Иаков 1 - Библия удмурт кылын

1-тӥ ЛЮКЕТ

¹ Инмарлэн но Кузё-Инмарлэн Иисус Христослэн ляльчизы Иаков, пазьгиськыса палэнын улӥсь дас кык выжыослы – ваньдылы салам верасько.

² Агай-вынъёсы, пӧртэм визь сынаськонъёс улэ сюриды ке, туж шумпотэлэ.

³ Тодэлэ, тӥлесьтыд Инмарлы оскондэс эскерыку, чидан вордӥське шуыса.

⁴ Тӥ быдэсак дун-шектэмесь, номырлы но ёрмисьтэмесь мед луоды шуыса, тӥляд чиданды быдэс улонды ӵоже юн мед луоз.

⁵ Тӥ пӧлысь кинлэн ке визьлыкез уг ке тырмы, Инмарлэсь мед куроз. Инмар жалятэк, пыкылытэк ваньмызлы сётэ – курисьлы сётэмын луоз.

⁶ Оскыса, чик шекланытэк мед куроз, малы ке шуоно шекланыса улӥсь мурт тӧлын ӝуткам но пазяськыса улӥсь зарезь тулкымлы укша:

⁷ сыӵе адями медаз малпа Кузё-Инмарлэсь мар ке но басьтыны.

⁸ Отчы-татчы пазяськись малпанэн улӥсь адями аслаз сюрес вылаз юн уг сылы.

⁹ Куанер улӥсь агай-вын мед ушъяськоз аслаз вылӥын луэменыз,

¹⁰ нош узыр мурт – аслаз улӥын луэменыз, малы ке шуоно турын пӧлысь сяська кадь улонэд ортчоз-тӧлӟоз:

¹¹ шунды ӝужа, пӧсь луэ но турынэз ӵушка, солэн сяськаез усьылэ, солэн чебер тусыз быре. Озьы ик аслаз улон сюрес вылаз узыр мурт но шуя-быре.

¹² Визь сынаськонэз чидам мурт шудо, малы ке шуоно со эскеремын-чакламын луоз но соин со улонлэсь венецсэ басьтоз, кудзэ Кузё-Инмар Сое яратӥсьёслы кузьманы кыл сётӥз.

¹³ Визь сынаськон лыктыку нокин но медаз шуы: «Инмар визьме сына». Нокыӵе но урод ужлэн Инмарлэсь визьзэ сынамез уг луы, Инмар Ачиз но нокинлэсь визьзэ уг сына.

¹⁴ Котькин но, аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ.

¹⁵ Соку кырсь малпан кылдэ но сьӧлыкез вордӥськытэ, нош сьӧлык кулонэз вордӥськытэ.

¹⁶ Гажано агай-вынъёсы, ӧрекчаськонлы эн сётӥськелэ.

¹⁷ Котькудӥз ик ӟеч, дун-шектэм кузьым вылӥысь, югыт сётӥсь Атаймы дорысь ваське, Солэн воштӥськонэз, воштӥськонлэн вужерез но ӧвӧл.

¹⁸ Мылкыд кариз но – зэмлыклэн кылыныз Со асьмеды вордӥськытӥз, Солэн кылдытэмъёсыз пӧлын асьмеос нырысетӥ емышъёсыз мед луомы шуыса.

¹⁹ Озьыен, тодэ, гажано агай-вынъёсы: котькудӥз адями кылзӥськись мед луоз, кыл вераны дыртӥсьтэм, вожпоттӥсьтэм,

²⁰ уго адямилэн вожпотонэз Инмарлэн шонерлыкезъя улыны люкетэ.

²¹ Соин ик котькыӵе кырсь ужлэсь, уродлыклэсь куштӥське. Асьтэдыз востэм карыса, Инмар кылэз кабыл басьтэ, кудӥз тӥ пушкы мерттэмын, со тӥлесьтыд лулдэс утьыны быгатэ.

²² Инмар кылэз быдэсъяса улэ, кылзӥськыса гинэ эн улэ – асьтэдыз асьтэос эн ӧрекчалэ.

²³ Уго кин кылэз кылзэ но сое уг ке быдэсъя, со аслэсьтыз ымныр тусбуйзэ синучкон пыр чаклась адямилы укша:

²⁴ со ас шораз учкиз, палэнскиз но со куспын ик вунэтӥз, кыӵе со.

²⁵ Нош кин чик шектэм, эрик сётӥсь Инмар закон шоры учкоз но со бордын сюлмыныз улӥз ке – кылзӥськыса, вунэтытэк, уж вылын быдэсъяса – шудо луоз ужрадъянъёссэ быдэсъякуз.

²⁶ Тӥ пӧлысь кин ке но ачиз сярысь мон осконэн шонер улӥсь шуыса малпа ке, нош кылзэ уг ке куты, со ассэ ачиз ӧрекча, солэн осконэн шонер улонэз пайдатэм луэ.

²⁷ Инмар азьын, Атай азьын ярамон дун-чылкыт осконэн шонер улон луэ со: анайтэк-атайтэк кылем нылпиослы, палкышноослы ёрмыса-ӟудыса улон дыръязы юрттӥськон но та дуннелэн уродэныз-лекеныз саптаськытэк астэ ачид утьыса возён.