NEHEMIA 6 - Susula Malalaok Hehelu Palak Ma Hehelu Beuk

Buao makahatuk fo la'ban Nehemia

¹ Sanbalat, Tobia, Gesyem ma ami musu fe'em-mala lamanene lae ami tao mahii basa papala nanadamak-ka ma lae ami dama ketu basa bolon-nala, leomae nai lelek ndia, ami beita tao kota lelesuinan-nala doon-nala leu fa.

² Boema Sanbalat ma Gesyem haitua fe au susula nalook fo daenga au u fo ela au atongo o sila nai desa esa nai Bafak Ono. Tehu au bubuluk ae ala sanga tao soe au.

³ Hu ndia de, au haitua fes hala natataak-ka ia, “Au ta bisa mai fa, nanahu au bei tao bela-ba'u matua. Neukose bela-ba'uk ndia ta la'ok fa, Metema au la'o ela bela-ba'uk ndia, fo au ne'i atongo o emi soona, neukose bela-ba'uk ndia ta la'ok fa.”

⁴ Nalosa ala haitua fe au susula nalook la'i haa, isin-na sama, ma au fe nataak boeo sama.

⁵ Neu kala'i lima-na boema, Sanbalat ana nadedenun esa mai, de ana fe susula nakadidita tak esa,

⁶ isin-na nae leo ia: “Gesyem nae hala-hala anin manai leoina titia-tataik ia tete'ek-ka, de lafa'da lae Tolanook-ka ma basa hataholi Yahudi-la tutu'u eno makahatuk, hu ndia de Tolanook-ka tao nahii kota papala nanadaman-na. Boeo nafa'da nae, Tolanook-ka sanga so'u aon da'di mane Yehuda,

⁷ ma matu'du basa nabi de'ubee soaneu ala ndo ei Tolanook-ka nai Yerusalem. Tao leo bee-o, neukose hala anin sila-la losa manek-ka. Hu ndia de mai leona fo takokolaok dede'ak ndia.”

⁸ Tehu au haitua natataak-ka nde ia nae, “Basa hata fo Tolanook-ka nafa'dan ndia, pepekok basa sila-la, ma Tolanook-ka kokola koao-ndaeaon mesan ndia.”

⁹ Ala so'ba lakabibiik ami, fo ela ami hahae bela-ba'uk ndia. Boema au hule-haladoi ae, “Ou Manetualain, matetea-mahehele au!”

¹⁰ Bei nai lelek ndia boe, au u leo Delaya anan Semaya fo Mehetabeel upun-na uman u, nanahu ala ta hapu loak mai leo au mai fa. Nafa'da au nae, “Mai fo dua teu ke'ke nai Manetualain Uman. Ata nggoetisa basa lelesun-nala, nana hapu hataholi nau taolisa o. Fafa'kama le'odaek ia, neukose ala taolisa o.”

¹¹ Tehu au ataa ae, “Au ia, ta hataholi fo ana nau nalai fa. Au hataholi biasa, de au ta bole masok leo Manetualain Uman dale u fa, te neukose mate au. Ta, au ta nau fa!”

¹² Au tai dodoo basa dede'ak ndia boema, au ame'da ae Semaya lelekon ndia, ta neme Manetualain mai fa, te neme Tobia ma Sanbalat mai. Ala solo Semaya fo nanduku-nalosak dede'a nafa'da elak ndia neu au.

¹³ Sila dale tutu'un-na nde, fo ela au bii, fo au tunga sila hahapun-na fo daenga au tao sala-singok. No enok ndia, ala hapu loak tao langgenggeo au na'deng-nga, fo hataholi-la kokolak au.

¹⁴ Au hule-haladoi ae, “Ou Manetualain, mafandendelek hata fo Tobia ma Sanbalat taon ndia. Hukus leona! Leondiak boe, nabi inak fo mana'de Noaja ma nabi-nabi fe'ek fo ala nau lakabibiik au-a.”

Tao basa papala nanadamak-ka

¹⁵ Papala nanadamak ndia tao matalololen-na, na'a faik limahulu dua, de basan neu hataholi Yahudi-la bula Elul-la, fain duahulu lima.

¹⁶ Lelek ami musu-musum manai leoina titia-tataik sila-la lamanene dede'ak ndia boema, ala bii mopo na'den-nala, nana basa hataholi-la bubuluk lae bela-ba'uk ndia nanataok nenik Manetualain tutulu-fafalin.

¹⁷ Ndia te mauli-malanga Yahudi-la boeo, bei la fe susulak lo Tobia.

¹⁸ Hataholi Yahudi ba'uk-ka tao tiak lo Tobia, nanahu Sekhanya, fo Arah anan-na manafeun ndia. Bai te Yohanan, fo Tobia anan-na sao Berekhya anan Mesulam anafe'on-na.

¹⁹ Leomae Tobia sulak susulak nakandondohenin fe au, soaneu nakabibiik au, tehu basa mauli-malanga Yahudi sila-la, nai au matang soona, ala seseik basa Tobia malolen lala'en-na. Fe'ek neme ndia mai, leu lafa'dan basa hata fo au kokolak-kana.