Иуда 1 - Библия удмурт кылын

¹ Иуда, Иисус Христослэн ляльчиез, Иаковлэн братэз, ӧтиськем муртъёслы, кинъёс Инмар Атай бордын дун-чылкыт луэмын, Иисус Христосэн утемын.

² Гажаса-жаляса, тупаса, яратыса улон тӥ пӧлын мед йылозы.

³ Гажаноосы! Асьмелэн огъя утиськонмы сярысь тӥледлы гожтыны бадӟым мылкыды ванен, мон тӥледлы таӵе курон гожтоно шуыса малпай – вӧсяськись калыклы пырак ӵожелы сётэм осконэз утьыны тыршыса ужалэ.

⁴ Уго куд-ог сьӧлыклэсь кышкасьтэмъёс, асьмелэн Инмармылэсь дэлетсэ азыса улон пала берыктӥсьёс, одӥг гинэ Кузё-Атаймылэсь Инмарлэсь но Кузё-Инмармылэсь Иисус Христослэсь куштӥськисьёс лушкемен асьме пӧлы пыризы – соослэн суд улэ сюронзы сярысь вашкала дауръёсы ик гожтэмын вал ини.

⁵ Мынам тӥледлы, тае тодӥсьёслы, тодады вайытэме потэ: Кузё-Инмар израиль калыкез Египетысь мозмытӥз, нош бӧрысь соос пӧлысь оскымтэосты быдтӥз.

⁶ Кылчинъёсты но, кудъёсыз Инмарлэсь соослы сётэм вылӥлыко луонзэс утьыны ӧз быгатэ, асьсэлэсь улон интызэс куштыса кошкизы – соосты пырак вапумъёс ӵоже пеймыт азьын туж бадӟым нуналлэн судэз дыръялы жильыетын думылыса возе.

⁷ Кызьы Содомен Гоморра но соос вӧзысь городъёс, соос выллем ик азон-калгон сьӧлык пӧлы усемъёс, пиосмурт пиосмуртэн, кышномурт кышномуртэн сьӧлыке пырисьёс, чик кысылӥсьтэм тыл пӧлы курадӟонэ сюризы – мукетъёссэ алон понна.

⁸ Чылкак озьы ик луоз таосын но – лулмугорзэс саптасьёсын, кузёосты кулэтэм карисьёсын, вылӥ властьёсты* урод кылъёсын тышкаськисьёсын.

⁹ Моисейлэн мугорыз пумысен ченгешон потэм бере Михаил архангел диаволэн вераськиз, но сое со пыкылыса судить карыны ӧз дӥсьты, но шуиз: «Кузё-Инмар тонэ судить мед кароз».

¹⁰ Нош таос мае уг тодо, со сярысь урод кыл верало. Кылдэмзыя валасьтэм пудо-животъёс выллем, мае тодо, соин асьсэды сисьто-быдто.

¹¹ Куректон-кайгу соослы, малы ке шуоно Каинлэн сюрестӥз мыно, Валаам кадь кузьым октон сьӧлыке пыро но Корей выллем асьсэлэн вогъяськон сямынызы быро.

¹² Таӵеос тӥляд гажаса-яратыса улонлы сӥзем ӝытъёсады возьытэз валасьтэм сурон бамъёс луо. Тӥледын валче кышкатэк сиыса-юыса, асьсэды куайыто. Соос – тӧлэн нуллӥськись вутэм пилемъёс; ишкалтэм, кык пол кулэм, емыш сётӥсьтэм сӥзьыл писпуос;

¹³ асьсэлэн юрӟым макеосынызы шукыяськись, лекъяськись зарезь тулкымъёс; йыромыса калгись кизилиос, соослы пумтэм вапумъёслы пеймытлэн пеймытэз дасямын.

¹⁴ Соос сярысь Енох но, Адам бордысен сизьыметӥез, азьпалзэ тодытыса вераз: «Тани, Аслаз туж трос сюрс святой Кылчинъёсыныз Кузё-Инмар лыктэ –

¹⁵ соос пӧлысь вань сьӧлыклэсь кышкасьтэмъёслэсь ваньзэ сьӧлыклэсь кышкатэк лэсьтэм урод ужъёссэс Со шарае поттоз; сьӧлыклэсь кышкасьтэмъёслэсь Солы пумит верам вань лек кылъёссы понна – ваньмызлы суд лэсьтоз».

¹⁶ Таослы номыр но уг яра вал, соослэн номырин но кӧтсы ӧз тырылы, мугорзылэсь юрӟым кулэ каронзэ быдэсъяса улӥзы (сьӧлыклэсь кышкатэк, законлы пумит); вылтӥяськыса вераськылӥзы, асьсэлы пайда басьтон понна адямиос азьын чеберъяськыса улӥзы.

¹⁷ Нош тӥ, гажаноосы, тодады возе Кузё-Инмармылэн Иисус Христослэн апостолъёсызлэсь азьвыл ик верамзэс:

¹⁸ соос тӥледлы веразы, кызьы берпум аръёсы мугорзылэн юрӟым кулэ каронъёссылы сётӥськыса улӥсь мыскылляськисьёс потозы.

¹⁹ Та адямиос люкиськонъёс-висъяськонъёс ваё, соос – таизлэн дуннелэн адямиосыз, соос бордын Святой Дух ӧвӧл.

²⁰ Нош тӥ, гажаноосы, асьтэдыз святойлэсь но святой осконды бордын юнматыса возе, Святой Духен тыр луыса вӧсяськыса улэ.

²¹ Инмарез яратыса улэ, Кузё-Инмармылэсь Иисус Христослэсь гажан-жалянзэ пумтэм вапумъёслы басьтонэз оскиськыса возьмалэ.

²² Куд-огзэ, осконзы лябен шонаськисьёсты, жалялэ,

²³ нош мукетъёссэ кышкаса уте, соосты тыл пӧлысь поттэ, сьӧлыкъёссэс шарае поттэ, но со дыре ик соослэсь кышкалэ, саптаськем мугорзы вылын возиськись дӥськутсы борды йӧтӥськыны ик юрдэ.

²⁴ Нош тӥледыз усёнлэсь утьыны, Аслаз пиштӥсь данлыкез азе дун-шектэм, шумпотонэн пачыл карыса пуктыны Быгатӥсьлы,

²⁵ Одӥг гинэ визьмолэсь но визьмо Инмармылы Утисьмылы Иисус Христос Кузё-Инмармы пыр вапумъёслэн кутсконысенызы данлык, быдӟым луон, кужым, кузё луон али но, котьку но пумтэм вапумъёсы. Аминь.