NEHEMIA 4 - Susula Malalaok Hehelu Palak Ma Hehelu Beuk

Nehemia ho'i nakeketuk soaneu hataholi Yahudi-la musun-nala

¹ Lelek Sanbalat namanene lae ami fo hataholi Yahudi-la tao mahii kota papala nanadaman-na boema, namanasa nanseli ma ana mulai hakinonoli ami.

² Ana kokolak nai tia-lain-nala ma solda'du Samaria-la matan nae, “Hataholi Yahudi manafuu-mopok, ma ala ta bisa tao hata esa boen ndia, ala tao bek ndia. Ade ala sanga lafofo'a falik kota ia do? Sila laedaenga tataos ndia bisa basan nai faik esa dalen-na, ka'da nenik tunu-hotu tutunu-hohotuk do? Ade ha'i na'a naputu kadafu madodouk sila-la, sila bisa taos da'di papala nanadamak-ka batun-nala do?”

³ Boema Tobia fo napadeik nai boboan-na, boeo nafa'da nae, “Mitak lafofo'a-la papala nanadamak-ka dei! Busa fui-a boeo, bisa tao natu'un!”

⁴ Boema au hule-haladoi leon ae, “Ou Manetualain, mamanene lakamumulu-lakamamaek ami tao leo beek! Fes lu'a-lepa-la nakamumulu-nakamamaek ndia. Nemen-na fo nakodaa-la lamanako-la basa hata-heton-nala lala'en-na, ma ala foo lenis da'dileo hataholi nanafook leo nusa dea leu.

⁵ Boso fe do'o do ampon neu tatao-nono'i mangalaun-nala, ma boso mafandeleheni sala-singon-nala, nana lakamumulu-lakamamaek basa ami, fo besak ia ami mafofo'a O umam-ma ia.”

⁶ Tehu ami tao matalolole makandoo papala nanadamak ndia, de basa boema ta doo anak boen te, papala nanadamak-ka sa'e losa tala'da so, nana laun-na tao-no'i no manggatek nanseli.

⁷ Lelek Sanbalat, Tobia ma hataholi maleme Amon ma Asdod mai, boema hataholi Arab-pala lamanene lae Yerusalem papala nanadaman fo nanatao nahiik ndia, boetai la'ok nakandoo ma lamanene lae ala mulai dama ketu papala nanadamak-ka bolon-nala, boema lamanasa lanseli.

⁸ Lalahalak sanga leu sapu-la Yerusalem fo ala tao tasibu.

⁹ Hu ndia de ami hule-haladoi neu ami Manetualaim-ma, ma lele'do-le'odaen ami manea kota ndia.

¹⁰ Tehu hataholi Yehuda-la mulai lakamee nakamee haladoik-ka nde ia: “Basa ita be'i-balakain soaneu so'u basa ia-la, tehu kadafuk bei makadotok ladodou. Fafa'kama ita ta tabe'i tao ue-le'dis leo iak soaneu tafofo'a kota ia papala nanadaman-na fa.”

¹¹ Tehu ami musum-ma ana tutu'u nai dalen dale soaneu sapun-na ami no kaiboik, fo taonisa ami, nalosa ami ue-le'dim nate'e.

¹² Tehu hataholi Yahudi manaleo deka loos-sala, ala mai do'e-do'e leo ami mai, fo lafa'da musu-a dale tutu'un ndia.

¹³ Hu ndia de, au baba'e fe laun-na tafaina, tee, ma kokouk boema au pe'das tunga esa-esak teidale bobongin neu papala nanadamak-ka dea, nai mamanak fo beita nanatao nahiik kala fa.

¹⁴ Lelek au ita ae laun-na bii lamata'u boema au afa'da laun-nala, basa lasi nggolo kala boema basa mauli-malangan-nala ae, “Boso bii mamata'u neu musu a! Mafandele neu Manetualain fo mabe'i-balakai matuaina, fo matati soaneu tolano mala, ana mala, saoinam-mala ma uma loo mala!”

¹⁵ Ami musu mala lamanene lae ami bubuluk basa sila dale tutu'u na so. Boema ala bubuluk lae Manetualain tao nalutu sila dale tutu'un ndia. Basa boema ami basa-basam-mala fali meu tao mahii papala nanadamak ndia.

¹⁶ Tehu mulai faik ndia boema, au hataholi manatao bela-ba'ung-ngala ka'da seli tao bela-ba'uk, tehu seli soona lanea lo ba'du musun-nala ma ala ho'u tee, babaa fanak ma kokouk. Basa mauli-malanga laun-nala tia-to'ba lahele laun

¹⁷ fo manatao mahii papala nanadamak ka ndia. Basa manalu'a uma ai batu nala, ala tao tataos ndia lenik liman seli, te liman seli ala ho'u tee-tafa.

¹⁸ Tuka batu la puelau no tafainan-nai tala'da nala. Manapuu pupuuk ta'du-tana musu a nahele nai au boboang-nga.

¹⁹ Boema au afa'da laun-nala, basa lasi-lasi kala ma basa mauli-malangan-nala ae, “Ue le'dis ia namaloa losa nai dook-ka so, de nalosa ita tapasasala su'di papala nanadamak ia nanalu na de ita esa dook-ka no esa.

²⁰ Da'di metema emi mamanene pupuu ka lii na soona, lai-lai makabubua okofefeo ma ami mai ia. Neukose ita Aman Manetualain natee-natati nggati ita.”

²¹ Leondiak ami tao ue le'dis mulai neme dulufula losa tita nduu kala lai lalai. Lau nala seli tao matalolole papala nanadamak ka, te seli soona lanea no ala ho'u tee nai liman-nala.

²² Nai faik fo tao bela-ba'uk ndia dalek, au adenu basa manaho'u bela ba'uk loo hataholi manatulu-falis ala, leu sungu nai Yerusalem. No enok ndia, ami hapu manea kotan-nai fai le'odae na, ma ami mafofo'a papala nanadamak ka nai fai lele'don-na.

²³ Au, au nono ngala, au anan-nadedenu ngala ma au manamanea ngala pake bua-lo'a ue-le'dis tataas esa nau lele'dok do le'odaek boe. Ami maheheleaom makandondoo henin no tee tafa nai ami lima ma.