NEHEMIA 11 - Susula Malalaok Hehelu Palak Ma Hehelu Beuk

Laun Yerusalem

¹ Basa mauli-malangan manaleo lahele lai Yerusalem, ma laun-na tu'ubatu soaneu uma loo sanahulu, soaneu ala hele teidale-bobongik esa neme teidale-bobongik sanahulu mai, fo muse leo nai kota malalao-malalafuk Yerusalem. Bee ta nanahelek fa soona, ana bole leo nai kota fe'ek-kala.

² Nai hataholi sila dalek, hapu nggelok no dale hihii-nanau mesan-nala, lahiik leo lahele nai Yerusalem, de laun-na koa-kio hataholi sila.

³ Nai kota fe'ek-kala, laun Israel-la, basa imam-mala, hataholi Lewi-la, basa manatao Manetualain Uman-na, ma Salomo malalau-maoonon tititi-nonosin-nala, ala leo lai sila dae pusakan-na ma sila kota mesan-nala.

^4-6 Hataholi de'ube leme leo Yehuda ma leo Benyamin-na mai, ala leo lai Yerusalem. Hataholi sila na'den-nala nde ia: Leo Yehuda: Ataya fo Uzia anan-na ma Zakharia upun-na. Sila bei-ba'i kain de'ubee nde ia: Amarya, Sefaca ma Mahalaleel, Peres, Yehuda. Dede'un-nala hataholi natun haa neehulu falu, ao kahelek mesa-mesan. Maaseya fo Barukh anan-na ma Kolhoze upun-na. Sila bei-ba'i kain de'ubee nde ia: Hazaya, Adaya, Yoyarib, Zakharia, Syela, Yehuda.

^7-8 Leo Benyamin: Salu fo Mesulam anan-na ma Yoed upun-na. Sila bei-ba'i kain de'ubee nde ia: Pedaya, Kolaya, Maaseya, Itiel ma Yesaya. Gabai ma Salai. Sila bei tolanoo ka'a-fa'di manadekak no Salu. Basa-basas hataholi natun sio duahulu falu fo mauli-malangan nde,

⁹ Yoel fo Zikhri anan-na ma lima boa konan-na nde, Yehuda fo Hasenua anan-na.

^10-11 Basa imam-mala: Yedaya fo Yoyarib ma Yakhin anan-na. Seraya fo Hilkia anan-na ma Mesulam upun-na. Sila bei-ba'i kain de'ubee nde ia: Zadok, Merayot, Ahitub fo ana Imam Matuaina.

¹² Basa-basas lala'en-na, hapu imam natun falu duahulu dua, lalalau-laoono nai Manetualain Uman. Adaya fo Yeroham anan-na ma Pelalya upun-na. Sila bei-ba'i kain de'ubee nde ia: Amzi, Zakharia, Pasyhur ma Malkia.

¹³ Malanga uma loo manai leo-ingu ndia dalek, dede'un-na hataholi natun dua haahulu dua. Amasai fo Asareel anan-na ma Ahzai upun-na. Bei-ba'i kain-nala nde ia: Mesilemot ma Imer.

¹⁴ Hapu malanga musu palani ta'ti batu natun esa duahulu falu, ao kahelek mesan-mesan nai leo-ingu ia dalek Sila mauli-malangan-na nde Zabdiel, fo Gedolim anan-na.

^15-18 Hataholi Lewi-la: Semaya fo Hasub anan-na ma Azrikam upun-na. Bei-ba'i kain-nala nde: Hasabya ma Buni. Sabetai ma Yozabad nde been-na hataholi Lewi nananita-nalelak, lanea hataholi manatao Manetualain Uman manai deak-ka. Matanya fo Mikha anan-na ma Zabdi upun-na, neme Asaf tititi-nonosin mai. Ndia nauli-nalanga basa manamakameek-kala soaneu hule-haladoi makasi. Bakbukya fo Matanya lima boa konan-na. Abda fo Samua anan-na ma Galal upun-na, neme Yedutun tititi-nonosin mai. Basa-basas dede'un-na, hataholi natun dua faluhulu haa.

¹⁹ Basa manamanea lelesuina-la: Akub, Talmon ma sila nonoon-nala. Basa-basas dede'un-na, hataholi natun esa hituhulu dua.

²⁰ Laun Israel-la, basa imam-mala, ma hataholi Lewi-la seli, ala leo lai sila daen-na nai kota-kota manai Yehuda.

²¹ Basa manatao Manetualain Uman-na, ala leo nai kota esa nai Yerusalem nanalan-na na'de Ofel. Ziha ma Gispa lauli-lalangas nai bela-ba'un-nala dalek.

²² Manamanea hataholi Lewi fo manaleo lai Yerusalem-ma nde, Uzi fo Bani anan-na ma Hasabya upun-na. Bei-ba'i kain-nala nde: Matanya ma Mikha. Ana masok leo-ingu Asaf, fo bela-ba'un nde ana ito-ato sasanu nai lelek ala tao mamasok nai Manetualain Uman.

²³ Leo-ingu fo fain-na losa soaneu tunga faik ana ito-ato sasanu manai Manetualain Uman-na nananaketuk tunga manek-ka nakaneneten-na.

²⁴ Petahya fo Mesezabeel neme leo-ingu Zera ma leo Yehuda anan-na, ana da'di leoina Israel manai uma manek Persia, lima boa konan-na.

Laun kota fe'ek-kala

^25-30 Laun-na ba'uk-ka leo nai kota-kota manadekak no sila tina-osin-nala. Hataholi de'ubee leme leo Yehuda mai, ala leo nai Bersyeba no Bafak Hinom-ma tala'da, fo Bersyeba nai boboan kona, ma Bafak Hinom-ma nai boboan kii. Ala leo nai kota-kota ma nggolo-nggolok manai boboa-kaisun-nala nde ia: Kiryat-Arba, Dibon, Yekabzeel Yesua, Molada, Bet-Pelet, Hazar-Sual, Bersyeba, Ziklag, Mekhona, En-Rimon, Zora, Yarmut, Zanoah, Adulam, Azeka, Lakhis.

³¹ Hataholi de'ubee leme leo Benyamin-na mai, ala leo nai Geba, Mikhmas, Ai, Betel ma nggolo-nggolok manadekak-kala, fo nde:

³² nai Anatot, Nob, Ananya,

³³ Hazor, Rama, Gitaim,

³⁴ Hadid, Zeboim, Nebalat,

³⁵ Lot, Ono ma nai Bafak Tukang-tukang.

³⁶ Hataholi Lewi bubuak de'ubee, makahulun-na ala leo leme nusa Yehuda, ladenus fo ala leo loo hataholi Benyamin-nala.