MIKHA 5 - Susula Malalaok Hehelu Palak Ma Hehelu Beuk

Manetualain helu fe manakoasa esa neme Betlehem mai

¹ Manetualain nafa'da nae, “Hai Betlehem Efrata, o kota esa, anak nanseli nai Yehuda! Tehu neme o dalek mai, neukose Au afofo'a manakoasa esa soaneu Israel, fo momoli-dada'din neme makahulun eli mai.”

² Da'di, neukose Manetualain po'ilotak sila musun-nala koasa anan-nala, losa inak fo nananaketuk soaneu da'di manakoasa ndia inan, ana bongi-nan. Basa ndia soona, hataholi fo sila leoina esa, bei lai mamana tu'u-tapak, neukose Ana taos da'di esa loo sila leoinan-na.

³ Metema manakoasa ndia mai soona, neukose Ana koasa anan-nala nenik be'i-balakaik ma koasa neme Manetualain, fo Ndia Manetualain-na mai. Neukose anan-nala laso'da no nee-nee lino-linok, nanahu basa hataholi manai daebafak-ka lala'en-na, neukose manaku matua-mademan,

^4-5 ma neukose Ana fes mole-dame. Metema solda'du Asyur-ra sapu-la ita nusan-na, fo ala hona lakalulutuk ita kota musun-na soona, neukose ita tadenu ita mauli-malangan mabe'i-balakain-nala fo latee-lata'ti los. Ita mauli-malangan sila-la, neukose ala sengi Asyur no be'i-balakai tafa-sisilo, fo soi-tefa-na ita neme sila liman mai.

Soi-po'ik ma huhukuk

⁶ Bei ela hataholi Israel-la, neukose ala da'di dinis makasufuk neme Manetualain mai soaneu leoina makadotok, ma sama leo u'dan-na mai soaneu sesele-nganggalik nai fai sele-nggalin-na. Neukose lasalai dean-nala neu Manetualain, te ta neu hataholi daebafak fa.

⁷ Hataholi Israel fo ala bei leo lai leoina-la tala'da, neukose sama leo meoasu nai bana manai nula-la tala'da, do nai bi'ilopo bubuak manai moo mana'uk-ka. Meoasu ndia neu leo bi'ilopo bubuak ndia tala'da heon neu, fo ana heheta-aa'i ma ana sisii-lulu'i. Ta hapu manasoi-po'i fo soi-po'i bi'ilopo sila-la fa.

⁸ Neukose Israel sengi musun-nala, boema ana tao nakalulutuk la'iesak-kasa.

⁹ Manetualain nafa'da nae, “Nai lelek ndia, neukose Au tao amopo basa emi ndalam-mala, ma tao amopo-amate emi kaleta musum-mala.

¹⁰ Kota-kota makota musu manai emi nusam-ma, neukose Au tao akalulutuk-kasa, ma Au tao andefa heni basa emi kota musum-mala.

¹¹ Neukose Au tao amopo emi le'u-le'um-mala, ma Au si'u heni basa emi hataholi mananeuk hataholi-a ua-nalen.

¹² Neukose Au tao akalulutuk emi dodoki-dudulam-mala, ma emi lutu batu sosongo-tatangom-mala; neukose emi ta sene-do'ok neu buas fo emi tao aom ndia so'on.

¹³ Dewi Asyera lutu batu sosongon manai emi nusam-ma, neukose Au ta atu'un, ma emi kota-kota makota musum-mala, neukose Au tao akalulutuk-kasa

¹⁴ Nai Au nasa-melu manalua pono-ponung-nga dalek, neukose Au balas basa leoina fo ala ta tunga Au fa, tatao-nono'i mangalaun-nala.”