Lɔ́ma 1 - Hɛtɔnyɛ́ Hiɔ́sɔ

Mohóloniə

¹ Ɔwámɛ á Báwolo, mɔnyɛna wa Yə́susu Kilísitusu á muɔŋgəlimə ɔwá Huɛlɛ́ a ná tɛ́fá ɔkɛaka ɔwá mɛ yayɛ́á Imbə́nú Yɛɛsɛ nɔŋɔ́náka.

² Yɛ́táyɛ́ Imbə́nú Yɛɛsɛ, ɔ́ ɔyɛ́á Huɛlɛ́ a ná bílíhə́níə́ ɔ tɔ́mbákɛna na báyɛ́á bɔhɛ́nátɔtányɛ́ ɔ Mətilə Manaŋanaŋa.

³ Yɛ́táyɛ́ Imbə́nú yɛ́ ndɔ hɛ́na ɛlɔ́áyɛ́ wayɛ́á Mɔná, ɛ́sɛ́á mɔsá, a ka báá wa ɛndɛkɛ Ndə́witi;

⁴ ɔ tɔ́mbákɛna na Umbúínyi Mɔnaŋanaŋa, Huɛlɛ́ a ka wɛɛ́ya huŋúə́síə́ ɔ ətíə́ yɛ bəwə́nú, a ná wɛɛ́ya tínímíə́ ɛ́sɛ́á wayɛ́á Mɔná, a ná wɛɛ́ya úndúsíə́ na injiŋə yikimə, ɔwayɛ́ á Yə́susu Kilísitusu ɔ yəsúə́ Isə́lúkú.

⁵ Huɛlɛ́ a ka mɛaŋɔ́á nyɔnɔ índiə ɔkɛaka ɔwá mɛ híáná muɔŋgəlimə ɔ tɔ́mbákɛna na wɛɛ́ya, bɛndɔ bá mɔnɔŋɔ məkimə bá níə́búə́ nɛkɔmba tálɛ́ná ɔ ɔwayɛ́, bá wɛɛ́ya ɔ́kɔ́kɛ́nɛ́na, nɔ́yɛ́, ɛlɔ́áyɛ́ tuúmə tɔ́ nɛ́áyɛ́á niínyə.

⁶ Uwənú á bɛndɔ ɔbá Huɛlɛ́ a ná ɛ́lɛ́ákɛ́na ɔkɛaka ɔwá nɔ bámɛ́nɛ́ná bá Kilísitusu, nɔ ənú báka tɔ́na ɔ uwəbú ətíə́.

⁷ Mɛ ndɔ tilinə ɔ uwənú ɔbá nɔ lɛ́á ɔ bətínə́ yɛ Lɔ́ma, bənú bəkimə ɔbá Huɛlɛ́ a ndɔ hikiə, ɔbá a ná ɛ́lɛ́ákɛ́na ɔkɛaka ɔwá nɔ niŋə́kə́ ɛlɔ́áyɛ́ ayɛ́. Huɛlɛ́ ɔ yəsúə́ Isə́ na yəsúə́ Isə́lúkú á Yə́susu Kilísitusu bá bənú mɔlɛ́má muɛsɛ ínə́níə́, bá bənú bumbə́nú índíə́ tɔ́na.

Báwolo a lɛa na ilókí ɔ bəlumininə bá Lóma usinə

⁸ Wúbúsíə́, mɛ ndɔ yəsúə́ Huɛlɛ́ mohóloniə híə́niniə ɛlɔ́áyɛ́ bənú bəkimə ɔ tɔ́mbákɛna na Yə́susu Kilísitusu bɔkɔasɛ́á, ɔ bɛbɔ́ka ɔbánɔ́ bɛ́ misí mikimə, bɛndɔ bá ndɔ ɔ́kɔ ɔwá, nɔ ka níə́núə́ nɛkɔmba tálɛ́na á Kilísitusu.

⁹ Á Huɛlɛ́ bíbúə́ a ndɔ manya ɔwá, yatɛ́ ɔyɛ́á mɛ ndɔ laa yɛ́ lɛa taká, ɔwayɛ́ ɔwá mɛ ndɔ nyɛna na mɔlɛ́má mukimə, ikúílí tɛ́á ɔyɛ́á mɛ ndɔ Imbə́nú Yɛɛsɛ nɔŋɔna ɛlɔ́áyɛ́ wayɛ́á Mɔná. A ndɔ manya ɔwá mɛ ndɔ bənú bɛ́kɔ́lɔmɔna bikúílí bikimə.

