Амос 1 - Библия удмурт кылын

1-тӥ ЛЮКЕТ

¹ Амослэн верам кылъёсыз. Фекояын пудо возьмаса улон дыръяз со Инмарлэсь Израиль пумысен верам кылъёссэ кылӥз. Та Иудеяын Озия, нош Израильын Иоаслэн Иеровоам пиез эксэйын пукон нуналъёсы, музъем зурканлэсь кык ар азьвыл вал.

² Со шуиз: «Кузё-Инмар Сӥонысен гудыртоз, Иерусалимысен куаразэ поттоз – соку пудо возьмасьёслэн улон интыоссы бӧрдозы, Кармил гурезьлэн йылыз куасьмоз.

³ Тазьы шуэ Кузё-Инмар: ”Дамасклэн куинь йыружез понна, ньыль йыружез понна уг жаля сое, малы ке шуоно Галаадэз соос корт кутэсэн кутсазы.

⁴ Азаиллэн юртэз вылэ тыл лэзё – Венададлэсь четлыкъёссэ-юртъёссэ тыл ньылоз.

⁵ Дамасклэсь капка ворсэтъёссэ куашкато, Авен нёжалын улӥсьёсты быдто, Еден юртысь эксэй бодыез кутыса возисез но, соку арамей калык Кире пленэ нуэмын луоз”, – шуэ Кузё-Инмар.

⁶ Тазьы шуэ Кузё-Инмар: ”Газалэн куинь йыружез понна, ньыль йыружез понна уг жаля сое, малы ке шуоно соос вань калыкез пленэ поттӥзы соосты Едомлы сётон понна.

⁷ Газалэн борддор вылаз тыл лэзё – солэсь четлыкъёссэ-юртъёссэ тыл ньылоз.

⁸ Азотысь улӥсьёсты быдто, Аскалонысь эксэй бодыез кутыса возисез но быдто; Экрон вылэ киме мычо – соку филистим калыклэн кылем люкетэз быроз”, – шуэ Инмар Кузё-Инмар.

⁹ Тазьы шуэ Кузё-Инмар: ”Тирлэн куинь йыружез понна, ньыль йыружез понна уг жаля сое, малы ке шуоно соос вань пленэ шедемъёсты Едомлы сётӥзы, агай-вынлыко кусыпъёссэс тодазы ӧз вае.

¹⁰ Тирлэн борддор вылаз тыл лэзё – солэсь четлыкъёссэ-юртъёссэ тыл ньылоз”.

¹¹ Тазьы шуэ Кузё-Инмар: ”Едомлэн куинь йыружез понна, ньыль йыружез понна уг жаля сое, малы ке шуоно со аслаз выныз сьӧры мечен уйылӥськиз, ӵыжы-выжы луонзэс кулэтэм кариз; вожзэ поттыса, ялан йыркуръяськыса улӥз, ялан лекъяськыса улӥз.

¹² Феман вылэ тыл лэзё, соку Восорлэсь четлыкъёссэ-юртъёссэ со ньылоз”.

¹³ Тазьы шуэ Кузё-Инмар: ”Аммон пиослэн куинь йыружзы понна, ньыль йыружзы понна уг жаля соосты, малы ке шуоно соос асьсэлэсь музъемзэс бадӟыматон понна Галаадын нуны ваёно кышноосты коразы.

¹⁴ Раввалэн борддорыз вылэ тыл ӝуато – солэсь четлыкъёссэ-юртъёссэ тыл ньылоз, ожмаськон нуналэ чир кесяськыкузы, сильтӧло нуналэ тӧлпери пельтыку.

¹⁵ Соослэн эксэйзы пленэ нуэмын луоз, соин ӵош солэн кивалтӥсьёсыз но”, – шуэ Кузё-Инмар».