MAZMUR 1 - Susula Malalaok Hehelu Palak Ma Hehelu Beuk

SUSULA KA ESA MAZMUR 1–41 Ua-nale matetuk-ka

¹ Maua-manalek neu hataholi fo, ana ta tunga hataholi mangalauk-ka nanoli-nafa'dan fa, ana ta na'da hataholi masala-masingok-ka, ha'da-tataon fa, ma ana ta leo-napalasa no hataholi fo, nakamumulu-nakamamaek Manetualain fa,

² tehu ana hii ka'da tao-no'i Manetualain Paletan-na, ma ana dodoo-tatain lele'do-le'odaen.

³ Hataholi ndia, ana hapu buna-boak nai basa ue-le'din lala'en-na dalek; hataholi ndia, sama leo ai-a ana moli nai lee su'un-na, fo naboa la'e fain-na, ma doon-na, ta male nita fa.

⁴ Nasafalin-na, hataholi mangalauk-ka: sama leo ha'deuk-ka, fo anin-na fuu nenin.

⁵ Hataholi mangalauk-ka, neukose Manetualain fo ndia manakee-manafulan-na, Ana hukun, ma Ana ta'da fe'en neme anan-nala mai.

⁶ Nana Manetualain hela-nole, ma nasulu-nahapa hataholi manatungak-ka, tehu hataholi mangalauk-ka, neu leo mamate-momopok-ka neu.