Марк 1 - Библия удмурт кылын

1-тӥ ЛЮКЕТ

¹ Инмарлэн Пиезлэн Иисус Христослэн Евангелиезлэн кутсконэз.

² Та гожтэмын пророкъёслэн книгаязы: «Тани, Мон Тынад азьтӥд Кылчинме лэзисько, со Тынад азяд Тыныд сюрес дасялоз».

³ «Кыр дуннеын кеськисьлэн куараез: Кузё-Инмарлы сюрес дасялэ, шонертэлэ Солы сюресэз».

⁴ Иоанн лыктӥз, со кыр дуннеын пылатӥз, сьӧлыкъёсты куштон понна ӧпкельыса пылатӥськон сярысь тодытӥз.

⁵ Со доры быдэс Иудея музъемын, Иерусалимын улӥсьёс лыктӥзы; соос ваньзы сьӧлыкъёссэс Иоаннлы веразы, Иоанн соосты Иордан шурын пылатӥз.

⁶ Иоаннлэн дӥсянэз верблюд гонлэсь вал; куссэ сюмыс кускерттонэн думыса ветлӥз; ӟозъёсыз, кыр мушъёслэсь чечызэс сиыса улӥз.

⁷ Со тазьы тодытыса вераз: «Мон сьӧртӥ мынэсьтым Кужмоез лыктэ, Солэн пыдкутчанэзлэсь езэ мыкыртӥськыса пертчыны но мон ярамон ӧвӧл.

⁸ Мон тӥледыз вуэн пылатӥ, нош Со тӥледыз Святой Духен пылатоз».

⁹ Со нуналъёсы Галилеяысь Назарет карысь Иисус лыктӥз но Иоанн пыр Иордан шурын пылатӥськиз.

¹⁰ Иисус вуысь потыку, инбамлэсь ваяк усьтӥськемзэ но Со вылэ дыдык выллем васькись Духез Иоанн адӟиз.

¹¹ Инмысен куара кылӥськиз: «Тон Мынам Яратоно Пие, Тон бордын Мынам ӟеч эрике».

¹² Соку ик Дух Сое кыр дуннее нуиз.

¹³ Кыр дуннеын Со ньыльдон нунал улӥз, шайтан визьзэ сыназ; пӧйшуръёсын огазьын улӥз; Кылчинъёс Солы юрттӥськыса улӥзы.

¹⁴ Иоаннэз возьмаськисьёслэн киулазы сётэмзы бере, Инмар Эксэйлыклэсь Евангелизэ тодытыса, Иисус Галилея музъеме лыктӥз.

¹⁵ Со шуиз: «Дыр вуиз но, матэ луиз Инмар Эксэйлык: ӧпкельыса сьӧлыкъёстылэсь куштӥське, Евангелилы оскелэ».

¹⁶ Галилей зарезь дортӥ ортчыкуз, калтон куштыса улӥсь Симонэз но солэсь Андрей вынзэ адӟиз, соос чорыгасьёс вал.

¹⁷ Иисус соослы шуиз: «Ойдолэ Мон сьӧры, Мон тӥледыз адями кутылӥсь каро».

¹⁸ Калтонъёссэс куштӥзы но соку ик соос Иисус сьӧры мынӥзы.

¹⁹ Отысен ӧжытак мынэм беразы пыжын калтонзэс кышъяса пукись Зеведей пи Иаковез но солэсь вынзэ Иоаннэз адӟиз,

²⁰ соку ик соосты Со Ас бӧрсяз ӧтиз. Асьсэлэсь атайзэс, Зеведеез, пыжын ужасьёсыныз валче кельтыса, соос Со сьӧры мынӥзы.

²¹ Капернауме вуизы; ӝоген, суббота нуналэ, Со сӥнагогае пыриз но дышетыны кутскиз.

²² Солэн дышетонэзлы паймизы, Со уго соосты, книга тодӥсьёс сямен ӧз, кузё мурт кадь дышетӥз.

²³ Соослэн сӥнагогаязы перияськем адями вал, со кеськиз:

²⁴ «Эй, Назаретысь Иисус, кошкы! Ми бордын Тынад мар ужед? Тон милемыз быдтыны лыктӥд! Мон тодӥсько, кин Тон, Инмарлэн Святоез».

²⁵ Нош Иисус сое дугдытыса шуиз: «Чалмытскы, пот со пушкысь».

²⁶ Соку пери сое сэзъяз-куалекъятӥз но, бадӟым куараен черектӥськыса, солэн пушкысьтыз потӥз.

²⁷ Ваньзы туж паймизы но ог-огзылэсь юалляськизы: «Мар та таӵе? Кыӵе таӵе та выль дышетон – кузё кариськыса, периосты косэ но, соос Солэсь кылзӥсько?»

²⁸ Ӝоген Со сярысь ивор быдэс Галилея музъеме вӧлмиз.

²⁹ Сӥнагогаысь чаляк потӥзы но Иаковен Иоаннэн ӵош Симонэн Андрейлэн гуртазы лыктӥзы.

³⁰ Симонлэн вармумиез пӧськылен висьыса кылле вал; со кышномурт сярысь соку ик Иисуслы веразы.

³¹ Дораз лыктӥз но, китӥз кутыса, сое султытӥз; пӧськылез соку ик быриз. Табере та кышномурт таослы юрттӥськыса улыны кутскиз.

³² Ӝыт пал, шунды пуксем бере, Со доры вань висись, перияськем адямиосты вайизы.

³³ Быдэс город ӧс выжые люкаськиз.

³⁴ Пӧртэм висёнъёсын курадӟисьёсты троссэ Со бурмытӥз; трос периосыз улляса поттӥз. Аслэсьтыз Христос луэмзэ Со периослы вераны ӧз лэзьы.

³⁵ Нош ӵукна вазь ик султыса потӥз но, калыктэм интые кошкыса, отын вӧсяськыса улӥз.

³⁶ Симон но соин огазьын ветлӥсьёс Со сьӧры мынӥзы.

³⁷ Сое шедьтэм беразы Солы шуизы: «Тонэ ваньмыз утчало».

³⁸ Иисус соослы шуиз: «Ойдолэ мыноме матысь гуртъёсы, городъёсы. Мон отын но тодытыны кулэ, со понна ик Мон лыктӥ уго».

³⁹ Быдэс Галилея музъемысь соослэн сӥнагогаостӥзы тодытыса ветлӥз, периосты улляса поттаз.

⁴⁰ Со доры гижлочерен висись мурт лыктӥз но сюлворыса, Солэн азяз пыдесъяськыса, шуиз: «Чылкытатэмед потӥз ке, Тынад монэ чылкытатэмед луоз».

⁴¹ Иисус сое жаляз, кизэ ӝутыса, со борды йӧтӥськиз но солы шуиз: «Мынам чылкытатэме потэ, чылкыта».

⁴² Та кылъёс бере висисьлэн мугорысьтыз соку ик гижлоосыз быризы, со чылкыт луиз.

⁴³ Юн алыса, Иисус соку ик сое келяса шуиз:

⁴⁴ «Уть, нокинлы но номыр эн вера; священник доры мыныса, солы возьматӥськы, мугорыд чылкыт луэм понна, Моисейлэсь косэмзэ ну, соослы тодытон понна».

⁴⁵ Нош со мурт татысь потӥз но асэныз луэм учыр сярысь ваньмызлы вераны кутскиз, соин сэрен Иисус городэ чакласькытэк пырыны ӧз быгаты ини, город сьӧрысь калык ветлонтэм интыосын Со улӥз. Со доры пӧртэм палъёсысь адямиос лыктылӥзы.