Mə́líkusu 1 - Hɛtɔnyɛ́ Hiɔ́sɔ

Yɔhánɛsɛ Mɔsɔabɛndɔ Imbə́nú Yɛɛsɛ túmbə́ləniə ɔ bɛndɔ

¹ Nibotólíníə́ nɛ́ Imbə́nú Yɛɛsɛ yɛ Yə́susu Kilísitusu, á Mɔná wa Huɛlɛ́.

² Yɛ́ lɛa tilə́kə́tɔ́ ɔ hiəfulə hɛ́ mɔhɛ́nátɔtányɛ́ á Isáya hɛ́ sɛ́á: «Mɛaŋɔ́á Huɛlɛ́, mɛ nɔ́ wamɛ́á mɔsɔ́másɔma buəkiniə ɔ ɔwáwɔ ɔ ɛnɔ́mɛ ɔtábɔ́nɛna.

³ A ndɔ yə́mə na nióni nɛŋɛ́ŋa ɔ misí yɛ makɔ́tákɛ a sɛ́á: “Nɔ́ ɛnɔ́mɛ yɛ́ Isə́lúkú tábɔ́náka, Nɔ́ bɛ́áyɛ́á bɛnɔ́mɛ sɔkɔ́náka.”»

⁴ Yɔhánɛsɛ ɔ misí yɛ makɔ́tákɛ, a ná botólíə́ ɔ bɛndɔ ɔ nɛsɔa uwíndiə na uyəmbələniə a sɛ́á: «Nɔ́ mə́núə́ mabɛ́á sə́hə́kíníə́, nɔ́ kinə́ ɔ maáta ɔkɛa, nɔ́ nɛsɔa kusə́nə mbá Huɛlɛ́ a ŋɔ bənú mə́núə́ mabɛ́á niasɛna.»

⁵ Nɔ́yɛ́, bɛndɔ bá Yəlúsalɛma na bá Yútɛa bəkimə bá ka ndásákɔna ɔ busíə́ bɔ́ Yɔhánɛsɛ, bá mə́búə́ mabɛ́á laaka ɔ ətíə́ yɛ́ bɛndɔ, a bəə́bu nɛsɔa índiəkinə ɔ nuíyi nɛ́ Yúlútɛnɛ.

⁶ Yɔhánɛsɛ a ka báá lɛŋábákátɔ́ na nɛbata nɔakátɔ́ na mahɔtá má mɛnyama ɔyɛ́á bá ndɔ ɛ́lɛnɛna bá sɛ́á samó, na hiŋgóli hɛ́ yɔɔfɔ bísúŋínə́tɔ́ ɔ nɛlálá. A bílúkə́kə na bɛtandá na buɔyɛ́ bɔ́ ɛmbɔ́ma.

⁷ A bɛndɔ lakɛna a sɛ́á: «Mɔndɔ a lɛa ɔ ɔsákɔna ɔwámɛ əlimə. Mɛ lɛ báá hɔ́ánánátɔ́ ɔ mikolí yɛ́ bɛ́áyɛ́á bɛtafɛ́ná uhumbulə.

⁸ Ɔwámɛ, mɛ ndɔ bənú nɛsɔa índiə na mənífə́. Mba ɔwayɛ́, a ŋɔ bənú nɛsɔa índiəkinə na Umbúínyi Mɔnaŋanaŋa.»

Nɛsɔa nɛ́ Yə́susu

⁹ Ɔ mátáyɛ́ mɔɔsɛ́, Yə́susu a ná húlínə́ ɔ Násalɛtɛ ɔ misí yɛ́ Kalɛ́lɛa; a ná ndáfámá ɔ nuíyi nɛ́ Yúlútɛnɛ. Yɔhánɛsɛ a ná wɛɛ́ya nɛsɔa índíə́.

¹⁰ Ɛ́sɛ́á Yə́susu a ná fámá ɔ nuíyi, a ná ɛ́ná ɔmbáŋá wɔ́ nɔ́ bíkunə. Umbúínyi Mɔnaŋanaŋa wɔ́ ná tukínə ɔ ɔwayɛ́ mɛɛ́lɔ hɔ́ákátɔ́ ɔ hibúbə́.