¹⁰ Mɛ ndɔ Huɛlɛ́ bɛ́kálɛ́na bikúílí bikimə ɔwá, ábá a ndɔ hikiə, a mɛaŋɔ́á ɛnɔ́mɛ kunínə ɔkɛaka ɔwá mɛ ndá bənú síə́línə.

¹¹ Mɛ ndɔ nɔ́yɛ́ bɛ́kálɛ́na bɔkɔasɛ́á, mɛ lɛa na ilókí ɔ uwənú usinə ɔkɛaka ɔwá, Umbúínyi Mɔnaŋanaŋa wɔ́ bənú niəbə húlə́nínə mbá yə́núə́ ilumininə yɛ́ báá ɔ́nɛ́nátɔ.

¹² Mɛ ndɔ siə ɔlaa ɔwá, ɛnáká mɛ ndáfámá ɔ uwənú busíə́, bəsú bəkimə, tɔ́ makɛ́nda índíə́kínə́nə́ bəsú na bəsú ɔ tɔ́mbákɛna yə́súə́ ilumininə.

¹³ Á bənísə́, nɔ́ manyá ɔwá, bikúílí biəŋí, mɛ ka siəkə ɔ uwənú ɔ ndəsiəlínə, mba, hɛkɔma hɛ́ ka mɛaŋɔ́á fámɛ́na ɔ ndafámáká isíŋáka. Mɛ ka nɔ́yɛ́ siəkə ɔkɛaka ɔwá, mɛ buolí nyɔ́ɔ́kɔ ɔ uwənú ətíə́ ɔbɔ́á tɔtámátámá tɔ́ ŋɔ siəkinənə ɛ́sɛ́á mɛ ná kɛ́áká ɔ bɛndɔ bá mɔnɔŋɔ mənə́mənə́.

¹⁴ Huɛlɛ́ a ka mɛaŋɔ́á bɔsɔ́ma índiə ɔkɛaka ɔwá, mɛ Imbə́nú Yɛɛsɛ nɔŋɔ́nákɛ́ná ɔ bəkimə; ɔ bɛndɔ ɔbá bá ná ɔ́kɔ́náka ata ɔbá bá sa ɔ́kɔ́na, ɔ bəmənyí mbá ata ɔ bɛálála.

¹⁵ Ɔ́ ɛlɔ́áyɛ́ nɔ́yɛ́, yámɛ́á ilókí yɛ́ lɛ́á ɔwá, uwənú ɔbá nɔ lɛ́á ɔ Lɔ́ma, mɛ ndá bənú Imbə́nú Yɛɛsɛ nɔŋɔ́nákɛ́na.

Injiŋə yɛ Imbə́nú Yɛɛsɛ

¹⁶ Mɛ ndɔ Imbə́nú Yɛɛsɛ nɔŋɔna ɛŋaná ɛsɛ́má. Yɛ́ lɛa na injiŋə ɔyɛ́á Huɛlɛ́ a ndɔ bɛ́kɛna ɔkɛaka ɔwá, a bááyɛ́ núə́kə́níə́ ɔbá bá ndɔ níə́búə́ nɛkɔmba tálɛ́na á Yə́susu Kilísitusu, wúbúsíə́, á bááyɛ́ núə́kə́níə́ ɔbá bá lɛ́á Bɛyútɛnɛ, əlimə yɛ nɔ́yɛ́, bááyɛ́ ɔbá bá lɛ bá Bɛyútɛnɛ.

¹⁷ Ɔ taká, náana á Imbə́nú Yɛɛsɛ yɛ́ ndɔ ínə́niə: Huɛlɛ́ a ndɔ mɔndɔ ɛ́lɛnɛna wataká ikúílí wɔ́ɔwɔ a ndɔ nɛ́áyɛ́á nɛkɔmba tálɛ́na á Yə́susu Kilísitusu ɔkafámáká ɔ nisúki. Ɛ́ɛ! Bá ndɔ fana ɔ Mətilə Manaŋanaŋa bá sɛ́á: «Wɛ́ɛ́yɛ́ ɔwá a ná nɛ́áyɛ́á nɛkɔmba tálɛ́ná á Huɛlɛ́, Huɛlɛ́ a ndɔ wɛɛ́ya ɛ́lɛnɛna wataká, nɔ́yɛ́ tɔ́na, a ŋɔ buɔmɔ́ kusənə.»

