Потон 1 - Библия удмурт кылын

1-тӥ ЛЮКЕТ

¹ Тани Иаковен [атаенызы] ӵош Египет музъеме пырем израиль пиослэн нимъёссы, соос ваньзы ас семьяенызы пыризы:

² Рувим, Симеон, Левий но Иуда,

³ Иссахар, Завулон но Вениамин,

⁴ Дан но Неффалим, Гад но Асир.

⁵ Иаковлэн кус улысьтыз ваньмыз-ӧвӧлэз сизьымдон [вить] лул потӥз, нош Иосиф соку Египетын вал ини.

⁶ Иосиф кулӥз, солэн вань агай-вынъёсыз, соин ӵош улэм муртъёс но кулӥзы;

⁷ нош Израильлэн пиосыз йылӥзы но йылӥзы, тросгес но тросгес луизы, туж юнмазы, та музъем быдэсак соосын пачылмиз.

⁸ Египетын выль эксэй пуксиз, со Иосиф сярысь номыр но уг тоды вал,

⁹ со ас калыкезлы шуиз: «Тани, израиль пиослэн калыксы трос луэмын, со асьмелэсь кужмогес;

¹⁰ ваелэ кескич амал шедьтоме, азьланяз со медаз ни йылы; уго ожмаськон пуромоно луиз ке, со асьмелэн тушмонъёсынымы огазе кариськоз, асьмелы пумит ожмаськон тӥрлыксэ ӝутоз но [асьме] музъемысь кошкоз».

¹¹ Секыт ужъёсын сое куасалтон понна ужан доры солы кивалтӥсьёс пуктӥзы. Запас нянь возён понна та калык фараонлы Пифом но Раамсес каръёс-городъёс пуктӥз, [озьы ик Он карез, мукет нимыз солэн Илиополь].

¹² Нош макем сое курадӟытӥзы, со эшшо но йылӥз, эшшо но тросгес луиз, таин сэрен [египет калык] израиль пиослэсь кышканы кутскиз.

¹³ Со понна ик египет пиос израиль пиосты жугыса-тышкаса ужаны ёртылӥзы,

¹⁴ секыт ужатыса – горд сюен вырытыса, кирпичъёс лэсьтылытыса, бусыысь вань ужъёсты быдэсъятыса, вӧсь карыса ужаны ёртыса – соослэсь улонзэс чидантэм секыт карылӥзы.

¹⁵ Гогы кыскась еврей кышноослы, огезлэн нимыз Шифра, мукетызлэн Фуа, Египетлэн эксэез косон сётыса

¹⁶ шуиз: «Еврей кышноослэсь гогызэс кыскакуды, нуны ваён дыръязы чаклалэ: пи нунызы вордӥськиз ке, сое вие, нош ныл ке вордӥськиз, мед улоз».

¹⁷ Нош гогы кыскась кышноос Инмарлэсь кышканэн улӥзы, Египет эксэйлэн косэмезъя ӧз лэсьтэ, нылпиосты улэп кельтылӥзы.

¹⁸ Египет эксэй, гогы кыскась кышноосты дораз ӧтьыса, соослы шуиз: «Малы тӥ тазьы ужаськоды – нылпиосты улэп кельтӥськоды?»

¹⁹ Гогы кыскась кышноос фараонлы шуизы: «Еврей кышноос египет кышноос кадесь ӧвӧл, соос тазаесь, гогы кыскась вуытозь, соос нуны вайыса вуо ини».

²⁰ Та понна гогы кыскась кышноослы Инмар ӟеч кариз, калык но йылӥз, туж кужмояз.

²¹ Гогы кыскась кышноос Инмарлэсь кышканэн улэм понна Инмар соослэсь выжыоссэс юнматӥз.

²² Соку фараон аслаз вань калыкезлы таӵе косон сётыса шуиз: «[Еврейёслэн] пизы вордӥськиз ке, ваньзэсты шуре куялэ, нош нылъёссэс ваньзэсты улэп кельтэ».