Филимонлы 1 - Библия удмурт кылын

¹ Павел, Иисус Христослэн пытсэтын пукисез, но Тимофей брат, гажано Филимонлы – милемын ӵош ужасьлы,

² гажано Апфия сузэрлы, Архипплы – милемын одӥг удысын ужась-тыршисьлы, тынад гуртад люкаськись черк калыклы:

³ Инмар Атаймылэсь но Кузё-Инмарлэсь Иисус Христослэсь тӥледлы дэлет но каньыллык сӥзиськомы.

⁴ Котьку вӧсяськонам тонэ тодам вайисько но Инмарелы тау карисько.

⁵ Кузё-Инмарлы Иисуслы осконэд но вань вӧсяськись калыкез яратонэд сярысь мон кылылӥ ни уго.

⁶ Мон вӧсяськисько милемын огкадь осконэд юн мед луоз, со тыныд мед тодытысал, Иисус Христос бордысь кыӵе ӟечлыкез асьмеос басьтӥськомы.

⁷ Тынад яратонэд монэ туж шумпоттӥз, мылкыдме лӧпкытӥз, малы ке шуоно тон пыр, брат, вӧсяськисьёслэн сюлэмъёссы буйгазы.

⁸ Христос бордын мон тонэ вордӥ бере, соин ик табере мон кышкатэк тынэсьтыд курыны быгатысал сое, мар тыныд лэсьтыны кулэ.

⁹ Но мон косонэн уг, тонэ яратыса куронэн тыныд вазиськисько, – мон со, Павел, вӧсяськисьёслэн валтӥсьсы, нош али Иисус Христослэн нимыз понна пытсэтын пукись,

¹⁰ Онисим пие пумысен мон тыныд куронэн вазиськисько. Пытсэтын пукыкум, со мыным пи луиз.

¹¹ Куке но со тыныд ярантэм луиз вал, нош табере со тыныд но, мыным но кулэ мурт луиз. Мон сое берен тон доры ыстӥсько,

¹² аслэсьтым сюлэмме сётэм кадь луисько, но тон сое бордад кут.

¹³ Мынам сое ас бордам воземе потэ вал, Ӟеч Ивор понна пытсэтын пукыкум, тон интые со мыным мед ужасал-тыршысал.

¹⁴ Но тынэсьтыд мылкыддэ тодытэк, номыр но лэсьтэме ӧз поты. Тынад ӟеч ужед кужмысь карытэмын медаз луы, аслад ӟеч мылкыд каремедъя лэсьтэмын мед луоз.

¹⁵ Оло нош, тон сое пырак ӵожелы ас бордад мед карод шуыса, со кӧня ке дырлы тон дорысь кошкылӥз?

¹⁶ Табере со тыныд ляльчи-медо ӧвӧл, ляльчилэсь-медолэсь со вылӥынгес ини, – табере со гажано брат, уката ик мон понна. Нош тон понна со адями кадь но, Кузё-Инмар бордын улӥсь агай-вын кадь но эшшо но дуногес луэ.

¹⁷ Озьыен, тон монэ эш шуыса лыдъяськод на ке, соку тон сое, кызьы монэ бордад кутӥськод, озьы ик сое но бордад кут.

¹⁸ Нош со тонэ маин ке ӝоже уськытӥз ке яке тыныд солэн пунэм тыронэз вань ке, тод, мон вылын со тырон шуыса.

¹⁹ Мон, Павел, тае аслам киыным гожтӥсько: мон солэсь пунэмзэ тыро, мон уг ни вераськы, тон ачид но мыным пунэм тыроно шуыса. Быдэс улонэд понна.

²⁰ Бен, брат, табере тон но монэ Кузё-Инмар понна шумпотты, Кузё-Инмар понна мынэсьтым сюлэмме буйгаты.

²¹ Тон монэ кылзӥськод шуыса, осконэн мон тыныд гожтӥсько. Мон тодӥсько, та куронэ сярысь но эшшо тросгес лэсьтод на шуыса.

²² Огкутскемен, мыным улон инты дася. Мон оскиськисько, тӥляд вӧсяськемдыя Инмар монэ тӥледлы ”кузьмалоз” шуыса.

²³ Тыныд Епафрас салам вера, Иисус Христос понна со но мон кадь ик пытсэтэ ворсамын;

²⁴ озьы ик салам верало Марк, Аристарх, Димас, Лука – монэн ӵош ужась-тыршисьёс.

²⁵ Кузё-Инмармылэн Иисус Христослэн дэлетэз тӥляд духеныды валче мед улоз. Аминь.