Ездра 1 - Библия удмурт кылын

1-тӥ ЛЮКЕТ

¹ Персиялэн эксэез, Кир, нырысетӥ арзэ эксэйын пукыку, Кузё-Инмарлэсь Иеремия пыр верам кылъёссэ быдэстон понна Кузё-Инмар Персиялэн эксэезлэсь, Кирлэсь, мылкыдзэ лӧпкытӥз; соку со быдэс эксэйлыказ кылын вераса но, гожъяса но ялыны косӥз:

² «Тазьы шуэ Персиялэн эксэез – Кир: музъем вылысь вань эксэйлыкъёсты Инмысь Инмар Кузё-Инмар мыным сётӥз, Со Иудеяысь Иерусалиме Аслыз корка пуктыны монэ косӥз.

³ Солэн вань калыкез пӧлысь тӥ пӧлын кин ке вань ке, – Инмарез соин мед луоз, – Иудеяысь Иерусалиме со мед мыноз, отчы Израильлэн Инмарезлы Кузё-Инмарлы корка мед пуктоз, – Иерусалимысь Инмарлы.

⁴ Нош ваньмыз, кин кытчы кылемын, кытын гинэ со уг улы, со интыысь адямиос солы мед юрттозы азвесен, зарниен, мукет ваньбурен, пудо-животэн, ӟеч мылкыдын Иерусалимысь Инмар корка пуктонэ мед сётылозы».

⁵ Иуда но Вениамин выжыослэн йыръёссы ӝутскизы, озьы ик священникъёс, левитъёс – ваньмыз, кинлэсь мылкыдзэ Инмар Иерусалимысь Кузё-Инмар коркаез пуктыны ӝутӥз.

⁶ Соослэн вань бускельёссы, ӟеч ужъёс лэсьтэм сяна, соослы азвесь сосудъёсын, зарниен, мукет ваньбурен, пудо-животэн, дуно арбериосын юрттӥськизы.

⁷ Кир эксэй Кузё-Инмарлэн коркасьтыз, Иерусалимысь, Навуходоносорлэсь басьтэм но ас инмарезлэн корказ понэм сосудъёссэ поттӥз, –

⁸ Персиялэн Кир эксэез соосты ваньбур утись Мифредатлэн киыныз поттӥз, нош со сое лыдъяса Иудеяысь кивалтӥсьлы Шешбацарлы сётӥз.

⁹ Тани соослэн лыдзы: куамын зарни тэркыос, сюрс азвесь тэркыос, кызь укмыс пурт,

¹⁰ куамын зарни чаша, ньыль сю дас кык полэсо азвесь чашаос, сюрс мукет сосудъёс:

¹¹ зарнилэсь но азвесьлэсь ваньмыз вить сюрс ньыль сю сосуд вал. Ваньзэ тае Шешбацар, Вавилонысь Иерусалиме улыны кошкисьёсты келякуз, бӧрсяз нуыны басьтӥз.