู ปานัย อากัน นะ ซือมียา บาอากัน กู นะ บูวัจ บรี บือนาซา. ลาฆู นู ซือมียา ปานัย บลาฌัยํ บือเลฮ มาโซะ เดะ ฮาตี เตอ_ กู นะ บูวัจ บรี เตด ฌาดี นามา.” ตูฮัด ญา จะ .

²⁰ กะฆีเตอ_ ปัจ ดีฮา เลอ_ ซือมียา ปานัย อากัน? ปัจ ดีฮา เลอ_ ซือมียา ปานัย อาฌัยํ ปือมือซัด นะ ตูฮัด? ปัจ ดีฮา เลอ_ ซือมียา ปานัย บือตือฆัฮ_ เดะ ฮาดัจ อีนี? ตาปี ตูฮัด เดะ อาตัซ_ บือเลฮ บูวัจ บรี ลาฆู ปานัย อากัน_ โซะ ดือนียา อีนี_ ฌาดี ลาฆู บูดอ ฮาบิฮ ดัฮ เลอ.

²¹ ซาเบะ จะ_ นู ตูฮัด ญา อาดา อากัน บาญะ ซูโงฮ_ ญา บูวัจ บรี ฌาดี กะฆีนี จะ_ โกะ ซือมียา เดะ ดือนียา อีนี_ นู ตูโรจ ลาฆู ปานัย อากัน นะ กูญา ตะอาซิก เตอ_ กูญา นะ บือกราลา ฌางัน ตูฮัด กะฆีเตอ_ ฮอย เตด บือเลฮ เลอ. ตาปี ตูฮัด บือเลฮ บือกีรา จะ_ นะ อาเมด ลาฆู นู กีตา มือญาเระ อีนี_ นู กูญา อีงัจ จะ_ ฌาดี ลาฆู บูดอ เตอ_ มาแรฮ ตูโลก ลูมอฮ ซือมียา นู ปือจายา_ บรี ฮีโดะ ลือปัซ บาฌิ เลอ.

²² ลูมอฮ บักซา ยิว กูญา มีตา ลีฮัจ โกะ ปือนานา นู ซีดี เลอ_ ลูมอฮ บักซา กรีก_ กูญา มียา ลาฆู ปานัย อากัน โปด.

²³ ตาปี โซะ กามี เลอ_ กามี บือตาฮู ปาซัน เยซู คริด_ นู กือนา กาจิก เดะ กายู ปลีตัก ดัฮ. โซะ ลูมอฮ บักซา ยิว เตอ_ ลาฆู อีตู บูวัจ บรี กูญา ตือซีปะ ดัฮ. โซะ ลูมอฮ บักซา อาซิก โปด_ กูญา ลีฮัจ จะ_ ฌาดี ลาฆู บูดอ.

²⁴ ตาปี โซะ ลูมอฮ ซือมียา นู ตูฮัด ปาเงน ดัฮ เตอ_ ฌางัน ลูมอฮ ยิว_ ลูมอฮ กรีก ซามา เตอ_ ลาฆู อีตู บรี ลีฮัจ จะ_ เยซู คริด ตะอาซิก เตอ_ ญา ฌาดี นู ปือมือฆัฮ นะ ตูฮัด เดะ อาตัซ เลอ_ ญา ฌาดี นู ปานัย อากัน นะ ตูฮัด เตอ เลอ.

²⁵ ซาเบะ จะ_ ลาฆู นู บูดอ นะ ตูฮัด_ ญา ปานัย อากัน_ ลือเบฮ เดะ โกะ ซือมียา เลอ. นู ลือมัฮ นะ ตูฮัด_ ญา มือฆัฮ ลือเบฮ เดะ โกะ ซือมียา ลาฆี เลอ.

²⁶ กะฆีเตอ เลอ_ โกะ ดีบราดี เออ_ บรี กาเญา บรีงัจ ลีฮัจ_ วะตู ตูฮัด ปาเงน กาเญา_ กาเญา ฌาดี ซือมียา มาจับ นามา เลอ. โซะ ซือมียา เตอ_ เดะ ตืองัฮ กาเญา_ อาดา ซือมียา ปานัย อากัน_ เตด บราปา บาญะ ซือมียา. อาดา ซือมียา ซัยํบือซัยํ_ เตด บราปา บาญะ_ ซือมียา บือแนฮ บาฌิ_ เตด บราปา บาญะ เลอ.

²⁷ ตาปี_ ตูฮัด เดะ อาตัซ บือเลฮ บือกีรา นะ ปีเลฮ_ โกะ ซือมียา นู ดือนียา อีนี กีรา จะ_ บูดอ เตอ_ บีดา นะ บูวัจ บรี โกะ ซือมียา นู ปานัย อากัน_ นะ จือและ. ตูฮัด ญา ปีเลฮ ซือมียา นู ดือนียา อีนี กีรา จะ_ ลือมัฮ เตอ_ บีดา นะ บูวัจ บรี ซือมียา ตือฆัยํ อูรัจ นะ จือและ มาตา ฌูฆา เลอ.

²⁸ ญา ปีเลฮ ซือมียา รือนัฮ_ โซะ ดือนียา เตอ_ นู กูญา มือฌัฮ_ มีเซ จะ ซือมียา นู เตด ฌาดี นามา โปด_ บีดา นะ บูวัจ บรี โกะ ซือมียา ซัยํบือซัยํ_ นะ เตด ฌาดี นามา ฌูฆา เลอ.

²⁹ กะฆีเตอ_ ฮอย ซือมียา ดีฮา_ นู นะ บือเลฮ งันตืองัน_ โซะ ฮือลด มูคา นะ ตูฮัด เดะ อาตัซ เลอ.

³⁰ ตาปี ตูฮัด เลอ_ บือเลฮ บูวัจ บรี กาเญา ฌูฆา_ อาดา ฮีโดะ_ ลือกัจ บือซามา ฌางัน เยซู คริด. ญา บือเลฮ บูวัจ บรี เยซู อีตู_ ฌาดี บือกะ ลาฆู ปานัย อากัน_ กรานา กีตา เลอ_ ฌาดี จะ_ เยซู เลอ_ นู บูวัจ บรี กีตา บาฌิ ตือปัจ โซะ ฮือลด มูคา นะ ตูฮัด. ญา เลอ_ นู บูวัจ บรี กีตา ฌาดี ซือมียา จรัฮ บาฌิ นะ ญา_ ญา เลอ_ นู ตือบุซ กีตา_ บรี ลือปัซ เดะ ดูซา ดัฮ.

³¹ กะฆีเตอ เลอ_ บือกะ อาดา ฆาแรฮ ดัฮ_ เดะ ซูรัจ ปือมือเลา นะ ตูฮัด นู จะ “ซือมียา นู นะ งันตืองัน เตอ_ บรี ญา งันตืองัน เดะ ลาฆู นู ตูฮัด บูวัจ ดัฮ เลอ .”