NEHEMIA 10 - Susula Malalaok Hehelu Palak Ma Hehelu Beuk

¹ Hataholi manalima lee makasososak-ka nde Gobelnol Nehemia fo Hakhalya anan-na. Basa boema, Zedekia tunga. Basa ndia boema, hataholi-la nde ia boeo ala lima lee fo nde:

^2-8 Basa imam-mala Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Danial, Gineton, Barukh, Mesulam, Abia, Miyamin, Maazya, Bilgai ma Semaya.

^9-13 Hataholi Lewi-la Yesua fo Azanya anan-na, Binui fo leo-ingu Henadad-ta tititi-nonosin, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani ma Beninu.

^14-27 Basa mauli-malanga leoina Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim ma Baana.

Susula Hehelu-balataak

²⁸ Ami, laun Israel, basa imam fo hataholi Lewi-la, basa manamanea Manetualain Uman-na lelesuinan-na, basa manamakaminak sasanu-la ma basa manatao belak manai Manetualain Uman-na, boeo ami saoinam-mala, ma ami ana-anam fo nalelak kii-kona so, boema basa hataholi fo manatunga Manetualain hoholo-lalanen, ma ala pasi fe'e leme hataholi nusa dea fo manaleo nai ami nusam-ma.

²⁹ Ami basa-basam-mala makabubua moo basa ami mauli-malangam-mala, ma ami soo-supa soaneu maso'da tunga Manetualain hoholo-lalanen fo Ana fe basan tunga atan Musa. Sa'di leo been-na Manetualain supa-soo ami, metema ami ta tao matetu hehelu-balataak ia fa. Ami soo-supa, neukose ami tunga basa Manetualain fo ami Manetualaim-ma paletan, hoholo-lalanen ma nakaneneten lala'en-na.

³⁰ Ami soo-supa soaneu ta saoana sese'do-babalik moo leoina nusa dea fo manaleo nai ami nusam-ma.

³¹ Metema hapu leoina nusa dea fo nase'o gandum do su'di bua-lo'a beek ndia neu ami nai fai Sabat-ta, do fai malalao-malalafu fe'ek soona, neukose ami ta asa fa. Neu tunga-tunga teu ka hitun-na, neukose ami ta tao tina do neukose ami ta la'ok hutak fa.

³² Tunga teuk, neukose ami esa-esak fe lilofulak gram lima soaneu asa Manetualain Uman-na paluun-na.

³³ Neukose ami sadia makaluku-makatelek-ka paluun-na nai Manetualain Uman, fo nde: loti nana'ak, tutunu-hohotu gandum mandofai-a, bana soaneu tutunu-hohotu nanatunuk mandofai-a, tunu-hotu malalao-malalafu fe'ek, tutunu-hohotuk do'o do ampon soaneu Israel, ma basa su'di beek fo paluun soaneu Manetualain Uman-na.

³⁴ Ami, laun-na, basa imam-mala ma basa imam fo hataholi Lewi-la neukose tunga teuk ami tu'ubatu fo maketu leo-ingu beek-ka nde muse sadia ai ha'i soaneu tutunu-hohotuk fo tunu-hotu fe neu Manetualain fo ami Manetualaim-ma, tunga Hoholo-lalanek nakaneneten-na.

³⁵ Tunga teuk, neukose ami meni ami gandum-mala buna-boa makasososan-nala, ma ami ai boa latu makasososam-mala, leo Manetualain Uman neu.

³⁶ Neukose ami meni ami ana tou ulum-mala leo imam manai Manetualain Uman, fo fen leo Manetualain neu, nandaa no hoholo-lalanek nakaneneten-na. Boeo neukose ami fe ami sapi ana, bi'ilopo ana do bi'ihii ana ulum-mala neu.

³⁷ Neukose ami meni fe basa imam manai Manetualain Uman-na, gandum sopuk nanakamek neme gandum fo tunga teuk ami ketu-kolu makasososak-ka, boeo tunu-hotu fe'ek, nalupa angol, mina setun ma ai boa mata-matak lala'en-na. Ami fe ami tinam-ma buna-boan baba'ek esa neme ba'eneu sanahulu mai, neukose ami menin leo hataholi-hataholi Lewi fo manasusu tunu-hotu baba'ek esa neme ba'eneu sanahulu nai kota-kota fo hataholin-nala manatao tina osi.

³⁸ Tehu imam esa, tititi-nonosi Harun soona, muse sama-sama no hataholi Lewi sila nai lelek ala susu tunu-hotuk sila-la. Ma baba'ek esa neme ba'eneu sanahulu mai neme basa tunu-hotuk sila-la mai ndia, hataholi Lewi sila-la muse lenis leo kama pepe'da nana'ak manai Manetualain Uman-na.

³⁹ Laun Israel-la ma hataholi Lewi-la muse leni tutulu-fafalik hehelik fo nalupa gandum, angol ma mina setun leo kama pepe'da nana'ak, fo mamanak pepe'da Manetualain Uman-na bua-lo'an. Basa imam fo lakalala'ok bela-ba'uk, basa manamanea Manetualain Uman-na lelesuinan-na ma manamakameek-kala mamana leleon-na nai ndia boe. Neukose ami ta hahae mete-makanae ami Manetualain Uman-na fa.