ESTER 2 - Susula Malalaok Hehelu Palak Ma Hehelu Beuk

Ester da'di ina manek

¹ Basa faik de'ubee boema, leomae manek-ka ta namanasa so'on, tehu ana bei dudu'a-dodoo nahele Ina manek Wasti-a tatao-nono'in, ma naketu basa nakeketuk soaneun-na.

² Hu ndia de, manamanoli-mafa'da fo teik esa-dalek esa loo manek-ka, lafa'dan sila hahapun-na nae leo ia, “Malole lenak, sanga fe Ama Manek anafe'oana mata makeek.

³ Ela leo been-na, Ama Manek so'u hataholi mana'a ngga'di nai basa propensi manai nusak ia, fo ala sanga anafe'oana mata makeek-kala, fo loo basa-basas leo uma mane inak-ka, nai Susan ia. Hegai da'di manamanea nai uma manek inak-ka, de neukose ana painote lole-napun-nala.

⁴ Basa ndia soona, Ama Manek hele anafe'oanak bee kande, Ama Manek nahiik-kana, fo fen da'di ina manek nggati ina manek Wasti-a.” Boema manek-ka sipok nanoli-nafa'dak ndia, de ana tao tungan.

⁵ Nai kota Susan ndia, hapu hataholi Yahudi esa, na'de Mordekhai, fo Yair anan-na, Simei upun-na ma Kis nelun-na. Kis ndia, da'di neme leo Benyamin-na mai.

⁶ Ala foo leni Mordekhai ndek lelek Nebukadnezar, fo manek Babel-la sengi Yerusalem-ma. Loo ladook Mordekhai sama-sama no Yoyakin, mane Yehuda, ma hataholi nanafoo fe'ek makadotok leo Babel leu.

⁷ Tolanoo daen esa mata makeek, na'de Ester, ma na'de Ibrani-na, na'de Hadasa. Mate Ester ina-aman so, de Mordekhai ho'i-nan, de ana taon da'di ana palan, tehu nakaboboin sama leo ana bongin-na.

⁸ Lelek ala po'a-benga basa manek-ka paletan-na boema, laloo lakabubua anafe'oanak Sudan makadotok, de Ester nai dalek boe. Loon leo uma manek-ka neu boe, de ala fen leo Hegai, fo manamanea nai uma manek inak-ka, fo ana toafik-kasa.

⁹ Hegai nita Ester boema nasamanan ma ana hiin. No lai-laik, ana barias-sana topa ngaulusun ma ana fen nana'a-nininu hehelik. Ala lali heni Ester leo mamana neulauk manai uma manek inak-ka, de ala hele-la, anafe'oana makade'dok 7 nai uma manek-ka, fo lalalau-laoono Ester.

¹⁰ No Mordekhai nanoli-nafa'dan, de Ester ta nafa'da nae, ndia hataholi Yahudi fa.

¹¹ Tunga faik, Mordekhai la'o-la'o nai uma manek inak-ka so'dan-na, fo natane Ester so'dan-na leo beek, ma hataholi taon le'e so.

¹² Tunga nakanenetek-ka soona, ala barias inak-kala teuk esa dalen-na; bulak 6, lahutus lenik mina nanasese'do boomenik, ma bula ka 6 manamaik-ka soona, lahutus lenik mina nanasese'do kaboomenik fe'ek bai. Basa ndia soona, anafe'oanak-kala esa-esak, muse neu nataa Mane Ahasyweros-sa.

¹³ Nai lelek, anafe'oanak esa neu nataa manek-ka soona, ana bole pake su'di beek, tunga dale hihiin-na.

¹⁴ Le'odae soona, loon leo uma manek-ka neu, fo balahaa soona, loon leo uma mane fe'ek neu, fo Saasgas balias-sana. Saasgas ia, manapaleta hehelik esa, fo ana ito-ato manek-ka sao fe'en-nala. Anafe'oanak esa, ta neu nataa manek-ka so'on, ta'da fe'e metema manek-ka nahiik-kana, fo naloon nenik nafa'da na'den-na.

¹⁵ Boema Ester baba'en-na losa, fo neu nataa manek-ka. – Ester nde been-na, Abihail fo Mordekhai tolanoo daen-na, anan ndia. Mordekhai, fo nde manatao Ester da'di leo ndia ana bongin-na; Basa hataholi manamete nita Ester-ra, lasamanan beno'u. Lelek fo neu nataa manek-ka, Ester pake-nggao tunga Hegai, fo malangan nai uma manek inak-ka natutu'dun, ma nanoli-nafa'dan-na.

¹⁶ Leondiak Ahasyweros paleta nai teu ka hitun-na, nai hataholi Yahudi-la bula ka 10-na, fo nde bula Tebet-ta, loo Ester neu nataa Mane Ahasyweros-sa, nai uma manek-ka.

¹⁷ Ester nandaa no manek-ka dalen-na, ma ana tao namahoko manek-ka lena neme anafe'o ana fe'ek-kala mai. Hu ndia de, manek-ka nahiik-kana nanseli. Boema manek-ka tao bulamoli nusak-ka neu Ester langan-na, de ana taon da'di ina manek, nggati Ina manek Wasti a.

¹⁸ Basa ndia boema, manek-ka tao feta matua, fo da'di neu fe ha'da-holomata neu Ester, de ana ka'i basa hataholi mana'a ngga'di-la, boema hataholi matua-madema-la. Ana po'a-benga fai hahaek nai basa nusak-ka, ma ana baba'e bua palsen makadotok nanseli.

Mordekhai soi-tefan-na manek-ka so'dan-na

¹⁹ Ndia te, manek-ka so'u basa Mordekhai, da'di hataholi mana'a ngga'di so.

²⁰ Ester beita nafa'da nae ndia hataholi Yahudi boen, nana Mordekhai kena-ka'in. Ester tunga Mordekhai paletan-na, sama leo lelek bei anan-na, tolanoo daen ndia nakaboboi nana.

²¹ Faik esa, fo nai lelek Mordekhai bei nakalala'ok bela-ba'un nai uma manek-ka, te manek-ka malalau maoono hehelin 2, fo nde Bigtan ma Teres, lalahalak sanga taolisa mane Ahasyweros-sa, nanahu lape'da dalek loon.

²² Mordekhai bubuluk sila dale tutu'un ndia, de no lai-laik nanduku-nalosak-kana neu Ester. Ester ta nahani naladook-ka so'on, de neu tui manek-ka, hata fo Mordekhai bubuluk-kana ndia.

²³ Ala palisak matalolole dede'ak ndia, boema ala bubuluk, lae hala nafa'dak ndia tete'ek-ka. Boema ala lonalisa hataholi ka duak sila-la. Hu no manek-ka paletan-na, de manda'dik ndia, nanasulak nai nusak-ka susula tutuin dale.