Софония 3 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

3-тӥ ЛЮКЕТ

¹ Куректон-кайгу кырсь, саптаськем городлы, ӝикатыса-ёртыса возисьлы.

² Верам кылэз уг кылзы, дышетон-нодъянэз кабыл уг басьты, Кузё-Инмарлы уг оскиськы, ас Инмарезлэн матаз уг мыны.

³ Солэн котырысьтыз кивалтӥсьёсыз – бурсыса ветлӥсь сьӧсь пӧйшуръёс, судьяосыз – ӝытазе ветлӥсь кионъёс, ӵукнаозь одӥг лыэз но кельтӥсьтэмъёс.

⁴ Солэн пророкъёсыз капчи визьемесь, кескичесь; священникъёсыз дун-чылкыт интыез саптало, законэз сӧрыса уло.

⁵ Кузё-Инмар со пӧлын шонерлыко, Со шонертэм ужез уг лэсьты, ӵукналы быдэ, котьку но Со Аслэсьтыз шонерлыко судить каремзэ возьматэ; нош законлы пумит улӥсь мар со возьдаськон – уг тоды.

⁶ Мон калыкъёсты быдтӥ, соослэн юнматскон каръёссы куашкатэмын; ульчаоссэс тырттэм кельтӥ, табере соос кузя нокин но уг ни ветлы; городъёссы куашкатэмын: улӥсьёсыз ӧвӧл, одӥг адями но ӧвӧл.

⁷ Мон шуи: «Мынэсьтым гинэ кышка, дышетонме-нодъянме кабыл басьты!», соку солэн улон интыез куашкатэмын ӧй луысал, солы дасям вӧсь каронэ со доры ӧй вуысал; нош соос сюлмысьтызы тыршизы асьсэлэсь вань ужъёссэс сӧрыны.

⁸ Озьыен, вите Монэ, – шуэ Кузё-Инмар, – тарканы султон нуналозям вите, уго Мон малпай калыкъёсты ӧтьыны, эксэйлыкъёсты люканы, соос вылэ Аслэсьтым вожпотонме, йыркурелэсь тылзэ кисьтыны, соку Мынам вожпотонэлэн тылыз быдэс музъемез ньылоз.

⁹ Соку Мон калыкъёслы нош ик чылкыт кылын-ымын вераськыны луонлык сёто, Кузё-Инмарлы ваньзы вазиськыны мед быгатозы, огкылысь Солы мед ужалозы-тыршозы шуыса.

¹⁰ Эфиопиялэн шур сопалысьтыз Мыным вӧсяськыса улӥсьёс, пазьгиськыса улӥсь нылпиосы, Мыным кузьым-салам вайыса лыктозы.

¹¹ Со нуналэ тон урод ужъёсыныд астэ возьытэ уд ни вутты, кызьы тон азьло Мон азьын сьӧлыкаса улӥд, уго соку Мон тон пӧлысь асьсэлэн сӥё-дано луонэнызы ушъяськисьёсты палэнто, азьланяз Мынам святой гурезям астэ вылӥ карыса уд ни улы.

¹² Тон пӧлы огшоры, зӥбыт-востэм калыкез кельто, соос Кузё-Инмар вылэ оскиськыса улозы.

¹³ Израильлэн кылем люкетъёсыз шонертэм ужъёс уз ни лэсьтэ, ӧрекчаськыса уз ни вераське, кыл йылазы кескичлыкез уз ни кыльы, соос ас понназы возь вылтӥзы ветлозы, шутэтскозы, нокин но соосты уз улля.

¹⁴ Сӥон ныл, шумпот! Шулдыръяськы, Израиль! Иерусалим ныл, вань сюлмысьтыд шулдыръяськы, шумпот!

¹⁵ Кузё-Инмар воштӥз Аслэсьтыз тыныд дасям вӧсь каронзэ, улляз тушмондэ! Кузё-Инмар, Израильлэн эксэез, тон пӧлын: азьланяз уродлыкез уд ни адӟы.

¹⁶ Со нуналэ Иерусалимлы шуозы: «Эн кышка», Сӥонлы: «Киосыд медаз лябӟелэ!».

¹⁷ Инмаред Кузё-Инмар тон пӧлын: Со кужмо, тонэ утёз; тон понна Со шумпотыса шулдыръяськоз; Аслаз яратонэз ванен Со тонэ гажалоз-жалялоз, тон понна шумпотыса, шулдыръяськыса улоз.

¹⁸ Данлыко шумпотон-шулдыръяськонъёсы лыктэмзы потыса ӝоже усемъёсты огазе люкало; соос но тынад калыкед, сӥтэм-сантэм улон соосты нюртыса возе.

¹⁹ Тани, тынэсьтыд вань ӝикатыса возисьёстэ со виын Мон ӝикато но чутӥсьёсты утё, пазьгиськемъёсты огазе люкало, сантэмаськыса улэм музъем вылазы соослы сӥ-сан, данлык сёто.

²⁰ Со дыре тӥледыз ваё, соку ик тӥледыз огазе люкало; дунне вылысь вань калыкъёс пӧлын тӥледыз сӥё-даноесь, ушъяны ярамонэсь каро, соку пленэ шедемъёстэс тӥляд син азяды берыкто, – шуэ Кузё-Инмар.