Усьтӥськон 1 - Библия удмурт кылын

1-тӥ ЛЮКЕТ

¹ Иисус Христослэн усьтӥськонэз. Сое Солы Инмар сётӥз Аслаз ляльчиосызлы ӝоген мар луоноез возьматон понна. Инмар Кылчинзэ ыстӥз но Аслаз ляльчиезлы, Иоаннлы, тае возьматӥз.

² Иоанн аслэсьтыз вань адӟемзэ вера; со Инмар кылэз, Иисус Христослэсь тодытонзэ шара ивортэ.

³ Шудо лыдӟись мурт, шудоесь та азьпалзэ тодытыса веранлэсь кылъёссэ кылзӥсьёс, отысь вань гожтэмез чакласа-утьыса улӥсьёс, уго дыр матэ вуэмын ини.

⁴ Иоанн Асиысь сизьым черкъёслы: Кин вань, Кин вал, Кин лыктоз, Солэсь тӥледлы дэлет но каньыллык сӥзисько, нош озьы ик Солэн престолэз азьын улӥсь сизьым духъёслэсь но

⁵ Иисус Христослэсь, Кудӥз оскиськымон шара ивортӥсь луэ. Со кулэмъёс пӧлысь нырысь улӟыса султэмын, Со музъем вылысь эксэйёслы Кузё луэ. Со асьмемыз яратэ, Аслаз Вирыныз асьмемыз сьӧлыкъёсмылэсь миськиз.

⁶ Со асьмемыз эксэйёс, Инмарлы, Аслаз Атаезлы священникъёс кариз. Со пумтэм вапумъёсы дано, кужымлыко мед луоз! Аминь.

⁷ Тани, Со пилемъёсын ӵош лыктоз, Сое ваньмыз ас синмынызы адӟозы, кинъёс Сое бышкалтӥзы, соос но Сое адӟозы. Со азьын музъем вылысь вань выжыос викышъяса бӧрдозы. Зэм, озьы луоз. Аминь.

⁸ «Мон – Альфа но Омега, Кутсконэз но, Пумыз но», – шуэ Кузё-Инмар, Кин вань, Кин вал, Кин лыктоз – Дунне Кутӥсь.

⁹ Мон, Иоанн, тӥляд братты, тӥледын огазьын куректон-кайгуосты чидась, Инмар Эксэйлыке пыриськись, Иисус Христос кадь секытлыкъёсты чидась. Инмар кыл понна, Иисус Христосэз тодытэме понна Патмос шуыса нимаськись шормуӵе келямын вал.

¹⁰ Арнянуналэ мон Духен тыр луыса улӥ, соку мон аслам мышкысьтым бадӟым куара кылӥ, гумыысь кадь потӥсь куара кылӥ. Со шуиз: «Мон – Альфа но Омега, Нырысетӥез но, Берпуметӥез но.

¹¹ Мае адӟиськод, ваньзэ книгае гожты но Асиысь черкъёсы – Ефесэ, Смирнае, Пергаме, Фиатирае, Сардисэ, Филадельфияе но Лаодикияе – ысты».

¹² Кин монэн вераське шуыса учкыны мон куара пала берытски. Берытски но сизьым зарни лампадаосты адӟи.

¹³ Сизьым лампадаос вискын сылӥсь Адями Пилы укшасез адӟи. Подир дӥськутэн Со дӥсяськем, гадьтӥз зарни кускерттонэн думиськемын.

¹⁴ Солэн йырыз, йырсиез тӧдьы ыжгон кадь, лымы кадь, тӧдьыесь; Солэн синъёсыз – ӝуась тыл кадесь.

¹⁵ Солэн пыдъёсыз гурын ӟырдатэм Ливан ыргонлы укшасесь; куараез но Солэн визыл кошкись бадӟым вуослэн куашетэмзы кадь.

¹⁶ Бур кияз Со сизьым кизилиосты возиз, Солэн ымысьтыз мыд-мыд палтӥз лэчыт шерем меч потыса улӥз. Солэн ымнырыз яркыт пиштӥсь шундылы укша вал.

¹⁷ Нош мон Сое адӟем берам Солэн пыд выжыяз кулэм мурт кадь уси. Соку Со мон вылэ бур кизэ понӥз но мыным шуиз: «Эн кышка. Нырысетӥез но, Берпуметӥез но – Мон.

¹⁸ Улэпез но. Кулэмын вал, но, тани, пумтэм вапумъёслы улэп луи. Аминь. Адлэн но, кулонлэн но усьтонъёссы Мон киын.

¹⁹ Озьыен, гожты ваньзэ, мае адӟид, али мар вань, мар луоз та бере.

²⁰ Сизьым кизилиослэн, кудъёссэ тон Мынам бур киысьтым адӟид, сизьым зарни лампадаослэн адямиослэсь ватӥськем пуштроссы луэ со: сизьым кизилиос – со сизьым черкъёслэн Кылчинъёссы; нош сизьым лампадаос, кудъёссэ тон адӟид, – со сизьым черкъёс».