2 Фессалоникаын улӥсьёслы 1 - Библия удмурт кылын

1-тӥ ЛЮКЕТ

¹ Павел, Сӥлуан но Тимофей – Инмар Атаймы но Кузё-Инмар Иисус Христос бордын улӥсь Фессалоникаысь черклы:

² Инмар Атаймылэсь но Кузё-Инмарлэсь Иисус Христослэсь дэлетсэ, каньыллыксэ тӥледлы сӥзиськомы.

³ Агай-вынъёс, ми котьку но тӥ понна Инмарлы тау карыны кулэ. Со шонер. Уго тӥляд осконды кужмоя, куспады ог-огдэс яратонды но будэ.

⁴ Соин ик ми Инмарлэн черкъёсаз тӥледын ушъяськиськомы. Котькыӵе уллянъёс, куректон-кайгуос пӧлын улыса но, тӥ ваньзэ чидаськоды, оскон бордын кужмо сылӥськоды.

⁵ Соос луо Инмарлэн шонерлыко судэзлэн тодметъёсыз. Инмарлэн Эксэйлыказ пырыны ярамонэсь луон понна тӥ куректон-кайгу чидано луиськоды.

⁶ Инмар шонер лэсьтэ: тӥледыз сантэмасьёслы Со куректон-кайгуэн пунэмзэ берыктэ,

⁷ нош тӥледлы, ултӥям муртъёслы, Кузё-Инмар Иисус, Аслаз кужмо Кылчинъёсыныз Инмысь лыктыкуз, милемын валче шумпотон сётоз.

⁸ Инмарез тодӥсьтэмъёслы, Кузё-Инмармылэсь Иисус Христослэсь Ӟеч Иворзэ кабыл басьтӥсьтэмъёслы гомась тыл пушкын Со пунэмзэ берыктоз.

⁹ Сыӵе адямиослэн азьпал адӟонзы – пумтэм вапумъёслы бырон. Кузё-Инмарлэн син азьысьтыз, Солэн быдӟымлыко пиштӥсь данлыкез бордысь соос уллямын луозы.

¹⁰ Святойёсыз бордын данэ потыны, вань оскисьёслы паймыны луымон лыктон нуналаз, соос пӧлын тӥ но луоды, малы ке шуоно тӥ оскиды солы, мае ми тӥледлы тодытӥмы.

¹¹ Соин ик котьку но тӥ понна вӧсяськиськомы: Инмар тӥледыз ӧтем улонэзлы тупамонэсь мед кароз, Аслаз кужыменыз котькыӵе ӟеч уж лэсьтыны, оскондэс кужмоятыны Со ӟеч эриксэ мед сётоз шуыса.

¹² Инмармылэн, Кузё-Инмарлэн Иисус Христослэн тӥледлы сётэм дэлетэныз, Кузё-Инмармылэн Иисус Христослэн нимыз тӥ пыр данэ мед потоз, нош тӥ – Со пыр данэ мед потоды.