Mɔsá mukimə a ka kɔa ɔ bɔbɛ́á

¹⁸ Huɛlɛ́ ɔwá a lɛ́á ɔ nɔɔ́mɛná, a ndɔ híə́yíə́ hilóbi fə́mə́ləniə ɔwɔŋgɔkɔnɔ na bɛndɔ ɔbá bá lɛ ndɔ wɛɛ́ya bə́tiə, na yatɛ́ yɛbɛ́á yikimə ɔyɛ́á bɛndɔ bá ndɔ kɛa. Bááyɛ́ bɛndɔ bá ndɔ taká fɔ́tá ɔ tɔ́mbákɛna na bíə́búə́ bɛnyɛná bɛbɛ́á.

¹⁹ Mba, yatɛ́ ɔyɛ́á bɛndɔ bá ná hɔ́ánána ɔmanya ɛlɔ́áyɛ́ Huɛlɛ́, yɛ́ báka ɔ mianyɔ́ ɛlɔ́áyɛ́ bəkimə: Wɛɛ́ya bɛ́múɛ́tɛ́, a ka bəə́bu nɔ́yɛ́ ínə́niə tə́lə́ŋu.

²⁰ Mba, hata yɛ ikúílí ɔyɛ́á Huɛlɛ́ a ná misí bɔ́tá, bɛɛ́la ɔbɛ́á a ná bɔ́táká, bɛ́ ndɔ ínə́niə nəníə́ ayɛ́ lɛ́á ata nɔ́yɛ́ ɛ́sɛ́á abáka bá lɛ wɛɛ́ya sínə na məə́sə. Yɛ́ lɛa ɛ́nánátɔ́ tɔ́na ɔwá, a báka na injiŋə ɔyɛ́á yɛ́ sa ndáhɔa, wɛɛ́ya tɔ́na a lɛ́á tiísi yɛ Huɛlɛ́ bíbúə́. Ɛlɔ́áyɛ́ nɔ́yɛ́, Huɛlɛ́ a sa ndá mɔndɔ mahana wə́ə́ ɔwá a sɛ́á a lɛ ndɔ wɛɛ́ya manya.

²¹ Bá ndɔ Huɛlɛ́ manya, mba, bá lɛ ndɔ wɛɛ́ya bə́tiə, bá lɛ ndɔ wɛɛ́ya mohóloniə híə́niniə ɛ́sɛ́á má ná wɛɛ́ya hɔ́ánánɛ́na. Ɔ nifəŋə, mə́búə́ mabɛ́kɔ́lɔmɔna má ndəmə má ná bəə́bu nənə́síə́, ibínə́binə yɛ́ ná wə́búə́ mɔlɛ́má áyɛ́na.

²² Bá ndɔ laa ɔwá bá báka na ɛmanya, mba, bá lɛa bambamɔ́mbámɔ.

²³ Bá lɛ ndɔ Huɛlɛ́ yɛ tuúmə lúbúnə ɔwá a lɛ́á ɔ buɔmɔ́ ɛlɔ́áyɛ́ ikúílíə́kimə, ɔ nifəŋə, bá ndɔ lúbúnə ɔbánɔ́ á bililí hɔ́ákátɔ́ ɔ bɛndɔ ɔbá bá ndɔ wə́ə́, ɔ tunoní, ɔ mɛnyama yɛ́ makɔlɔ́ ə́nisə mbá ata ɔ miáhɔ.

²⁴ Ɔ́ ɛlɔ́áyɛ́ nɔ́yɛ́ Huɛlɛ́ a ná bəə́bu niása ɔkɛaka ɔwá, bá bɛkɔa bɛ́ nibítífílə kɛ́áka ɔbɛ́á wə́búə́ mɔlɛ́má wɔ́ lɛ́á na ilókí, bá nɔ́yɛ́ kɛaka tɔ́na ɛlɔ́áyɛ́ ɛsɛ́má yɛ́ yəbúə́ mɛɛlɔ bɛ́múɛ́tɛ́.

