Левит 1 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

1-тӥ ЛЮКЕТ

¹ Вӧсяськон скинияысен Кузё-Инмар Моисейлы вазиськыса шуиз:

² «Израиль пиослы ялыса тазьы шу: ”Тӥ пӧлысь кинлэн ке но куке но Кузё-Инмарлы курбон ваемез потӥз ке, соку пудоос пӧлысь вайыны малпаз ке, сюро таза пудоез, сюро векчи пудоез курбонлы мед сётоз.

³ Тылын сутӥськись курбонлы сюро таза пудоез вайиз ке, со ош мед луоз, мугораз шекъёсыз медаз луэ; Кузё-Инмарлэсь ӟеч эриксэ басьтон понна вӧсяськон скиниялэн ӧс дораз сое мед ваёз;

⁴ тылын сутӥськись курбонлы дасям пудоезлэн йыр вылаз со кизэ мед поноз – соку сьӧлыкъёслэсь сузяськыны ӟеч эрик басьтоз;

⁵ Кузё-Инмар азьын ошпизэ мед вандоз; нош Ааронлэн пиосыз, священникъёс, вир мед ваёзы но вӧсяськон скинияе пырон азьын сылӥсь курбон сётон ӝӧк вылэ котыр ласянь вирез мед пазялозы;

⁶ тылын сутӥськись курбонлы дасям пудолэсь кузэ курбон сётӥсь мурт ачиз мед ниоз, сӥльзэ люкетъёслы мед вандылоз;

⁷ нош Ааронлэн пиосыз, священникъёс, курбон сётон ӝӧк вылэ тыл мед понозы, со вылэ пу мед тырозы;

⁸ Ааронлэн пиосыз, священникъёс, курбон сётон интыын тылын ӝуась пуос вылэ курбон пудолэсь люкетъёссэ, йырзэ, кӧйзэ мед тырозы;

⁹ нош курбон пудолэсь пуш арбериоссэ, пыдъёссэ мед миськозы но, священник ваньзэ тае курбон сётон интыын мед сутоз: та тылын сутӥськись курбон, Кузё-Инмарлы ярамон ческыт зын поттӥсь курбон та.

¹⁰ Кин ке но [Кузё-Инмарлы] тылын сутӥськись курбонлы сюро векчи пудо вайиз ке, со така яке кечтака мед луоз, мугораз шекъёсыз медаз луэ, [солэн йыр вылаз кизэ мед поноз.]

¹¹ Курбон сётон ӝӧклэн уйпал люкетаз Кузё-Инмар азьын со курбон пудозэ мед вандоз; Ааронлэн пиосыз, священникъёс, та вирен курбон сётон ӝӧк вылэ котыр ласянь мед пазялозы;

¹² пудо сӥлез люкетлы-люкетлы мед вандылозы, йырзэ вандыса мед басьтозы, кӧйзэ мед октозы; собере соосты священник курбон сётон интыын ӝуась пу вылэ мед тыроз,

¹³ нош пушкысьтыз арбериоссэ, пыдъёссэ вуэн мед миськозы но ваньзэ таосты священник курбон сётон ӝӧк вылын мед сутоз: та тылын сутӥськись, Кузё-Инмарлы ярамон ческыт зын поттӥсь курбон.

¹⁴ Тылобурдоез, тылын сутыса, Кузё-Инмарлы курбон вае ке, нюлэс дыдыкез яке гурт дыдык пиосты мед ваёз;

¹⁵ священник сое курбон сётон ӝӧк доры мед ваёз; чыртызэ позыртыса, йырзэ мед ишкалтоз но курбон сётон ӝӧк вылын сое мед сутоз, нош вирыз курбон сётон ӝӧклэн борддор бордаз мед виялоз;

¹⁶ ӵемонзэ, тылыоссэ мед октоз но курбон сётон ӝӧклэн шундыӝужан палысьтыз пень вылэ мед куштоз;

¹⁷ бурдъёссэ мед тӥялтоз, но ишкалтыса соосты медаз басьты, курбон тылобурдоез священник, курбон сётон ӝӧк вылын тылын ӝуась пуос вылэ поныса, мед сутоз: та тылын сутӥськись курбон, Кузё-Инмарлы ярамон ческыт зын поттӥсь курбон”».