YUNUS 1 - Susula Malalaok Hehelu Palak Ma Hehelu Beuk

Yunus ta tunga Manetualain paletan-na fa

¹ Faik esa boema, Manetualain kokolak no Yunus fo Amitai anan-na,

² nae, “Muu leo Niniwe fo kota matua ndia muu, fo fen balataak, nanahu Au bubuluk basa laun-nala mangalauk lanseli.”

³ Tehu Yunus neu leo eno fe'ek neu, fo dook-ka neme Manetualain mai. Neu leo Yopa neu, de ana hapu ofak esa sanga neu leo Spanyol neu. Ana asa basa susula pas boema, ana sa'e leo ofak lain neu, de neu leo Spanyol neu fo dook-ka neme Manetualain mai.

^4-5 Yunus kona leo ofak-ka teioen dale neu, de nangape'uk neu ndia, boema ana sungu namanee. Basa boema, Manetualain fe ani-sangu da'di nai tasi lai, boema lii matuaina da'dileona, de ana fepa ofak ndia, nalosa isabai-na ofak-ka nakalulutuk. Basa ofa isi-la bii lanseli, de ala nggasi loke tutulu-fafalik neme sila esa-esak lamatua daebafan-na mai. Fo sue kande ofak-ka boso hala, de ala tu'u heni ofak ndia bua-lo'an leo tasi dale neu.

⁶ Nai lelek ofak ndia manaho'u ulin-na kona leo ofak-ka teioen dale neu boema, nita Yunus nai ndia, te ana bei sungu. Boema nae, “Hapu nai bee, o bisa sungu nai ani sangu leo ia-ka! Wei, fo'a! Fo hule-haladoi neu o lamatua daebafam-ma, fo moke tutulu-fafalik. See bubuluk, fafa'kama dalen-na tu'da neu ita, fo ita ta mopo-mate fa.”

⁷ Yunus ma manaho'u uli ndia kae lala lain boema, ofak ndia ofa isin-nala esa kokolak no esa nae, “Mai fo ata tu'u batu, fo ela ata bubuluk, see kande nasala, nalosa ita hapu soe ia!” Ala tu'u batu boema, la'e Yunus na'den-na.

⁸ Boema lafa'da Yunus lae, “Tete'ek-ka, o nde meni soe ia do? O meme bee mai? O leo beek? Tao le'e de, o nai ia?”

⁹ Yunus nataa nae, “Au hataholi Ibrani. Au sene-do'ok neu Manetualain. Manetualain manai nusa so'dak fo manamakadada'dik tasi ma dae ma'dak-ka.”

¹⁰ Basa boema, ana tui, tao leo beek de nalai neme Manetualain mai. Ofa isi-la lamanene dede'ak ndia boema, ala boetai bibiik-ka, de lafa'dan lae, “O tatao-nono'im ndia, anseli!”

¹¹ Ndia te, ani sangu boetai nakadedele, boema ofa isi-la latanen lae, “Ami tao beek fo daenga ani-sangu matuaina ia nakamate?”

¹² Boema, Yunus nataa nae, “Tapa au leo tasi dale neu, soona tao leo bee o, ani-sangu matuaina ia nakamate. Nana besak ia, au bubuluk basa, au nde uni soe-a, nalosa ani-sangu matuaina ia, la'e emi.”

¹³ Tehu basa ofa isi-la bei puselanggeok-ka no sefe ofak ndia leo dae ma'dak-ka neu. Tehu ani-sangu matuaina boetai nakadedele, nalosa sila puselai panan ndia sosoa-ndandaan ta.

¹⁴ Hu ndia de, laloo neu Manetualain lae, “Ou Manetualain, ami dokodoe, fo ami boso mopo-mate, nanahu ami taomisa hataholi fo, ta nasala ami fa. Ou Manetualain, O tao basa hata fo O mahiik-kana so.”

¹⁵ Boema ala tapa Yunus leo tasi dale neu. Boema ani-sangu matuaina ndia nakamate.

¹⁶ Ofa isi sila-la, bii lanseli neu Manetualain, de ofak-ka see boema, ala tunu-hotu tutunu-hohotuk, ma ala helu dede'a mata-matak-kala neu Manetualain.

¹⁷ Ndia te, Manetualain nadenu i'a matuaina esa ko'don-na Yunus. Boema Yunus leo nai i'ak ndia tein dale, lele'dok 3 le'odaek 3.