¹¹ Nióni nɛ́ ná húlínə́ ɔ ɔmbáŋá nɛ́ sɛ́á: «Ɔ báka wamɛ́á mɔná wa mɔlɛ́má, mɛ ndɔ aŋɔ́á bílə́nínə mɔŋɛ́ŋa.»

Sátana a nɔ́ Yə́susu kɔsɔna

¹² Əlimə yɛ́ nɔ́yɛ́, Umbúínyi Mɔnaŋanaŋa wɔ́ ná wɛɛ́ya ákánáná ɔ misí yɛ́ makɔ́tákɛ.

¹³ Umə́ a ná tuənə́kínə moómo ə́nisə má tunó; Sátana a ná wɛɛ́ya kɔsɔ́na. Yə́susu a ka báá a ndɔ niŋə na mɛnyama yɛ́ ɛmbɔ́ma bɛáŋgɛlɛ bá wɛɛ́ya nyɔkɛna.

Yə́susu a nɔ́ ɛ́lɛakɛna bəlumbəlumbə bə́nisə

¹⁴ Əlimə ɔwá bá nɔ́ Yɔhánɛsɛ halɛna, bá ná wɛɛ́ya háá ɔ ɛbɔka, Yə́susu a ná ákáná ɔ Kalɛ́lɛa a húlə́ Imbə́nú Yɛɛsɛ yɛ Huɛlɛ́ túmbə́ləkəniə.

¹⁵ Yə́susu a ka bá a ndɔ bɛndɔ lɛna a sɛ́á: «Isíŋáka ikúílí yɛ́ nɔ́ hɔ́ánana, Nɛmanɛna nɛ́ Huɛlɛ́ nɛ́ nɔ́ ndafama! Nɔ́ mə́núə́ mabɛ́á sə́hə́kíníə́, nɔ lɛ maáta kɛ́á tɔ́na, mba, nɔ́ lumínínə ɔ Imbə́nú Yɛɛsɛ!»

¹⁶ Ɔmɔ́tɔ́yɛ́ Yə́susu a ka bá a ndɔ kɛnda ɔ ɛsɛ́lɛ́ yɛ́ nɔmɔ́ nɛ́ Kalɛ́lɛa, a ná Símono yámá na wayɛ́á munínyə́ á Andɛlɛ́ ɔ nɔmɔ́ ɔ nibúnjə́ uwəmbinə bɔkɔasɛ́á, bá ka báá bəlumbəlumbə.

¹⁷ A ná bəə́bu lɛ́na a sɛ́á: «Nɔ́ mɛaŋɔ́á ɔ́ŋgɔ́kɔ, mbá nɔ ŋɔ híánaka bámɛ́á bɔnɔ́fɔ́ bɛndɔ.»

¹⁸ Ɔ umisíúmə́, bá ná mə́búə́ məbúnjə́ bɛ́yákáláka, bá ná wɛɛ́ya ɔŋgɔ́kɔ.

¹⁹ A ná ákáná ɔ busíə́, a ná Yákɔbɔ yámá na wayɛ́á munínyə́ á Yɔhánɛsɛ, baná bá Sɛbɛtɛ́. Bá mə́búə́ məbúnjə́ tábɔ́náka ɔ isóyí nuúmə́.

²⁰ Ɔ umisíúmə́, a ná bəə́bu ɛ́lɛ́ákɛ́na, bá ná yəbúə́ isə́ tíkə́ na bɔnyɛna ɔ isóyí nuúmə́, bá ná Yə́susu ɔŋgɔ́kɔ.

Yə́susu a nɔ́ wɔmɔtɛ́ mɔndɔ niŋəsiə ɔ Kafalanahúmu

²¹ Yə́susu na báyɛ́á bɔkɔ́nɛna bá ná ákáná ɔ bətínə́ yɛ Kafalanahúmu. Ɔ buɔsɛ́ bɔ́ nɛhɔtɔ ɔ Bɛyútɛnɛ, Yə́susu a ná fínə́ ɔ miímə yɛ́ mabɛ́kálɛ́na, a ná botólíə́ ɔ bɛndɔ bɛkɔa bɛ́ Huɛlɛ́ uwinə́niə.

