SEMUEL SUSULAK-KA ESAN-NA 1 - Susula Malalaok Hehelu Palak Ma Hehelu Beuk

Elkana ma teidalen-nala lai Silo

¹ Hapu touk esa na'de Elkana, neme leo Efraim-ma mai. Ana leo nai kota Rama, nai Efraim dae letelepan-na. Elkana nde been-na, Yeroham anan, ma Elihu upun. Ana masok teidalek Tohu, fo ndanak neme leo Zuf-fa mai.

² Elkana saon dua, fo Hana ma Penina. Penina maanak, tehu Hana anan ta.

³ Tunga teun, Elkana neu leo Rama neu, fo ana sene-do'ok nai Silo, ma tunu-hotu tutunu-hohotuk fe Manetualain Fo Manakoasa. Fo manada'di Manetualain imam nai Silo-a, nde Hofni ma Pinehas, fo Eli anan-nala.

⁴ Neu faik fo metema Elkana tunu-hotu tutunu-hohotuk soona, ana fe Pinehas no basa anan-nala paa tutunu-hohotuk ndia seli.

⁵ Tehu, ana fe Hana ka'da biak esa, nana Manetualain ta fen anak fa. Leomae leondiak boe, Elkana sue-na Hana ba'un-na seli.

⁶ Penina, fo Hana palan ndia, tao nakahehe'dik Hana dalen-na, ma nakamumulu-nakamamaek-kana, nanahu Manetualain ta fen anak fa.

⁷ Dede'ak ndia ana da'di neme teuk leo teuk neu; metema leu leo Manetualain Uman leu soona, Penina tao nakahehe'dik Hana dalen-na tatasesa. Nasi'a-na Hana kii, fo ta nau na'a fa, nanahu Penina nakamumulu-nakamamaek-kana.

⁸ Boema metema Elkana, fo saotoun-na natanen nae, “Taole'e de, o kii Hana? Tao le'e de, o ta nau mu'a fa, ma ka'da o dalem-ma he'dis nakandoo? Ade au beling-nga ta ba'un-na seli ba'eneu o, neme anatouk sanahulu mai fa do?”

Hana ma Eli

^9-10 Nai faik esa, fo la'a basa nai Manetualain Uman-na nai Silo boema, Hana fo'a neme mei nana'ak-ka mai. Hatematak ndia, Imam Eli boeo, nai Manetualain Uman, bei nangatuuk nai kandelan lain, deka no lelesu-a. Hana hule-haladoi neu Manetualain no dale he'dik nanseli, ma ana kii ke'du-ke'du.

¹¹ Basa boema, Hana kokolak dede'a hehelu-balataak-ka nae, “Manetualain Fo Manakoasa, taoafik neu O atam ia! Mete-makanae atam-ma doi-doson. Mafandendelek atam-ma, fo boso mafandele henin! Metema O fe atam-ma anatouk esa soona, atam-ma naheluk, neukose atam-ma fen leo O neu, fo O soan losa ana mate. Boeo atam-ma naheluk, nae neukose ta nggute langadoo-na fa.”

¹² Hana hule-haladoi doon-na seli, de Eli taoafik neu inak ndia bafan-na.

¹³ Hana hule-haladoi nai dalen dale, de ka'da difadoon koti-koti, tehu ta popo-tamanene halan-na fa. Hu ndia de, Eli naedaenga ana mafuk.

¹⁴ Boema Eli nafa'dan nae, “Masa bole o mafuk nai ia! Boso boe minu angol bai!”

¹⁵ Tehu Hana nataa nae, “Au ta mafuk fa Ama, tete'ek-ka, au ta inu angol fa! Ketu au namahehenang-nga, de au hule-haladoi fo au tui au doi-dosong lala'en-na neu Manetualain.

¹⁶ Boso mafa'da mae, au ia, inak ta malole fa. Au hule-haladoi leoiak, nanahu au daleng-nga he'dis nanseli.”

¹⁷ Boema Eli nae, “Metema leondiak soona, fali mu'um ma no so'da-molek. Sa'di leo been-na, Israel Manetualain-na, sipok o nonokem-ma.”

¹⁸ Hana nataa nae, “Sa'di leo been-na, au hapu Ama dale susue-lalain.” Basa boema, neu na'a-ninu; ma dalen-na ta he'dis so'on.

Bongi-la Samuel boema ala fen neu Manetualain

¹⁹ Balahaa boema, Elkana no uma isin-nala fo'a fafaik, de ala makaluku-makatele basa neu Manetualain boema, ala fali leo Rama leu. Boema Elkana sungu no saoinan Hana ndia, de Manetualain sipok Hana huhule-haladoin.

²⁰ Inak ndia nailu, de ana bongi anatouk esa. Ana foin na'de Semuel, nana nafa'da nae, “Au oken neme Manetualain mai so.”

²¹ Fain-na losa, Elkana no uma isin-na leu seluk leo Silo leu, fo tunu-hotu fe Manetualain tutunu-hohotu teuk-ka. Fe'ek neme ndia mai, Elkana naheluk basa, soaneu tunu-hotu tutunu-hohotu hehelik.

²² Tehu oek ia, Hana ta tunga fa. Nafa'da saotoun-na nae, “Mahani fo fina heni Semuel soona, neukose au on leo Manetualain Uman neu, ma nai fai maso'dan-na dalek, neukose ana leo nai naa.”

²³ Elkana nataa nae, “Hei, tao hata fo o meten malole; mahele meme uma losa fain-na losa, o fina heni ita anan-na. Ma sa'di leo been-na, Manetualain taon-na o hehelu-balataam da'di nananitak.” Da'di Hana nahele neme uma, losa fina heni anan-na.

²⁴ Fina heni Semuel boema, inan non leo Manetualain Uman neu, nai Silo. Nai lelek ndia, bei anak-ka nanseli. Hana boeo neni sapi mane fa'di teluk esa, gandum kilo sanahulu, ma alukosu bana louk esa, henuk no angol.

²⁵ Ta'ti sapi ndia boema, loo Semuel leo Eli neu.

²⁶ Hana nafa'da Eli nae, “Ampon Ama. Ama bei mafandendelek au do ta? Au ia, inak fo Ama nita hain napadeik neme ia, fo hule-haladoi neu Manetualain.

²⁷ Ni'iana ia nde, au oken neme Manetualain mai. Ana sipok au huhule-haladoing,

²⁸ ma hu ndia de, au fe ni'iana ia, fo ana da'di Manetualain nuun losa maten.” Basa ndia boema, ala lakaluku-lakatele neu Manetualain.