Hɛ́bɛlɛ 1 - Hɛtɔnyɛ́ Hiɔ́sɔ

Huɛlɛ́ a ka tɔ́mbɛ́na á wayɛ́á Mɔná ɔkɛaka ɔwá a bɛndɔ hɔ́kɛ́na

¹ Ɔ bɛ́táyɛ́ bikúílí, Huɛlɛ́ a ka bíə́súə́ bisə́kínə́ hɔ́kɛna ɔ məndínə́mə́ndínə́, bikúílí biəŋí ɔ tɔ́mbákɛna na báyɛ́á Bɔhɛ́nátɔtányɛ́;

² Mba, isíŋáka ɔ tunó ɔtɔ́á tɔ lɛ́á, a ka bəsú hɔ́kɛna ɔ tɔ́mbákɛna na wayɛ́á Mɔná, ɔ tɔ́mbákɛna na mɔ́táyɛ́ Mɔná á ná Misí bɔta, ɔ ɔwayɛ́ Huɛlɛ́ a ná tínímíə́ mɔmanɛna wa bɛɛ́la bikimə.

³ Wɛɛ́ya a ndɔ ínə́niə ɛ́sɛ́á tuúmə tɔ́ Huɛlɛ́ tɔ́ lɛ́á, a lɛa huɛ́ ɛ́sɛ́á á Huɛlɛ́. A ndɔ misí híkə ɔ tɔ́mbákɛna na yáyɛ́á Ɛtambá ɔyɛ́á yɛ́ lɛ́á na injiŋə, ɛnaka a mabɛ́á má bɛndɔ sɔ́áka, a ná bəə́bu nəŋə́síə́, əlimə yɛ nɔ́yɛ́, a ka bála ɔ nɔɔ́mɛná, a lɛa tuənə́tɔ́ ɔ mɔkátá wɔ́ bɛnɔ́mɛ wɔ́ Huɛlɛ́ ɔwá a ndɔ bikimə manɛna.

⁴ Nɔ́yɛ́, Huɛlɛ́ a ka wɛɛ́ya tínímíə́ ɔ mɔlɔ́á wɔ́ bɛáŋgɛlɛ, a ná wɛɛ́ya niínyə índiə ɔnɛ́á nɛ́ ná məə́nyə məkimə yayɛna.

Mɔná wa Huɛlɛ́ a lɛa mɔŋɛ́ŋa yáyɛ́ná bɛáŋgɛlɛ

⁵ Huɛlɛ́ a lɛ boóko a ná Áŋgɛlɛ lɛ́na a sɛ́á: «Ɔ lɛa wamɛ́á Mɔná, ɔ botolokiə niɔfɛ́nɛ mɛ lɛa yawɔ́á isə́.» A lɛ boóko a ná yɛmɔtɛ́ Áŋgɛlɛ lɛ́na a sɛ́á: «Mɛ ŋɔ báá yáwɔ́á Isə́, ɔ ŋɔ báá wamɛ́á Mɔná.»

⁶ Ɔ nifəŋə, ɛnaka Huɛlɛ́ á bámɛ́nɛ́na ɔ wayɛ́á Mɔná ɔlɔ́máka ɔ misí ɔwá a lɛ́á ɔ mɔlɔ́á wɔ́ bɛɛ́la bikimə, a ka hɔ́lɔ a sɛ́á: «Bɛáŋgɛlɛ bikimə bɛ́ ná hɔ́ánána ɔ ukiniə ɔ ɔwayɛ́ busíə́ ɔ ɔwayɛ́ ulúbúnə.»

⁷ Ɛlɔ́áyɛ́ bɛáŋgɛlɛ, Huɛlɛ́ a ka laa a sɛ́á: «Bá báka ɔbánɔ́ bááyɛ́á bɔnyɛna, bá báka ɛ́sɛ́á umbúínyi, bá báka tɔ́na ɛ́sɛ́á musoŋó wɔ́ hiwə.»

⁸ Mba ɛlɔ́áyɛ́ wayɛ́á Mɔná, a ka laa a sɛ́á: «Ɔwáwɔ á Huɛlɛ́, híə́wúə́ hikómo hɛ́ bunəni hɛ́ ŋɔ bámɛnɛna ɔ iŋíkúílíə́kimə.» A ka laa tɔ́na a sɛ́á: «Ɔ ndɔ yáwɔ́á ilúkunə manɛna na taká.

⁹ Ɔ ndɔ hikiə yatɛ́ ɔyɛ́á yɛ́ lɛ́á taká, ɔ ndɔ bɔbɛ́á bánya, ɔ́ ɛ́lɔ́áyɛ́ nɔ́yɛ́ Huɛlɛ́, á yáwɔ́á Huɛlɛ́ a ná aŋɔ́á yɔ́mɔ́kɛ́na, a ná aŋɔ́á ɛbánda olínə ɔ mɔlɔ́á ɔyɛ́á yɛ́ ndɔ aŋɔ́á nɛhɔnɔ húlə́ninə, a ná aŋɔ́á tɛ́fá yáyɛ́ná bɛ́áwɔ́á bikindəniə.»

¹⁰ A ka laa tɔ́na a sɛ́á: «Á Isə́lúkú, aŋɔ́á tɔ́na ɔ ná misí bɔ́tá ɔ nɛbalɛ́ná, nɔɔ́mɛná yɛ́ lɛa ɔbánɔ́ buolí bɔ́ máwɔ́á makátá.

¹¹ Bɛ́ɛ́yɛ́ bɛkɔa bikimə bɛ́ ŋɔ nyɔ́á mbasɛ́á, mba ɔwáwɔ, ɔ nabáka. Misí na nɔɔ́mɛná bɛ́ ŋɔ híána ɛ́sɛ́á bilunə́ki bɛ́ bɛlɛŋa.

¹² Ɔ ŋɔ bɛɛ́ta bɔ́njɔ́kɔ ɛ́sɛ́á abáka bá ilunə́ki yɛ́ bɔlɛŋa bɔ́njɔ, bɛ́ ŋɔ sə́njiə ɛ́sɛ́á bilunə́ki bɛ́ bɛlɛŋa. Mba ɔwáwɔ, ɔ báka ɛlɔ́áyɛ́ bikúílí bikimə, bɔ́áwɔ́á buɔmɔ́ bɔ́ lɛ bá na nisúki.»

¹³ Huɛlɛ́ a sa nda áŋgɛlɛ lɛna ata ɛ́mɔtɛ́ a sɛ́á: «Sɔ́nɔ, ɔ ndə́túə́nə ɔ ɔwámɛ mɔkátá wɔ́ bɛnɔ́mɛ, mɛ ŋɔ kɛaka ɔwá, báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.»

¹⁴ Bɛáŋgɛlɛ uwəbú, bá lɛa ɔbánɔ́ umbúínyi, bá ndɔ buolí bɔ́ Huɛlɛ́ nyɔɔ. A ndɔ bəə́bu lɔ́ma ɔ bááyɛ́ ɔwɔ́lɔ ɔbá a ŋɔ nuəkəniə.