²² Nɛ́áyɛ́á nindínə́ nɛ́ bɛkɔa uwinə́niə nɛ́ ná bɛndɔ ə́lə́mə́nə́síə́. A ka bá a ndɔ úkúniə na iŋgínə́ yikimə tátá ɛ́sɛ́á bamanyumbə́ndə́.

²³ Ɔ ikúílí ɔyɛ́á Yə́susu a ná bá a ndɔ úkúniə, mɔndɔ ɔmɔtɛ́ na umbúínyi mɔbɛ́á a ná fínə́ həmə́tu ɔ miímə yɛ mabɛ́kálɛ́na, na nióni nɛŋɛ́ŋa, a sɛ́á:

²⁴ «Á Yə́susu, wa Násalɛtɛ! Yatɛ́ yɛ́ lɛ́á na bəsú na aŋɔ́á əə́? Ɔ ka ndasá háha ɔ uwəsú unímə́siə əə́? Mɛ ndɔ manya muɛsɛ mɛ sɛ́á aŋɔ́á ɔ lɛ́á Mɔnaŋanaŋa ɔwá Huɛlɛ́ a ná lɔma!»

²⁵ Yə́susu a ná umbúínyi bámálɛ́ná a sɛ́á: «Náyá yə́ə́bu, fáma á wɔ́ɔwɔ mɔndɔ mɛɛ́lɔ!»

²⁶ Nɔ́yɛ́, umbúínyi mɔbɛ́á wɔ́ ná wɛɛ́ya fúkə́lə́ na iŋgínə́, ɔ fámáka, wɔ́ ná yə́mə́ mɔŋɛ́ŋa.

²⁷ Bɛndɔ bəkimə bá ná minuə ásɛ́ákɛ́á, bəə́bu na bəə́bu bá bɛ́bataka bá sɛ́á: «Yatɛ́ yɛ́ɛyɛ əə́? Ɔ́ muinə́niə muɛsɛ wa bɛndɔ wɔ́ɔwɔ a lɛ́á, wɔ́ɔwɔ mɔndɔ wɔ́ɔwɔ a ndɔ imbúínyi mɛbɛ́á manɛna, yɛ́ wɛɛ́ya ɔ́kɔ́kɛnɛna!»

²⁸ Nɔ́yɛ́ indumə yɛ Yə́susu yɛ́ ná hútú yambana ɔ misí yɛ́ Kalɛ́lɛa mikimə.

Yə́susu a nɔ́ bɛnákɛnákɛ niŋəsəkiə

²⁹ Ɛnaka Yə́susu, na Yákɔbɔ, na Yɔhánɛsɛ bá fámá ɔ miímə yɛ mabɛ́kálɛ́na yɛ Bɛyútɛnɛ, bá ná ákáná ɔ ɔmbɛ́la wɔ́ Símono na Andɛlɛ́.

³⁰ Inyə́kínə́ yɛ Símono a ka bá sianátɔ, a ka báá na ɛsɔ́kɔ́sɔ́kɔ, bá ná Yə́susu mɔɔ́mbɔ wɔ́ mɔ́táyɛ́ muəndú lɛ́na.

³¹ A ná bɛ́nyálɛ́lá ɔ ɔwáyɛ́ ɛmɛ́ŋɛ́, a ná wɛɛ́ya itíə́ ɔ mɔkátá, a ná wɛɛ́ya huəlíníə́. Ɛsɔ́kɔ́sɔ́kɔ yɛ́ ná muəndú hɔ́á, a ná botólíə́ ɔ uwəbú ɔnyɛna.

³² Bɛkɔlakɔ́lá əlimə ɔwá hiɔtɔ́tɔ́ hɛ́ nɔ́ kasianɛ́na, bɛndɔ bá ná Yə́susu bɛnákɛnákɛ húlə́kə́nínə́ na bɛndɔ bá imbúínyi mɛbɛ́á.

³³ Bɛndɔ bəkimə bá bətínə́ bá ná kɔtákána ɔ busíə́ bɔ́ hɛkɔ́kɛ hɛ́ miímə ɔyɛ́á Yə́susu a ná bámɛ́nɛ́na.