²⁵ Bá ka tiísi yɛ bɛkɔa úŋúnəniə ɔbɛ́á bɛ́ ndɔ húlínə na Huɛlɛ́, bá ná ɛ́tá á bɛkanja; bá ndɔ lúbúnə á bɛɛ́la ɔbɛ́á Huɛlɛ́ a ná tábɔ́náka, bá bɛɛ́ta nyɔkɛna tɔ́na, bá lɛ Koló bɛ́múɛ́tɛ́ lúbúnə́ ɔwá a ná bikimə tábɔ́náka, ɔ ɔwayɛ́ bá ná hɔ́ánána ɔnyama ikúílíə́kimə. Nɔ́yɛ́ yɛ́ lɛ́á!

²⁶ Ɔ́ ɛlɔ́áyɛ́ nɔ́yɛ́ Huɛlɛ́ a ná bəə́bu niása ɔkɛaka ɔwá, bá bɛkɔa bɛ́ ɛsɛ́má kɛ́áka ɔbɛ́á yəbúə́ mɛɛ́lɔ yɛ́ ndɔ hikiə. Bə́búə́ bəəndú bá balɛ́mɛndɔ́ níásáka, bá sianakɛna na bɔsɔ́kɔ́ bəəndú.

²⁷ Hɔ́ánánátɔ́ ɔ balɛ́mɛndɔ́, bá bə́búə́ bəəndú tíkə́, bá sianakɛna na bɔsɔ́kɔ́ balɛ́mɛndɔ́. Yatɛ́ ɛsɛ́má na mɛlɛ́mɛndɔ́ ɔwá a ndɔ siana na ɔsɔ́kɔ́ mɛlɛ́mɛndɔ́. Abáka Huɛlɛ́ a bəə́bu hɔkɛna hɔ́ánánátɔ́ ɛ́sɛ́á wɛ́ɛ́yɛ́ ɔwá a ná yɛ́ɛ́yɛ́ ɛnya yɛ bɔbɛ́á kɛ́áka.

²⁸ Ɛ́sɛ́á bá sa hikiə á Huɛlɛ́ ɔmanya, Huɛlɛ́ a ná bəə́bu niása ɔ uwəbú ɛmanya yɛ bíndúmbúlə́lə́tɔ; bá ndɔ kɛa yatɛ́ ɔyɛ́á bá sa hɔ́ánana ɔkɛa.

²⁹ Bá lɛa ɛmbáta híkə́tɔ́ yɛ məndínə́ məkimə má bɛkɔa ɔkɛa ɔbɛ́á bɛ́ lɛ bá tɛ́nɛ́mátɔ, bá lɛa undúə́tɔ́ na bɔbɛ́á: Yoŋí, ɛŋgásɔ́, ɛhɛ́tɛ́, muɔnɔ́nɔ, bɛɔmɔ́nɔ, mənímbə́nə́, maŋgɛ́lɛ́, bá bɛndɔ sɔ́mɔkɛna ɛŋaná mɔsɛ́ŋɛ́.

³⁰ Bá húlə́ məə́nyə má bɛndɔ tɛŋakɛna, bokóyíkoyi bá Huɛlɛ́, bá bɛndɔ kɔ́báka, bə́níə́mə, babɛ́lɛ́áŋɔna, bəsiə há bɔbɛ́á, balɛɔkɛ́ná bisə́ na binyə́,

³¹ bɛálála, bá lɛ munuə tínímíə́, na mɔlɛ́má natákátɔ, ɛŋaná mahana ɛlɔ́áyɛ́ bɔsɔ́kɔ́.

³² Bá ndɔ manya muɛsɛ bá sɛ́á umbə́ndə́ wɔ́ Huɛlɛ́ wɔ́ ndɔ laa ɔwá; bááyɛ́ ɔbá bá ndɔ bítíkə ɔ yɛ́ɛ́yɛ́ ɛnya, bá ná hɔ́ánáná ɔtɔ́mbɛ́na ɔ nyɛmbɛ́. Ata nɔ́yɛ́ bá ndɔ ákánana ɔ busíə́ ɔ yɛ́ɛ́yɛ́ ɛnya yɛ́ bɛkɔa ɔkɛa ɔ ɔyáyɛ́na, bá bááyɛ́ makɛ́nda índiəkinə ɔbá bá ndɔ nɔ́yɛ́ kɛa.