Титлы 1 - Библия удмурт кылын

1-тӥ ЛЮКЕТ

¹ Павел, Инмарлэн ляльчиез, Иисус Христослэн апостолэз мон луи Инмарлэсь быръем муртъёссэ оскон пала ваён понна. Шонер осконлы тупась зэмлыкез тодон,

² пумтэм вапумъёсы улон басьтонлы оскиськон сётэ. Аслэсьтыз верам кылзэ котьку но быдэсъясь Инмар тае вапумъёс кутсконлэсь азьвыл ик сӥзиз.

³ Нош тупатэм дырыз вуиз но Аслэсьтыз кылзэ Со калыклы ивортӥз. Кылзэ тодытонэз Инмарлэн, асьмелэн Утисьмылэн, косэмезъя, мыным оскиз.

⁴ Титлы, монэн одӥг осконын улӥсь зэмос пилы, мылкыд карисько: Инмар Атайлэн но Кузё-Инмарлэн Иисус Христослэн, Утисьмылэн дэлетэз, гажан-жалянэз, каньыллыкез тон бордын мед улоз.

⁵ Со понна мон тонэ Критэ кельтӥ, йылаз-пумаз вуттымтэ ужъёсты мед быдэстод но ваньмаз городъёсы вӧсяськисьёслы кивалтӥсьёс мед пуктылод шуыса. Мон тонэ кури:

⁶ со пуктэм адямиосыд дун-шектэмесь мед луозы, одӥг пол гинэ кышнояськемын мед луозы, нылпиоссы Инмарлы оскисесь мед луозы. Азыса-калгыса яке тэрытскытэк уло шуыса, калык пыкылоно медаз лу.

⁷ Епископ Инмар юртэз утись мурт бере, соин ик со дун-шектэм луыны кулэ. Вылтӥяськись, йыркуръяськись, юонэз яратӥсь, жугиськись, узырлыклы синмаськись со медаз луы.

⁸ Со мед луоз ёрмисьёсты сюдӥсь-вордӥсь, визьмо, дун-чылкыт улонэз яратӥсь, шонер лэсьтӥсь, вӧсяськыса шонер улӥсь, ассэ кутыны быгатӥсь.

⁹ Со шонер дышетон вылэ пыкиськыса, мукетъёссэ но шонер сюрес вылэ султыны мед дышетоз, нош пумитъяськисьёсты шарае поттыны быгатӥсь мед луоз.

¹⁰ Вань уго трос тэрытскисьтэмъёс, юнме супыльтӥсьёс, ӧрекчаськисьёс, уката ик вандӥськон сямез ортчытэмъёс пӧлысь.

¹¹ Сыӵеослэсь ымзэс ворсаны кулэ: соос быдэс семьяосты куашкатыло. Асьсэлы пайда поттон понна соос дышето солы, малы кулэ ӧвӧл дышетскыны.

¹² Соослэн пӧлысьтызы ик одӥгез пророксы шуиз: «Критын улӥсьёс котьку но ӧрекчаськисесь вал, лек пӧйшуръёс, кӧттыростэмъёс, азьтэмъёс».

¹³ Та шонер веран. Соин ик тон соосты юн визьма-нодъя, осконзы зэмос, мур мед луоз шуыса,

¹⁴ Иудейёслэсь ӧрекчи мадёнъёссэс но зэмлыклэсь палэнскем адямиослэсь кылдытъям курон-косонъёссэс санэ медаз понэ.

¹⁵ Дун-чылкытъёс понна ваньмыз дун-чылкыт; нош саптаськемъёс но оскисьтэмъёс понна нокыӵе но чылкытлык ӧвӧл, малы ке шуоно соослэн визьзы но, сюлэмзы но саптаськемын.

¹⁶ Соос шуо ми, пе, Инмарез тодӥськомы, нош ужъёсынызы асьсэос Солэсь куштӥсько – кырсесь-юрӟымесь, кылзӥськисьтэмесь, нокыӵе но ӟеч уж лэсьтыны быгатӥсьтэмесь.