³⁴ Yə́susu a ná bɛnákɛnákɛ niŋə́sə́kíə́ bikimə ɔbá bá ná báá na ɛnyɛnya yɛ mɛɛ́mbɔ, a ná imbúínyi mɛbɛ́á miəŋí fə́mə́kíə́ tɔ́na. A sa bá a ndɔ niasa a sɛ́á yɛ́ hɔ́kɔ́ bɔkɔasɛ́á, yɛ́ ka bá yɛ́ ndɔ wɛɛ́ya manya.

Yə́susu a ndɔ Imbə́nú Yɛɛsɛ túmbə́ləniə ɔ bɛndɔ

³⁵ Ɛsɔ́mbalɛ́, ɛŋaná ɔyáá muɛsɛ, Yə́susu a ná hɔalɛ́na a ná fámá ɔ miímə. A ná ákáná hata na bətínə́, ɔ hitíkə́tíkə́, a ná botólíə́ ɔ ɔbɛ́kálɛ́na.

³⁶ Símono na bəkúlə́kulə bá ná botólíə́ ɔ ɔwayɛ́ uhúlə́siə.

³⁷ Ɛnaka bá ká wɛɛ́ya nibə́, bá ná wɛɛ́ya lɛná bá sɛ́á: «Bɛndɔ bəkimə bá ndɔ aŋɔ́á siə.»

³⁸ Mba a sɛ́á: «Tɔ́ ákáná ɔ ɛbɔ́ka yinə́yinə́, ɔ mɔnɔŋɔ má ɛmɛ́ŋɛ́. Mɛ ná hɔ́ánáná ɔ bɛndɔ Imbə́nú Yɛɛsɛ utúmbə́ləniə umə́, ɔ́ ɛlɔ́áyɛ́ nɔ́yɛ́ mɛ́ ná húlínə́ ɔ Ɔmbáŋá.»

³⁹ Nɔ́yɛ́, a ka bá a ndɔ húlə́ kɛnda ɔ misí yɛ Kalɛ́lɛa mikimə, a húlə́ Imbə́nú Yɛɛsɛ túmbə́ləkəniə ɔ məə́bə má mabɛ́kálɛ́na má Bɛyútɛnɛ, a imbúínyi mɛbɛ́á fə́mə́kiə ɔ bɛndɔ.

Yə́susu a nɔ́ mɔndɔ wa minú niŋəsiə

⁴⁰ Mɔndɔ ɔmɔtɛ́ wa minú a ná ndásá a Yə́susu busíə́, a ná wɛɛ́ya moŋgóndi luminə, a ná wɛɛ́ya batá ɔwá a wɛɛ́ya ɔlɔ, a sɛ́á: «Tɔ́kɔ́lɛ, ábá ɔ ndɔ hikiə niŋə́síə́ mɛaŋɔ́á.»

⁴¹ Yə́susu a ná wɛɛ́ya mahana wəə, a ná mɔkátá sándɔ́na, a ná wɛɛ́ya itíə́lə, a sɛ́á: «Ɛ́ɛ, mɛ ná hikə́kíə́, niŋə!»

⁴² Ɔ umisíúmə́ minú yɛ́ ná mɔndɔ hɔa, a ná niŋə.

^43-44 Yə́susu a ná wɛɛ́ya bámálɛ́ná na uwoníniə a sɛ́á: «Ɔ lɛ mɔndɔ lɛ́na ata bɔkɔa, mba káka bínə́níə́ ɔ mutitiəmahánɛna, índíə́ bɛnamá tɔ́na ɔbɛ́á Mósisi a ná láá a sɛ́á bá índíə́kínə ɛlɔ́áyɛ́ bɛndɔ bəkimə uwinə́niə ɔwá ɔ ná niŋə.»

⁴⁵ Mba ata nɔ́yɛ́, ɛnaka wɔ́ɔwɔ mɔndɔ á ákáná, a ná botólíə́ ɔ bɛ́táyɛ́ bɛkɔa uhúlə́ túmbə́ləniə. Ɛlɔ́áyɛ́ nɔ́yɛ́ Yə́susu a sa bá a ndɔ húlə́ bínə́niə tɔ́na ɔ mianyɔ́ ɔ bətínə́, mba, a tuənəkinə ɔ ɛbɔ́ka ɔyɛ́á bɛndɔ bá lɛ baa. Bɛndɔ bá ndasákɔ́na ɔwáyɛ́ busíə́ bá húlə́kinə ɔ bɛbɔ́ka bikimə.