Даниил 1 - Библия удмурт кылын

1-тӥ ЛЮКЕТ

¹ Иоакимлэн, Иудей эксэйлэн, кивалтонэзлэн куинетӥ араз Иерусалим доры Вавилонлэн Навуходоносор эксэез вуиз, сое со котыртӥз.

² Кузё-Инмар со киулэ Иоакимез, Иудеялэсь эксэйзэ, озьы ик Инмар коркась куд-ог сосудъёсты сётӥз. Со соосты Сеннаар музъеме, аслаз инмарезлэн корказ келяз. Та сосудъёсты со ас инмарезлэн коркасьтыз дуно тӥрлык возён интыяз пыртӥз.

³ Соку эксэй евнухъёсызлэн кузёзылы, Асфеназлы, израиль пиос пӧлысь сӥё-дано, эксэй выжыысь потэмъёссэ вайыны косӥз,

⁴ чылкыт, чик шектэм мугоро, чебер тусбуё, вань наукаос удысын ужаны быгатӥсьёсты, наукаосты тодӥсь-валасьёсты, визьлы шаплыесь, эксэй юртын ужаны быгатоно пинал пиосты вайыны косӥз, халдей кыллы, книгаослы соосты дышетыны косӥз.

⁵ Эксэй ӝӧк вылысь сиёнэн соосты сюдыны, соослы вина сётъяны эксэй косӥз, сое со ачиз но юэ вал; куинь ар ӵоже соосты дышетыны, быдэ вуттыны косӥз, нош собере соос эксэй азе султыны кулэ вал.

⁶ Соос пӧлын Иуда выжыысь Даниил, Анания, Мисаил, Азария нимо пиос вал.

⁷ Евнухъёслэн кивалтӥсьсы соослэсь нимзэс тазьы воштӥз: Даниилэз – Валтасар, Ананиез – Седрах, Мисаилэз – Мисах, Азариез – Авденаго кариз.

⁸ Данииллэн сюлмаз таӵе малпан пыриз: эксэй ӝӧк вылысь сиёнэн, винаен, кудзэ эксэй сие, юэ, медаз саптаськы вал шуыса, соин ик со евнухъёслэн эксэйзылэсь куриз, саптаськонлэсь утиськыны мед быгатысал шуыса.

⁹ Инмар Даниилэз гажаз-жаляз: евнухъёслэн кивалтӥсьсылы ӟеч мылкыд сётӥз.

¹⁰ Соку евнухъёслэн кивалтӥсьсы Данииллы шуиз: «Кышкасько мон кузёелэсь, эксэйлэсь, со ачиз вераз уго кыӵе сиёнэн, юонэн тӥледыз сюдыны-вордыны кулэ: со адӟиз ке, тӥляд ымнырды тӥляд ёзъёстылэн, пинал пиослэн, сярысь начаргес адӟиське, соку мон тӥледын сэрен эксэй азьын янгыше усё».

¹¹ Соку Даниил Амелсарлы, евнухъёслэн кивалтӥсьсылэн Даниилэз, Ананияез, Мисаилэз, Азарияез чаклан понна пуктэм муртэзлы, шуиз:

¹² «Аслэсьтыд ляльчиостэ чакласа-эскерыса возь: дас нунал ӵоже милемлы сиыны емыш, юыны ву гинэ мед сётозы;

¹³ собере тон азе ми но, эксэй сиён сиыса улӥсь со пинал пиос но ымнырмес возьматыны мед лыктомы, нош собере ляльчиосыныд лэсьты озьы, кызьы тыныд кулэ».

¹⁴ Соослэсь куронзэс со санэ басьтӥз но дас нунал ӵоже соосты эскерыса-чакласа улӥз.

¹⁵ Дас нунал ортчем бере соослэн ымнырзы чебергес, мугорзы веськресгес луэм эксэй ӝӧк вылысь сиён-юонэн кӧтсэс тырыса улӥсь пинал пиослэн сярысь.

¹⁶ Соку Амелсар соослы эксэй ӝӧк вылысь сиёнэз, юонэз ӧз ни сётъя, емышен сюдыны кутскиз.

¹⁷ Та ньыль пинал пиослы Инмар тодонлык, вань книгаосты, визьлыкез валан сётӥз, нош Данииллы эшшо вӧтъёсты, адӟонъёсты валэктыны быгатонлык сётӥз.

¹⁸ Та нуналъёс ортчем бере эксэй соосты ас дораз возьматыны вайыны косӥз, соку евнухъёслэн кивалтӥсьсы соосты Навуходоносор азе вайиз.

¹⁹ Эксэй соосын вераськиз, вань пинал пиос пӧлысь Данииллы, Ананиялы, Мисаиллы, Азариялы укшасез ӧз сюры. Соос эксэй дорын ужаса-тыршыса улыны кутскизы.

²⁰ Котькыӵе ужын эксэй соослэсь визьмо валэктон басьтылӥз, мар сярысь гинэ со соослэсь ӧз юа, соос дас пол визьмогес ответ сётылӥзы, солэн эксэйлыказ улӥсь вань лушкемлыкъёсты тодыны быгатӥсьёсын, туно-пеллёосын ӵошатыса.

²¹ Кирлэн эксэйын пуконэзлэн нырысетӥ арозяз Даниил отын улӥз.