Есфирь 1 - Библия удмурт кылын

1-тӥ ЛЮКЕТ

¹ Ваньмыз та Артаксеркс дыръя вал, – та Артаксеркс кузёяськиз сю кызь сизьым улосвылъёсын, Индиысен кутскыса Эфиопияозь, –

² Артаксеркс эксэй Сузы шоркарысь эксэй пуконын пукыкуз,

³ куинетӥ арзэ кивалтон вакытаз, со юондыр ортчытӥз, – вань кузёйыръёссэ, бордаз ужась-тыршисьёссэ люказ, Персиялэн, Мидиялэн армиенызы кивалтӥсь йыръёсты, аслаз улосвылъёсыныз кивалтӥсьёссэ ӧтчаз,

⁴ аслаз эксэйлыкысьтыз туж трос узырлык люкаськемез возьматъяз, аслэсьтыз мальдытӥсь быдӟымлыксэ трос нуналъёс – сю тямыстон нуналъёс ӵоже – возьматъяса улӥз.

⁵ Та нуналъёс йылпумъяськем бере Сузы шоркарын улӥсь калыкезлы – бадӟымезлы но, покчиезлы но – эксэй юртлэн садо азбараз эксэй сизьым нунал ӵоже юондыр ортчытӥз.

⁶ Нап-горд буёло етӥн шортлэсь пунэм гозыосын-калъёсын азвесь кульчоос борды тӧдьы, чагыр буёло ыжгон катанчиос юнматэмын вал. Соос мрамор излэсь пуктэм юбоос йылын ошиськыса улӥзы.

⁷ Зарнилэсь, азвесьлэсь лэсьтэм кыллён интыос вожпыръем изъёсын, мраморен, перламутрен, сьӧдпыръем изъёсын вӧлдэм выж вылын сылӥзы.

⁸ Юонъёсты зарни сосудысь, [куамын сюрс талант сылӥсь] пӧртэм пумо сосудъёсысь лэзьяллязы; эксэй туж узыр вал, солэн винаосыз но туж трос вал. Йӧно кариськыса юизы, нокин но кужмысь ӧз косылы, малы ке шуоно эксэй ас юртаз улӥсь вань кивалтӥсьёслы косон сётӥз, ваньмызлы эрик сётэмын мед луоз шуыса.

⁹ Эксэй кышно Астинь но Артаксеркс эксэйлэн юртаз кышномуртъёслы юондыр ортчытӥз.

¹⁰ Сизьыметӥ нуналаз, вина юыса эксэйлэн сюлмыз шулдыр луэм бере, со Мегуманлы, Бизфалы, Харбоналы, Бигфалы, Авагфалы, Зефарлы, Каркаслы – Артаксеркс эксэй дорын ужаса-тыршыса улӥсь сизьым евнухъёслы – косон сётӥз:

¹¹ Астинь эксэй кышноез, йыраз эксэй изьы поныса, эксэй азе калыкъёслы, кивалтӥсьёслы солэсь чеберлыксэ возьматыны мед, пе, ваёзы, уго со туж чебер вал.

¹² Нош Астинь эксэй кышнолэн лыктэмез ӧз поты, эксэйлэсь евнухъёс пыр верам кылзэ санэ понэмез ӧз поты.

¹³ Эксэйлэн туж йырыз кур луиз, вожпотон пушказ ӝуатскиз. Валляна аръёсты тодӥсь визьнодчиослы эксэй вераз, – уго эксэйлэн ужъёсыз вань законэз но правоез тодӥсьёс азьын лэсьтӥськизы, –

¹⁴ со виын солэн матысь муртъёсыз вал: Каршена, Шефар, Адмафа, Фарсис, Мерес, Марсена, Мемухан – Персияысь, Мидияысь сизьым кивалтӥсьёс, соослы, эксэй азе капчиен пырыны быгатӥсьёслы, та эксэйлыкын нырысетӥ радъёсын пукылӥсьёслы, эксэй вераз:

¹⁵ «Законъя мар кароно эксэйлэн Астинь кышноеныз Артаксеркс эксэйлэсь евнухъёс пыр верам кылзэ санэ понымтэез понна?»

¹⁶ Эксэй азьын, кивалтӥсьёс азьын Мемухан шуиз: «Эксэй азьын гинэ Астинь эксэй кышно янгыш ӧвӧл, со янгыш вань кивалтӥсьёс, вань калыкъёс азьын, Артаксеркс эксэйлэн вань улосвылъёсаз улӥсьёс азьын;

¹⁷ малы ке шуоно эксэй кышнолэн та ужез вань кышномуртъёс доры вуоз, соку соос кузпалъёссэс санэ понэмысь дугдозы но шуозы: ”Артаксеркс эксэй ас кышнозэ Астинез ас азяз вуттыны косӥз, нош со ӧз мыны”.

¹⁸ Табере Персияысь, Мидияысь кивалтӥсьёслэн кышнооссы эксэй кышнолэн та ужез сярысь кылозы но эксэйлэн вань кивалтӥсьёсызлы тазьы ик вераны кутскозы; кылзӥськытэк улонъёс, ӝоже усёнъёс трос луозы.

¹⁹ Эксэйлы ярамон ке, со эксэй пуктон-косонзэ мед гожтоз но сое Персия, Мидия кунъёслэн законъёсазы мед пыртозы, азьланяз со пуктон-косон медаз ни воштӥськылы, Астинь Артаксеркс эксэйлэн азяз уз ни пота шуыса, нош солэсь эксэй кышно луон данлыксэ эксэй мукетызлы, солэсь умойгес луисезлы сётоз.

²⁰ Эксэйлэн та пуктон-косонэз потыса, солэн туж бадӟым, быдэс куназ вӧлмем бере вань кышномуртъёс асьсэлэсь картъёссэс, – узыресь-а вал соос, куанересь-а вал соос, – сӥлы карыса улыны кутскозы».

²¹ Та кылъёс эксэйлы но, кивалтӥсьёслы но яразы; Мемуханлэсь верам кылзэ санэ поныса, эксэй та ужзэ лэсьтӥз.

²² Эксэй вань улосвылъёсаз та гожтэтэз келяз, котькудӥзлэн аслаз алфавитэныз, котькуд калыклэн ас кылаз берыктыса гожтэт гожъязы, отын верамын: котькудӥз но воргорон аслаз кышноезлы, семьяезлы кузё мед луоз, та сярысь котькуд адямилы анай кылыныз ялоно.