NEHEMIA 5 - Susula Malalaok Hehelu Palak Ma Hehelu Beuk

Nehemia tulu-fali hataholi nuu-taa hata-tak-ka

¹ Basa faik de'ubee boema, hataholi makadotok nau touk do inak boe, ala mulai haladoi la'eneu hataholi fo sila leoina esa.

² Nggelok lafa'da lae, “Au anang makadotok. Ami paluu gandum fo ami maso'da.”

³ Hapu nggelok lafa'da lae, “No nakasetik, au nga'de heni au tinang-nga, osi angol-la, ma ami umam-ma soaneu asa gandum, fo ela boso mate ami no la'as-sa.”

⁴ Ma hapu nggelok seluk bai soona lafa'da lae, “Ami tona doik soaneu bae bea fo manek-ka naketun soaneu ami tinam-ma, ma ami osi angol-la.

⁵ Ade ami ta hataholi Yahudi fa do? Ade ami anam-mala ta sama no hataholi Yahudi fe'ek-kala anan-nala fa do? Leomae leondiak boe, no nakasetik ami po'ilotak ami anam-mala da'di ata. Nakalenak ami mase'o heni ami anafe'oanam-mala fo da'di ata. Ami ta mala so'on, nanahu ami ngga'de heni ami tinam-ma, ma ami osi angol-la so.”

⁶ Au amanene sila haladoin ndia boema, au amanasa anseli,

⁷ de au ho'i nakeketuk soaneu tao hata esa. Boema au fe lasi nggolok-kala ma laun-na mauli-malangan-nala. Au afa'da ae, “Emi tuni-ndeni seluk emi tolanoom-mala!” Basa boema, au tao nakabua matua soaneu kokolak dede'ak ndia,

⁸ de au afa'da ae, “No ita be'i-balakain lala'en-na, ita soi-tefa ita tolanoon hataholi Yahudi-la, fo no nakasetik lase'o heni so'dan-nala neu leoina nusa fe'ek-kala. Tehu besak ia, emi ia makaseti seluk-kasa fo lase'o so'dan-nala neu emi, te se'kona emi boeo hataholi Yahudi boe!” Basa mauli-malangan sila-la, ta hapu lataa dede'ak de'ek esa boen.

⁹ Boema au afa'da seluk-kasa ae, “Emi tatao-nono'im ndia, ta malole fa! Emi muse maso'da no mame'da bibii-namata'uk neu Manetualain. No enok ndia, ita musun fo lamatua tak sila, emi ta fes loak soaneu lakamumulu-lakamamaek ita fa.

¹⁰ Au boe, au tolanoong-ngala ma au tia-laing-ngala, tona fe laun-na doik ma gandum so. Neukose ami ta moke falik-kasa fa.

¹¹ Ela leo been-na, emi boeo tao mamopo heni laun-na huta-bu'un-nala neu emi ndia, nau nalupa tali-doik do gandum, nau angol do mina setun boe. No lai-laik, fe falik sila tinan, osi angol, mina setun ma uman-nala.”

¹² Boema basa mauli-malangan sila-la lataa lae, “Neukose ami tunga nanoli-nafa'dak ndia. Neukose ami fe falik la'iesak-kasa, ma ami ta makasetis fo ala bae hata esa boen.” Boema au aloo basa imam-mala, ma au adenu mauli-malangan naka'sa soo-supa nai imam-imam sila matan, lae hata fo sila kokolak-kana ndia, tete'ek-ka neukose ala tao latetun.

¹³ Basa boema, au se'i-a kalikee manai au tala'dang-nga, boema au ngganggafun ma au afa'da ae, “Ela leo been-na Manetualain ngganggafu leoiak soaneu hataholi see fo ana ta nau tao natetu hala hehelun-na fa. Neukose hataholi ndia da'di maleu-malaak, neukose Manetualain ho'i-na uman-na ma hata-heton-nala!” Basa hataholi manai nakabuak ndia dalek-ka, lataa lae, “Amin!” boema ala koa-kio Manetualain. Boema basa mauli-malangan sila-la, tao latetu sila hala hehelun-na.

Nehemia dale malole

¹⁴ Au da'di gobelnol Yehuda, teuk sanahulu dua dalen so, fo nde mulai neme Manek Artahsasta paleta neme teuk ka duahulun-na losa teuk ka teluhulu duan-na. Nai lelek ndia, au ma au tolanoong-ngala ta la'iesa fo au ho'i au ngga'di gobelnol-la fa

¹⁵ Gobelnol makahuluk-kala, ala da'di lelepa mabela soaneu laun-na, nana lakaseti laun-na fo faik esa soona, esan-na fe doi fulak haahulu soaneu sila nana'a-nininun ma angol. Nakalenak hataholi mana'a ngga'din-nala boeo tuni-ndeni laun-na. Tehu au ta nau tao leondiak fa, nanahu au bii-amata'u neu Manetualain.

¹⁶ Au pake la'iesak au be'i-balakaing soaneu afofo'a papala nanadamak-ka, ma au ta hapu dae bibianak faa boen da'di neu sese'bak, leomae basa hataholi manafali au-a, ala tao belak tunga au nai uma ndia tataon-na.

¹⁷ Au biasa fe hataholi Yahudi natun esa limahulu ma basa sila lasi nggolon-nala la'a nai au umang, beita leke fui-fui maneme leoina manai ami nusa titia-tataim-mala mai fa.

¹⁸ Tunga faik, au pake au doing-nga fo au asa sapi esa, bi'ilopo maao nee ma manu makadotok. Bai te, faik sanahulu soona, au popo-tama seluk angol fo au sadiak-ka. Leomae leondiak boe, au ta nau oke au ngga'di gobelnol-la fa, nanahu au bubuluk ae laun-na lelepa mabela na dai so.

¹⁹ Au dokodoe ou Manetualain, mafandele hata fo au tao basan soaneu leoina ia, ma ba'e-pala au leona.