HOSEA 1 - Susula Malalaok Hehelu Palak Ma Hehelu Beuk

¹ Ia nde hala heheluk, fo Manetualain fen neu Hosea, fo Beeri anan-na, nai lelek manek Uzia, Yotam, Ahas boema Hizkia, paleta beiko loo nusa Yehuda, ma Yerobeam, fo Yoas anan-na paleta nusa Israel-la.

Hosea saoinan-na ma anan-nala

² Lelek Manetualain, Ana kokolak makasososan-na no leoina Israel-la tunga au, Manetualain nafa'da nae, “Hosea, sao-ma ina manasosoa-piaok esa, fo neukose o anam-mala, ala da'di sama leo ndia boe. Au anang-ngala sama leo o saoinam ndia, nanahu ala ta lilineka neu Au fa, ma ala la'oela Au so.”

³ Boema au sao-a inak esa na'de Gomer, fo Diblaim anan-na. Lelek ana bongi ami ana makasososam-ma, ni'iana touanak esa,

⁴ Boema Manetualain, nafa'da au nae, “Foi o anam ndia na'de Yizreel, nana ta dook-ka so'on te, neukose Au huku mane Israel-la, nanahu kanisak fo ba'i kain Yehu, taon neme Yizreel-la. Neukose Au tao ate'e Yehu tititi-nonosin paletan-na.

⁵ Nai lelek ndia, neukose Au tao la'di solda'du Israel-la be'i-balakain nai Bafak Yizreel-la.”

⁶ Basa boema, au saoinang ndia, ana bongi ami ana ka dua-ma, ni'iana inaanak esa. Manetualain, nafa'da au nae, “Hosea, foi o anam ndia na'de ‘Fo Ta Nanasue-laik fa’, nanahu, neukose Au ta sue-lai leoina Israel-la so'on, ma neukose sila ta hapu do'o do ampon fa.

⁷ Tehu neukose, Au sue-lai leoina Yehuda. Au Manetualain, fo sila Manetualain-na, neukose soi-tefa alas, tehu ta nenik natee-natatik, boeo ta nenik tafaina do kokouk do manasa'e ndala-la fa.”

⁸ Lelek fina basa ami ana ka duam sila-la boema, au saoinang-nga nailu seluk, de ana bongi ana touanak esa.

⁹ Manetualain, nafa'da au nae, “Foi o anam ndia na'de, ‘Au Anang Ta Ndia fa’, nana Au anang ta hataholi Israel-la fa, ma sila Manetualain ta Au fa.”

Hataholi Israel-la ha'da-tataon neukose nanatao matalolole falik

¹⁰ Leoina Israel-la, neukose de'u solokaek manai tasi su'un-na, nalosa ta hapu leke-nala fas. Besak ia, Manetualain nafa'das nae, “Au anang ta emi fa”, tehu neukose fain-na losa soona, nafa'das nae, “Au nde Manetualain fo maso'dak, ma Au anang emi!”

¹¹ Neukose tao nakabubua falik leoina Yehuda, ma leoina Israel-la. Neukose ala so'u mauli-malangan esa, ma neukose lamade'u, ma tetu-temak seluk nai sila nusan-na. Te'e-te'e, Yizreel fain-na, neukose ana da'di fai matua!