Авдия 1 - Библия удмурт кылын

¹ Авдийлэн адӟонэз. Тазьы шуэ Инмар Кузё-Инмар Едом сярысь: Кузё-Инмар дорысь ми ивор кылӥмы, ивортӥсь калыкъёслы тазьы ялыны ыстэмын: «Султэлэ, солы пумит ожен султоме!»

² Тани, Мон тонэ калыкъёс куспын покчи кари, туж сӥтэм-сантэм луыны тон кылемын.

³ Сюлмыдлэн вылтӥяськонэз тынэсьтыд визьдэ тугаз: тон улӥськод изгурезьёсысь пасьёсын, ӝужыт интыын но ас сюлмыныд шуиськод: «Кин монэ музъем вылэ куштоз?»

⁴ Нош тон ӧрӟи музэн вылэ ке но ӝутскид, кизилиос пӧлы аслыд кар ке но лэсьтӥд, отысь но Мон тонэ муз вылэ кушто, – шуэ Кузё-Инмар.

⁵ Лушкаськисьёс-а тон доры лыктылӥзы, уйёсы таласа ветлӥсьёс-а тон доры вуылӥзы, сокем тон номыртэк кельтэмын? Но соос лушкасалзы сомындазэ гинэ, кӧня соослы кулэ. Виноград бичасьёс тон доры пырысалзы ке, кӧня ке но мульызэ ӧй кельтысалзы-а?

⁶ Исавлэн маиз вал, ваньзэ лушкаллям, вань ватэгъёссэ утчаса шедьтӥллям!

⁷ Ӧрекчалозы тонэ юлтошъёсыд, кунгож дорозь соос тонэ улляса лэзёзы, тупаса улоно муртъёсыд тонэ ёртозы, няньдэ сиисьёс тыныд шуккет сётозы. Ӧвӧл отын визьлыкез!

⁸ Со нуналэ уз луы-а тазьы, – шуэ Кузё-Инмар, – Едомысь визьнодоосты быдто, Исавлэн гурезяз тодӥсь-валасьёсты погырто?

⁹ Феман, тынэсьтыд кышканэз тодӥсьтэм муртъёстэ кышкан куалекъятоз, Исавлэн гурезьысьтыз ваньзы быдтэмын мед луозы.

¹⁰ Иаков браттэ ёртыса-ӝикатыса воземед понна тонэ возьдаськон шобыртоз, пырак ӵожелы тон быдтэмын луод.

¹¹ Со нуналэ, куке тон ваче пумитын сылӥд, мурт калыкъёс солэсь ожгарчиоссэ пленэ нуо вал, мурт выжыос солэн капкатӥз пыризы но Иерусалим пумысен жеребе куязы, соос пӧлысь одӥгезлы тон укшаськод вал.

¹² Улляса лэзем нуналаз братэд шоры лек мылкыдын шумпотыса учкыны уг яра вал, Иуда нылпиос бырылон нуналэ со понна шумпотыса улыны уг яра вал, курадӟон нуналазы ымдэ паськыт усьтыса улыны уг яра вал.

¹³ Тыныд Мынам калыкелэн шугадӟон нуналаз солэн капкаетӥз пырыны уг яра вал, солэн бырон нуналаз курадӟонэз шоры учкыны но уг яра вал, солэн куректон-кайгу нуналаз ваньбурез борды но йӧтӥськыны уг яра вал.

¹⁴ Сюрес вожъёсын но сылыны уг яра вал пегӟыса кошкисьёссэ виылон понна, шугадӟон нуналэ улэп кылемъёссэ но тушмон киулэ сётыны уг яра вал.

¹⁵ Уго вань калыкъёс доры вуыны Кузё-Инмарлэн нуналыз матын: кызьы тон лэсьтӥськод вал, озьы ик тыныд но лэсьтэмын луоз, пунэм берыктон йыр вылад вуоз.

¹⁶ Кызьы тӥ Мынам святой гурезям юиды, озьы вань калыкъёс котьку но юозы, юозы, ньылозы, озьы луоз: соос чик но ӧй вал кадь.

¹⁷ Нош Сӥон гурезьын утиськон луоз, со святой инты луоз; соку Иаковлэн выжыез ас люкетсэ ас киулаз басьтоз.

¹⁸ Соку Иаковлэн юртэз тыл луоз, Иосифлэн юртэз – гомась тыл, нош Исавлэн юртэз – куро: тыл понозы но быдтозы сое, Исавлэн юртысьтыз нокин но улэп уз кыльы, уго тазьы Кузё-Инмар шуиз.

¹⁹ Лымшор палаз улӥсьёс Исавлэсь гурезьзэ киултозы, нош нёжалын улӥсьёс – филистим калыкез; соос Ефремлэсь бусызэ, Самариялэсь бусызэ киулазы басьтозы, нош Вениамин Галаадэз киултоз.

²⁰ Израиль пиос пӧлысь пленэ нуэм ожгарчиос Сарепта дорозь Хананей музъемез киултозы, нош Иерусалимысь поттыса улыны интыямъёс, Сефарадэ интыяськемъёс, лымшорысь городъёсты киулазы басьтозы.

²¹ Утисьёс Сӥон гурезе лыктозы Исавлэсь гурезьзэ судить карон понна, соку Кузё-Инмар Ачиз эксэй луоз.