Руфь 1 - Библия удмурт кылын

1-тӥ ЛЮКЕТ

¹ Судьяос кивалтон аръёсы музъем вылэ сютэм ар вуиз. Соку Иудеяысь Вифлеем карысь одӥг адями аслаз кышноеныз но кык пиосыныз ӵош Моав музъеме улыны кошкиз.

² Со муртлэн нимыз вал Елимелех, кышноезлэн нимыз Ноеминь, нош кык пиосызлэн нимъёссы – Махлон но Хилеон; соос вал Иудеяысь Вифлеем карысь Ефрафа выжыысь. Соос Моав музъеме лыктӥзы но отчы улыны кылизы.

³ Ноеминьлэн кузпалыз Елимелех кулӥз, кык пиосыныз со улыны кылиз.

⁴ Моав нылъёсты соос кышно басьтӥзы, огезлэн нимыз Орфа, нош мукетызлэн – Руфь; отын соос ог дас ар пала улӥзы.

⁵ Бӧрысьгес [солэн] кыкез ик [пиосыз], Махлон но Хилеон, кулӥзы; та кышномурт пиосыз бере, картэз бере но улыны кылиз на.

⁶ Кенъёсыныз ӵош со Моав музъемысь берен кошкиз, уго Моав шаерын со кылӥз, Инмар Аслаз калыкез доры вуылӥз но соослы нянь сётӥз шуыса.

⁷ Азьвыл улэм интыысьтыз со кошкиз, кыкез ик кенъёсыз но со сьӧры мынӥзы. Иудей музъеме берытскон дыръязы, сюрес кузя мыныкузы,

⁸ Ноеминь кык кенъёсызлы шуиз: «Мынэлэ, анайёстылэн юртазы берытске; Кузё-Инмар тӥледлы гажан-жалянзэ мед возьматоз, кызьы тӥ гажан-жаляндэс возьматӥды кулэмъёслы но, мыным но.

⁹ Кузё-Инмар тӥледлы кыкнадылы ик кузпал дорын каньылэн, кышкатэк улон инты мед сётоз!» Кыксэс ик чупаз, нош соос куараен бӧрдыны кутскизы.

¹⁰ Соос шуизы: «Ум берытске, ми тонэн ӵош тынад калыкед доры мыномы».

¹¹ Нош Ноеминь шуиз: «Берытске, нылъёсы. Малы кулэ тӥледлы мон сьӧры мыныны? Тӥледлы кузпал луон понна мынам пушкам пи нуныосы вань шат?

¹² Берытске, нылъёсы, берытске, мон уго пересь ини бызьыны; мон шуысал ке но, мынам вань али оскиськонэ, та уез кузпалэн ке но кӧлысал, собере пи нуныос вайысал ке, –

¹³ соос быдэ вуытозь, возьмаса улысалды-а? Ӝегатӥськыса, бызьытэк улыны тӥледлы яра шат? Ӧвӧл, нылъёсы, тӥ понна мон туж чигиськисько, уго Кузё-Инмарлэн киыз мон доры вӧсь карыны вуиз».

¹⁴ Соос нош ик куараен бӧрдыны кутскизы. Соку Орфа картэзлэн анаеныз люкиськиз, [со ас калыкез доры берытскиз], нош Руфь анайзы борды кылиз.

¹⁵ [Ноеминь Руфьлы] шуиз: «Тани, кенакед ас калыкез доры, аслаз инмаръёсыз доры берытскиз, тон но кенакед бӧрсьы ас калыкед доры берытскы».

¹⁶ Нош Руфь шуиз: «Эн ёрты монэ, дорысьтыд кошкыны косыса, гуртам бертыны косыса; кытчы тон мынод, мон но отчы ик мыно, кытын тон улод, мон но отын ик уло; тынад калыкед – мынам калыке луоз, тынад Инмаред – мынам Инмаре луоз;

¹⁷ кытчы тон кулод, мон но отчы ик мед кулом, отчы ик монэ но мед ватозы; Кузё-Инмар мыным сое но, тае но лэсьтӥз ке, эшшо но тросгес лэсьтоно луиз ке; кулон гинэ монэ тынэсьтыд мед люкоз».

¹⁸ [Ноеминь] солэсь бӧрсяз мыныны юн мылкыдзэ адӟиз но сое либатэмысь дугдӥз.

¹⁹ Кыкназы ик ӵош вамыштӥзы, Вифлееме вуизы. Вифлееме вуэм беразы быдэс город бугырскиз, ог-огзылэсь юазы: «Та Ноеминь-а?»

²⁰ Ноеминь соослы шуиз: «Эн нималэ монэ Ноеминь шуыса, нималэ монэ Мара* шуыса, уго Дунне Кутӥсь Инмар мон доры туж бадӟым куректон-кайгу лэзиз;

²¹ татысь мон ваньбурен потӥ вал, нош берыктӥз монэ Кузё-Инмар буш киын; малы монэ Ноеминь шуыса ниманы кулэ, куке мыным Кузё-Инмар курадӟон сётӥз, Дунне Кутӥсь Инмар шудтэм улон лэзиз?»

²² Ноеминь дораз бертӥз, солэн сьӧраз кенэз – моав ныл, Руфь – лыктӥз, Моав музъемысь со лыктӥз; Вифлееме соос йыды аран кутскон вакытэ вуизы.